ហេតុអ្វីមិនគួរមោទនភាព និងប្រៀបធៀបវប្បធម៌ជាមួយប្រទេសដទៃ?

វប្បធម៌ គឺជាធាតុទាំងឡាយណាដែលទ្រទ្រង់នូវការសាបព្រោះ បណ្តុះពូជចេញនូវផ្លែផ្កា ឬការបណ្តុះបណ្តាល​ចំនេះវិជ្ជា​ប្រាជ្ញា​សារ​តី ទំនៀមទម្លាប់ សិល្បៈ វិទ្យាសាស្ត្រ អក្សរសាស្ត្រ​… ឱ្យបាន​លូតលាស់​រីកចម្រើន​។ វប្បធម៌ដូនតាខ្លួនល្អយ៉ាងណាក្ដី ក៏មិនគួរមោទនភាព និងប្រកាន់ប្រៀបប្រៀបជាមួយវប្បធម៌ប្រទេសដទៃដែរ។

បណ្ឌិត ញិល រដ្ឋា ប្រធានសមាគមអតីតនិស្សិតកម្ពុជាពីសូវៀត និងរុស្ស៊ី បានឱ្យ “កម្ពុជាថ្មី” ដឹងថា យើងអត់មានជម្រើស ហើយក៏មិនអាចវាយតម្លៃថា វប្បធម៌ ឬប្រពៃណីរបស់ប្រទេសផ្សេងអន់ ឬអាក្រក់ដែរ។ សម្រាប់យើងខ្លួនឯង យើងគិតថា របស់យើងល្អ។

បណ្ឌិត ញិល រដ្ឋា មានបញ្ជាក់ថា៖ “សម្រាប់ខ្ញុំ វប្បធម៌របស់ខ្មែរគឺស្រស់ស្អាតរួចទៅហើយ ហេតុអីយើងមិនឱ្យតម្លៃ? ក្នុងនាមយើងជាយុវជនកម្ពុជា គ្រាន់តែញញឹម ជឿជាក់លើអ្វីដែលខ្លួនឯងមាន ហើយប្រើប្រាស់វាជាប្រយោជន៍។ យើងមុនទៅប្រទេសណា ក៏ត្រូវរៀនវប្បធម៌ ប្រពៃណីប្រទេសហ្នឹង ដើម្បីចុះសម្រុងជាមួយគេ យើងមិនអាចទៅដល់ប្រើប្រពៃណីខ្មែរយើងទៅភ្លាមទេ បរទេសមកខ្មែរ ក៏រៀនពីខ្មែរដូចគ្នា”។

ប្រធានសមាគមពាណិជ្ជករកម្ពុជា រុស្ស៊ី ខាងលើ លើកឡើងថា យើងកុំមោទនភាព ឃើញបរទេសមួយចំនួនឱ្យតម្លៃយើងភ្លាមៗ យើងគិតថាខ្លួនឯងអស្ចារ្យគឺមិនមែនទេ ជួនកាលមានអីនៅពីក្រោយហ្នឹងក៏អាចថាបាន ហើយកុំមោទនភាពពេលបរទេស ពិសេសជនជាតិអឺរ៉ុបប្រើវិធីសាស្ត្រងាយៗ ព្រោះនៅបរទេស គេមានពិធីការខ្លាំងជាងគាត់នៅស្រុកខ្មែរទៀត ដែលយើងមិនបានដឹង។

បណ្ឌិត ញិល រដ្ឋា មានប្រសាសន៍បន្តថា៖ “អ៊ីចឹងក្នុងបរិបទសាកលភាវូបនីយកម្ម ត្រូវរៀន និងឈ្វេងយល់ពីគ្នា ប៉ុន្តែបើយើងកើតជាខ្មែរហើយ ត្រូវថែរក្សាវប្បធម៌ខ្មែរ បរទេសក៏ថែរក្សាវប្បធម៌គេ បើយើងមិនថែវប្បធម៌យើង តើឱ្យបរទេសណាថែជំនួសយើង? យើងត្រូវឈ្វេងយល់ពីជាតិសាសន៍ខ្លួនឯង ស្រលាញ់ទឹកដី ថែរក្សាអត្តសញ្ញាណយើងដែលបន្សល់ទុកពីដូនតាយើង តែកុំធ្វើឱ្យបែកបាក់ស្រទាប់យុវជន គឺកុំប្រកាន់ភាពត្រូវរៀងខ្លួន ហើយបែងចែកសូម្បីអ្នកស្រែ អ្នកក្រុង អ្នកមាន អ្នកក្រ”។

បណ្ឌិត ញិល រដ្ឋា បញ្ជាក់ថា អភិរក្សវប្បធម៌ជាតិត្រូវតែមាន ប៉ុន្តែមិនប្រាកដថា អ្វីដែលដូនតាយើងបង្កើតឡើងមកសុទ្ធតែល្អទេ ដែលយើងត្រូវរៀនឱ្យច្រើនដើម្បីពិចារណាថា តើអ្វីដែលល្អ អ្វីដែលមិនល្អ អ្វីគួរអភិវឌ្ឍបន្តទៀត។ ថែរក្សា តែមិនអភិរក្សរហូតដល់ជ្រុលនិយម ដែលបង្កបញ្ហា ខណៈយើងជាប្រទេសអាស្រ័យលើវិស័យទេសចរណ៍ ព្រោះនៅពេលយើងចង្អៀតចង្អល់ ឬប្រកាន់ខ្ជាប់ពេក ធ្វើឱ្យគេភ័យខ្លាច ជាពិសេសភ្ញៀវអន្តរជាតិដែលមកកម្ពុជា។ យើងថែរក្សា​ ពង្រឹង អនុវត្តផ្ដើមចេញពីខ្លួនយើង ពីគ្រួសារ ខណៈយុវជនរឹងមាំ គ្រួសាររឹងមាំ នោះសង្គមជាតិនឹងរឹងមាំដូចគ្នា៕

អត្ថបទ៖ ច័ន្ទ ​វីរៈ