មន្ទីរវប្បធម៌សៀមរាប អញ្ជើញ កញ្ញាស្លឹកឈើ ស្រាយបំភ្លឺ ការផ្សាយវីដេអូកុមារប៉ះពាល់វប្បធម៌

លោក មួន សុភាព ប្រធាន មន្ទីរវប្បធម៌ និងវិចិត្រសិល្បៈខេត្តសៀមរាប កោះហៅ លោក ហត កើ ហៅ កញ្ញាស្លឹកឈើ ស្រាយបំភ្លឺ ជុំវិញការផ្សាយវីដេអូប្រាសចាកក្រមសីលធម៌ ប៉ះពាល់វប្បធម៌ ប្រពៃណីជាតិ ពិសេសតម្លៃកុមារកម្ពុជា។

តាមរយៈ លិខិតអញ្ជើញ នៅថ្ងៃទី១៩ ខែសីហា ឆ្នាំ២០២៤ នេះ បានអញ្ជើញ លោក ហត កើ ម្ចាស់គណនីបណ្តាញសង្គមហ្វេសប៊ុក ដែលមានឈ្មោះ កញ្ញាស្លឹកឈើ Fashion និងសាលា Kanha Slerkcher Catwalk Class ដើម្បីចូលរួម ប្រជុំ និងស្រាយបំភ្លឺករណីបង្ហោះផ្សព្វផ្សាយជាសាធារណៈនូវវីដេអូខ្លីៗជាច្រើនដែលមានរូបភាពប្រាសចាកពីក្រមសីលធម៌ ដែលបង្កឱ្យប៉ះពាល់យ៉ាងធ្ងន់ធ្ងរដល់វប្បធម៌ ទំនៀមទម្លាប់ ប្រពៃណីជាតិ ពិសេសតម្លៃកុមារកម្ពុជា។

មន្ទីរវប្បធម៌ និងវិចិត្រសិល្បៈ ខេត្តសៀមរាប បានកំណត់ ការណាត់ជួប នៅស្អែក ពោលគឺថ្ងៃអង្គារ ទី២០ ខែសីហា ឆ្នាំ២០២៤ វេលាម៉ោង ០៣:០០ នាទី រសៀល ទីកន្លែងនៅ សាលប្រជុំមន្ទីរវប្បធម៌ និងវិចិត្រសិល្បៈខេត្តសៀមរាប។

គួរបញ្ជាក់ថា លោក ហត កើ ឬឈ្មោះលើបណ្តាញសង្គម ថា កញ្ញាស្លឹកឈើ Fashion ជាអ្នកច្នៃម៉ូតសំលៀកបំពាក់ពីស្លឹកផ្ការុក្ខជាតិ និងគ្រូដើរបង្ហាញម៉ូត នៅខេត្តសៀមរាប។ លោកធ្លាប់បង្ហាត់បង្ហាញដល់សិស្សជាច្រើនជាអ្នកចង់ចេះដើរម៉ូត និងអ្នកចង់ចូលប្រកួតបវរកញ្ញាសម្រាប់យុវតីពេញវ័យ និងកុមារី។ ជាមួយគ្នានេះ លោកក៏ធ្លាប់ដឹកនាំកូនសិស្សថតរូបតាមប្រធានបទផ្សេងៗ រួមទាំងមានស្លៀកឈុតហែលទឹកផងដែរ ព្រមទាំងបង្ហោះលើបណ្ដាញសង្គមរបស់ខ្លួន៕