សាលារាជធានីភ្នំពេញនឹងរៀបចំឱ្យមានសិល្បៈចម្រុះនៅតាមផ្លូវថ្មើរជើងមាត់ទន្លេ

អភិបាលរាជធានីភ្នំពេញលោក ឃួង ស្រេង ថារដ្ឋបាលរាជធានីនឹងរៀបចំឱ្យមានការសម្ដែងសិល្បៈចម្រុះនៅតាមផ្លូវថ្មើរជើងមាត់ទន្លេនាពេលខាងមុខ ដើម្បីទាក់ទាញអ្នកទេសចរនិងបង្កើនភាពរំភើបរីករាយ។

ថ្លែងក្នុងពេលចុះពិនិត្យផ្លូវថ្មើជើងមាត់ទន្លេក្នុងសប្ដាហ៍ទី២ កាលពីថ្ងៃទី៩ ខែកុម្ភៈ ឆ្នាំ២០២៥ លោក ឃួង ស្រេង បានឱ្យដឹងថា សាលារាជធានីនឹងរៀបចំឱ្យមានការប្រគំតន្ត្រីសម័យ បុរាណ (របាំប្រពៃណីជាតិ ចាប៉ីដងវែង) កន្លែងគូរគំនូរ កន្លែងអានសៀវភៅ ឬបណ្ណាល័យចល័ត កន្លែងវត្ថុអនុស្សាវរីយ៍ កន្លែងលេងសៀករហ័សកម្មជាដើមតាមបណ្ដោយផ្លូវថ្មើរជើងនេះបន្ថែមទៀតដើម្បីជាការទាក់ទាញ។

លោក​ថា៖ «កិច្ចការងារនេះធ្វើទៅបណ្ដើរៗ តែអ្វីដែលសំខាន់គឺខ្ញុំសាកល្បងឱ្យប្រជាពលរដ្ឋដើរសិន ដែលខ្ញុំសង្កេតឃើញថា២សប្ដាហ៍នេះគឺមានប្រជាពលរដ្ឋគាំទ្រដល់ការបើករបស់សាលារាជធានីភ្នំពេញ»។

 ក្នុងពេលដែលនឹងរៀបចំឱ្យមានសិល្បៈចម្រុះនេះសាលារាជធានីភ្នំពេញក៏នឹងបន្ថែមខ្សែរថយន្តក្រុងនិងបន្ថែមម៉ោងរត់ទៅផ្លូវថ្មើរជើងនេះដល់ម៉ោង១១យប់ផងដែរ។

គួរឱ្យដឹងថាការសាកល្បងផ្លូវថ្មើរជើង (Walk Street) ត្រូវបានសាលារាជធានីភ្នំពេញធ្វើឡើងនៅរៀងរាល់ថ្ងៃសៅរ៍ និងថ្ងៃអាទិត្យ ដោយចាប់ពីម៉ោង ៦ល្ងាចដល់ម៉ោង១១យប់ នៅតាមបណ្តោយតីរវិថីព្រះស៊ីសុវត្ថិ ចាប់ពីវិថីបក្សីចាំក្រុង (ផ្លូវលេខ៩៤) រហូតដល់មុខព្រះបរមរាជវាំង ស្ថិតនៅក្នុងខណ្ឌដូនពេញ រាជធានីភ្នំពេញ៕

អត្ថបទដោយ ហ៊ុន សិរីវឌ្ឍន៍