លេខមហាស៊យ ក្នុងក្បួនហុងស៊ុយចិន អ្នកធ្វើជំនួញ គួរចៀសវាង

ប្រទេសចិន មានវប្បធម៌ចំណាស់ និងជំនឿដ៏យូរលង់ពាក់ព័ន្ធនឹងហុងស៊ុយលេខនព្វន្ដ។ យោងតាមក្នុងក្បួនហុងស៊ុយ លេខអាចនាំសំណាង ក៏អាចនាំស៊យ ប្រសិនជ្រើសរើសប្រើមិនត្រឹមត្រូវ។ ដូច្នេះទើបបានជាពេលបើកជំនួញជួញដូរ ឬរៀបចំពិធីមង្គលនានា គេតែងតែចៀសវាងលេខទាំងពីរដូចខាងក្រោម។

លេខ ៤

ខណៈ​ប្រទេសជាច្រើនចាត់ទុក​លេខ ៤ ជាលេខ​​សំណាង ​នៅ​ក្នុង​ប្រទេស​ចិនឯណោះវិញ លេខនេះជា​លេខ​ចង្រៃ​បំផុត ​ព្រោះសូរសព្ទរបស់​វា​ត្រូវ​គ្នា​នឹង​ពាក្យ​ដែល​មាន​ន័យ​ថា ​”ស្លាប់” ។

រឿងដ៏គួរគួរឱ្យចាប់អារម្មណ៍ ប្រសិនបើអ្នកធ្វើដំណើរទៅប្រទេសចិន អ្នកនឹងសម្គាល់ឃើញថា កម្រមានជណ្តើរយន្តដែលមានលេខ ៤ ណាស់។ សូម្បីលេខបន្ទប់សណ្ឋាគារ លេខផ្ទះ លេខទូរសព្ទ ឬលេខផ្លូវជាដើម សុទ្ធសឹងចៀសវាងលេខ ​៤ ជានិច្ច។

លេខ ៤ មិនត្រឹមតែស៊យ ពេលវានៅតែឯងប៉ុណ្ណោះទេ សូម្បីបញ្ចូលជាមួយលេខផ្សេង ក៏អាចទាញលេខនោះឱ្យទៅជាអពមង្គលតាមដែរ ដូចជាលេខ ១៤, ២៤, ៣៤ ៤០,…៤៤ ជាដើម។

លេខ ៣

ថ្វីត្បិត គេចាត់ទុកវាជាលេខស៊យ ប៉ុន្តែលេខ ៣ ក៏អាចជាលេខសំណាងផងដែរ អាស្រ័យលើស្ថានភាព និងការប្រើប្រាស់។ យ៉ាងណាក្ដី ប្រសិនជូនអំណោយដល់មិត្តភក្តិ ឬគូស្វាមីភរិយា គេកម្រប្រើលេខ ៣ ភ្ជាប់ជាមួយអំណោយនោះខ្លាំងណាស់ ព្រោះសំឡេងរបស់វា ស្រដៀងនឹងពាក្យដែលមានន័យថា “ចែកផ្លូវ” ឬ “បែកបាក់” ៕

អត្ថបទ៖ សន្យា

ចុចអាន៖ លេខកំពូលសំណាងទាំង ៨ ក្នុងក្បួនហុងស៊ុយចិន អ្នករកស៊ីគួរដឹង

ចុចអាន៖ លេខ ៤៩ ក្នុងជំនឿអាស៊ីផ្សារភ្ជាប់ជាមួយភាពអពមង្គល និងពពួកអមនុស្ស