សុបិនឃើញទាហាន ជាប្រផ្នូលគួរសប្បាយចិត្ត

នៅពេលសុបិនឃើញទាហាន មិនថាទាហានច្រើននាក់ ឬតែម្នាក់ក្ដី វាជាប្រផ្នូលដែលគួររីករាយចិត្ត ត្បិតនេះជាសញ្ញាវិជ្ជមានដែលអាចកើតឡើងចំពោះជីវិតពិត ហើយវាត្រូវបានបកស្រាយតាមប្រភេទផ្សេងៗនៃសុបិនដូចជា៖

សុបិនឃើញទាហានច្រើននាក់ ទស្សន៍ទាយ​ថា​ ម្ចាស់សុបិននឹង​ទទួល​បាន​ដំណឹង​ល្អ វាអាចជាការផ្លាស់ប្តូរការងារកាន់តែប្រសើរ ឬ​ទទួល​បាន​ទ្រព្យ​ដែល​មិន​នឹក​ស្មាន​ដល់​ពី​មុន​មក។

សុបិនឃើញទាហានម្នាក់ សុបិននេះផ្ទុយពីខាងលើ ត្បិតអ្នក​អាចទទួល​បាន​បញ្ហា ដោយសារតែពាក្យសម្ដី។ ដូច្នេះចូរប្រុងប្រយ័ត្នជាពិសេសចំពោះការនិយាយស្ដី និងការសម្រេចចិត្តបន្ទាន់ណាមួយ។

សុបិនឃើញទាហានមកផ្ទះ ប្រសិនកំពុងជួបបញ្ហាក្រពុលមុខនោះនឹងមានជំនួយ ព្រមទាំងការការគាំទ្រពីសាច់ញាតិ ឬមិត្តភក្តិជិតស្និទ្ធ។

សុបិនឃើញមេទាហាន ឬមេទ័ព ​អ្នកនឹង​ទទួល​បាន​លាភ​សំណាង ​រួច​ផុត​ពី​សំណាង​អាក្រក់ ព្រោះមានអ្នកធំតាមជួយជ្រោមជ្រែង។ បើកំពុងមានជំងឺឈឺថ្កាត់ ជាសញ្ញានៃការប្រសើរឡើង។ ក្នុងវិស័យអាជីពវិញ អាចនឹងបាន​ជួប ឬ​ទាក់ទង​ការងារ​ជាមួយ​មិត្ត​បរទេស​។

សុបិនឃើញឆ្មាំល្បាត សុបិននេះក៏ជាប្រផ្នូលល្អដែរ ព្រោះមិនថាការងារឬរបររកស៊ី អ្នកនឹងទទួលបានជំនួយល្អៗដែលអាចរុញច្រានឱ្យអ្នកទទួលបានលទ្ធផលគាប់ប្រសើរ។

សុបិនឃើញទាហានកំពុងច្បាំងគ្នា ក្នុងពេលឆាប់ៗ អ្នកអាចទទួលដំណឹងមិនល្អ ឬមានបន្ទុកការងារដែលទទួលខុសត្រូវហួសប្រមាណ។

សុបិនឃើញទាហានលោតឆ័ត្រយោង ជីវិត​ក្នុង​រយៈពេល​នេះ​នឹង​មាន​ភាព​រលូនយ៉ាងល្អ​។ អ្វីដែលអ្នកចង់បាន ហាក់មិនពិបាកទៀតឡើយ ចំណែកសំណាងបានមកពីការធ្វើការ ឬការធ្វើជំនួញក៏គាប់ប្រសើរ៕

អត្ថបទ៖ សន្យា

ចុចអាន៖ ប្រសិនសុបិនឃើញខ្លួនឯងស្លាប់ ឬត្រូវគេសម្លាប់