ម៉ាឡេស៊ីប្រឈមហានិភ័យសន្តិសុខស្បៀងខ្ពស់ជាងមុន ដោយសារពឹងផ្អែកខ្លាំងលើការនាំចូល

ធនាគារ RHB Investment Bank Bhd បានលើកឡើងថា ម៉ាឡេស៊ីនៅតែប្រឈមមុខខ្ពស់ចំពោះអតិផរណាពិភពលោក និង​ហានិភ័យសន្តិសុខស្បៀងផ្សេងៗ ដោយសារតែការពឹងផ្អែកខ្លាំងលើការនាំចូល​ស្បៀងអាហារ ដែលទាមទារ​ឱ្យរដ្ឋាភិបាល​ធ្វើកំណែទម្រង់វិស័យស្បៀងអាហារ ដើម្បីផ្គត់ផ្គង់ខ្លួនឯងក្នុងរយៈពេលវែង។ ​​តាមការចុះផ្សាយសារព័ត៌មាន The Malaysian Reserve ថ្ងៃចន្ទនេះ។

ធនាគារ​បាន​និយាយថា ទោះបីជាឧស្សាហកម្មស្បៀងអាហារម៉ាឡេស៊ី​ បាន​កើនឡើង ៥,១ ភាគរយ ហើយទិន្នផលតម្លៃបន្ថែមរបស់វិស័យនេះ បាន​កើនឡើង ៤,២ ភាគរយ ក្នុងឆ្នាំ ២០២៥ ក្ដី ម៉ាឡេស៊ីនៅតែជាប្រទេសនាំចូលស្បៀងអាហារយ៉ាងច្រើន។

​​RHB បាននិយាយ​ក្នុងកំណត់ត្រាស្រាវជ្រាវរបស់ខ្លួនថា៖ «​ការនាំចូលអាហារកសិកម្ម បានកើនឡើង ១៤ ភាគរយ បើប្រៀបធៀបទៅនឹងការនាំចេញត្រឹមតែ ១១,៥ ភាគរយ ​ដែល​ភាគច្រើនរួមមានអង្ករ ស្រូវសាលី គ្រាប់ពូជ ជី និងគ្រឿងចក្រ»។

ការវិភាគរបស់ធនាគារ បានបង្ហាញថា ៧៣ ភាគរយ​ នៃដីកសិកម្មរបស់​ម៉ាឡេស៊ីត្រូវបាន​ប្រើសម្រាប់ដំណាំ​សម្រាប់ដូងប្រេង ខណៈពេលដែលមានតែ ១០ ភាគរយ ប៉ុណ្ណោះ ដែលត្រូវបានប្រើប្រាស់សម្រាប់ដំណាំជាអាហារ ​ទោះបីជាមុខទំនិញ​ទាំង២ បង្កើតបាន​ប្រាក់ចំណូលប្រហាក់ប្រហែលគ្នាក៏ដោយ។

RHB បាននិយាយថា ការពឹងផ្អែករបស់​ម៉ាឡេស៊ីលើស្បៀង​អាហារនាំចូល ធ្វើឱ្យ​ប្រទេសនេះ​ងាយរងគ្រោះទៅនឹងការប៉ះទង្គិចពីខាងក្រៅ ដោយលើកឡើងពីវិបត្តិហិរញ្ញវត្ថុពិភពលោកឆ្នាំ ២០០៧-២០០៨ ​និងការហាមឃាត់ការនាំចេញអង្កររបស់ឥណ្ឌាក្នុងឆ្នាំ ២០២៣ ជាឧទាហរណ៍អំពីរបៀបខ្សែច្រវ៉ាក់ផ្គត់ផ្គង់ទំនិញស្បៀងរងការរំខាន ដែលធ្វើឱ្យតម្លៃកើនឡើង។ ​

RHB បានផ្តល់អនុសាសន៍ឱ្យធ្វើកសិកម្មទ្រង់ទ្រាយធំ និងការដាំដុះដំណាំចម្រុះ ដើម្បីបង្កើនជីជាតិរបស់ដី និងបង្កើតឱកាសចំណូលបន្ថែមសម្រាប់​កសិករតូចតាច។ ធនាគារនិយាយយ៉ាងដូច្នេះថា ម៉ាឡេស៊ី «ត្រូវការការគាំទ្រពីរដ្ឋាភិបាលយ៉ាងសកម្មបន្ថែមទៀតតាមរយៈការឧបត្ថម្ភធនគោលដៅ ការអភិវឌ្ឍ​ហេដ្ឋារចនាសម្ព័ន្ធកសិដ្ឋាន និងសេវាប្រឹក្សាយោបល់លើវិស័យ រួមជាមួយនឹងការកំណត់តម្លៃ​ និងធានាស្ថិរភាព​ប្រាក់ចំណូលសម្រាប់កសិករ​»៕