ក្បួនហុងស៊ុយ ៤ចំណុចយ៉ាងសំខាន់ មុនទិញខុនដូថ្មី

មនុស្សសម័យទំនើប មិនសូវខ្វល់ខ្វាយនឹងអប្បិយជំនឿអ្វីឡើយ។ រាល់ការទិញសម្ភារថ្មី យានជំនិះថ្មី ឬទីលំនៅថ្មី ជាដើមសុទ្ធតែពុំបានគិតទៅលើតម្រាហុងស៊ុយនោះទេ។ ប៉ុន្តែអប្បិយជំនឿផ្សារភ្ជាប់នឹងជីវិតពិតយ៉ាងអាថ៌កំបាំង ដែលមិនគួរមើលរំលងឡើយ។ ​បើប្រហែស ហុងស៊ុយនឹងអន់ថយ រាសីស្រុតចុះ រស់នៅខ្វះសុភមង្គលជាក់ជាពុំខាន។ ដូចគ្នានេះ ការទិញខុនដូថ្មី គួរពិចារណា លើក្បួនហុងស៊ុយទាំង​ ៤ខាងក្រោម ​ទើបអាចនាំភាពសុខដុមដល់អ្នករស់នៅ។

១. ច្រកចូល

ច្រកចូលបន្ទប់ខុនដូគួរតែធំទូលាយ ខ្ពស់ និងមានពន្លឺភ្លឺច្បាស់ ដើម្បីបង្ហាញពីអំណាច ព្រោះទ្វារប្រៀបដូចជាមាត់យើងអ៊ីចឹង វាជាកន្លែងទទួលថាមពលពីខាងក្រៅចូលទៅខាងក្នុង។ បើខាងមុខទ្វារចូលមានធ្លាចង្អៀត ឬនៅចំពីមុខជណ្តើរយន្ត ឬជណ្តើរជើង វានាំ​ឱ្យអ្នក​រស់នៅ​គ្មានស្ថិរភាព​ផ្នែក​ហិរញ្ញវត្ថុ រកប្រាក់មកបាន មិនអាចសល់។

២. ទីតាំងបន្ទប់

កុំយកបន្ទប់ជាប់ជណ្ដើរយន្ត ឬជណ្ដើរជើង ព្រោះនាំឱ្យបាត់ទ្រព្យ។ គួរជ្រើសរើសបន្ទប់នៅជាប់សួនច្បារ ប្រភពទឹក ឬអាងហែលទឹក ទើបអាចជួយអ្នកឱ្យរកស៊ីមានបាន និងមានសុខភាពល្អ។

៣. បន្ទប់គេង

បន្ទប់គេងមិនគួរមានជ្រុងស្រួច បែរចំនោះទេ។ ក្បាលគ្រែមិនគួរបែរមុខទៅមាត់ទ្វារ ហើយ​កុំឱ្យមាន​ពន្លឺ​ចាំង​មក​លើ​មនុស្ស​ពេល​អង្គុយ និង​សម្រាក។ មិនឱ្យដាក់ម៉ាស៊ីនត្រជាក់នៅលើក្បាលដំណេកដាច់ខាត ព្រោះ​វា​នឹង​បង្ក​ជា​ជំងឺ​ឈឺថ្កាត់មិនចេះស្រាកស្រាន្ត។

៤. យ៉រ

គួរជ្រើសរើសបន្ទប់ដែលមានយ៉រធំទូលាយ ដែលអាច​មើល​ឃើញអគារ​ផ្សេង​ទៀត។ យ៉រ​ទូលាយ ស្រឡះល្អ នឹង​ជួយ​ស្រូប​ថាមពល​ល្អៗ ចូលមកក្នុងបន្ទប់ ឱ្យកាន់តែមានសិរីសួស្ដី៕

អត្ថបទ៖ សន្យា

ចុចអាន៖ ក្បួនហុងស៊ុយមុនទិញគេហដ្ឋានថ្មី​ ដើម្បីនាំជោគលាភដល់ម្ចាស់ផ្ទះ

ចុចអាន៖ ហុងស៊ុយរៀបចំតុធ្វើការ​ ​ជួយបង្កើនភាពរីកចម្រើនខាងអាជីព