ថ្ងៃសែនចូលឆ្នាំចិន-វៀតណាម នៅរាជធានីភ្នំពេញ មានសិក្សានុសិស្ស និង គ្រូមកបង្រៀនដូចថ្ងៃធម្មតា

ពិធីសែនបុណ្យចូលឆ្នាំប្រពៃណីចិន-វៀតណាម នៅរាជធានីភ្នំពេញមានសិក្សានុសិស្ស និងគ្រូមករៀនបង្រៀននៅតាមសាលារៀននានា ដូចថ្ងៃធម្មតាដែរមិនមានអ្វីប្រែប្រួលឡើយ។

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ បានមានប្រសាសន៍នៅរសៀល ថ្ងៃទី១៦ ខែកម្ភៈ ឆ្នាំ២០២៦នេះថា អំឡុងថ្ងៃបុណ្យចូលឆ្នាំថ្មីប្រពៃណី ចិន-វៀតណាម សម្រាប់ឆ្នាំ២០២៦នេះ សកម្មភាពបង្រៀន និងរៀននៅតាមគ្រឹះស្ថានសិក្សាក្រោមមន្ទីរអប់រំ យុវជន និងកីឡា រាជធានីភ្នំពេញបានដំណើរការបង្រៀន និងមានសិស្សមករៀនជាធម្មតា។ ដោយឡែកមានគ្រឹះស្ថានសិក្សាឯកជនមួយចំនួន បានឈប់សម្រាកតាមកម្មវិធីសិក្សារបស់ខ្លួន។

លោកប្រធានមន្ទីរ បានបន្តថា ដើម្បីធានាបានដំណើរការបង្រៀន និង រៀនក្នុងឱកាសបុណ្យចូលឆ្នាំប្រពៃណីចិន-វៀតណាម មន្ទីរអប់រំ យុវជន និងកីឡា រាជធានីភ្នំពេញ បានដឹកនាំការប្រជុំពង្រឹងដំណើរការបង្រៀន និងរៀន ដល់ គ្រប់គ្រឹះស្ថានសិក្សាទាំងអស់ ចូលរួមបន្តផ្សព្វផ្សាយដល់សិស្សានុសិស្ស ដើម្បីឲ្យពួកគេមករៀនឲ្យបានទៀងទាត់។ ម្យ៉ាងទៀត គ្រប់គ្រឹះស្ថានសិក្សាទាំងអស់ ត្រូវបន្តតាមដានការមកបំពេញការងាររបស់លោកគ្រូ អ្នកគ្រូ រក្សាបាននូវដំណើរការបង្រៀន និងរៀនជាប្រក្រតី ដោយគ្រប់គ្រឹះស្ថានសិក្សា និងការិយាល័យអប់រំ យុវជន និង កីឡា នៃរដ្ឋបាលខណ្ឌ ត្រូវផ្តល់របាយការណ៍ប្រចាំថ្ងៃ ស្តីពីវត្តមានរបស់គ្រូ-សិស្ស មកមន្ទីរអប់រំ យុវជន និងកីឡារាជធានីភ្នំពេញ។

លោកប្រធានមន្ទីរ បានបន្ថែមថាមន្ទីរអប់រំ យុវជន និងកីឡារាជធានីភ្នំពេញ បាននិងកំពុងបន្តតាមដានដំណើរការបង្រៀន និងរៀន ដើម្បីធានាធ្វើយ៉ាងណាឱ្យសិស្ស និងគ្រូ មករៀន និងបង្រៀនធម្មតា។

គួរបញ្ជាក់ថាពិធីសែននិងបុណ្យចូលឆ្នាំប្រពៃណីចិន-វៀតណាមបានប្រព្រឹត្តិទៅចាប់ពីថ្ងៃទី១៦រហូតដល់ថ្ងៃទី១៩ខែកម្ភៈឆ្នាំ២០២៦ខាងមុខនេះ៕ អត្ថបទ ៖ សំអឿន