​តម្លៃមាស ​បន្ត​កើន​ឡើង​បំបែក​កំណត់​ត្រាថ្មី​

តម្លៃហាងឆេងមាស​បានបន្តកើនឡើងខ្ពស់​ដល់ជាង ៥ ១០០ ​ដុល្លារ​ក្នុងមួយតម្លឹង ​នៅព្រឹកថ្ងៃព្រហស្បតិ៍នេះ​ ក្នុងប្រវត្តិសាស្ត្រមិនធ្លាប់មាន ​ដោយសារ​អត្រាការ​ប្រាក់ធនា​គារកណ្ដាល​របស់សហរដ្ឋអាមេរិក ​និងស្ថានភាព​ភូមិសាស្ត្រន​យោបាយ​ពិភព​លោក។

គិតត្រឹមម៉ោង ៩ ព្រឹកនេះ ​តម្លៃមាស​បានហក់ឡើងដល់ ​៥ ១០០ ​ដុល្លារ ​ក្នុងមួយតម្លឹង ដោយ​សារ​អាមេរិកត្រៀមកាត់បន្ថយអត្រាការប្រាក់ម្ដងទៀតនៅចុងឆ្នាំនេះ។

​លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities កត្តា​ដែល​រុញច្រានឱ្យតម្លៃហាងឆេងមាស​កើនឡើងខ្លាំង ​គឺពាក់ព័ន្ធជាមួយ​នឹងទំនុកចិត្ត ​ទាំងវិនិយោគិន ​និងធនាគារ ​ដែលគេមើលឃើញថា ​ប្រាក់ដុល្លារ ទោះបីជារក្សាអត្រាការប្រាក់ក៏ដោយ ​ឬក៏​ដំឡើង​អត្រាការប្រាក់ក៏ដោយ​គ្រាន់តែទប់​ក្នុងការ ការពារ​អត្រា​អតិ​ផរណា​កើនឡើងតែប៉ុណ្ណោះ​។

​អ្នកស្រី ហ៊ង រីណា ​អាជីវករលក់មាសផ្សារធំថ្មី ​បានឱ្យដឹងថា ​តម្លៃមាសបានកើនឡើងរាល់ថ្ងៃ ​ខណៈ​សកម្មភាពទិញ-លក់ស្ងប់ស្ងាត់ ​ដោយសារការបារម្ភរបស់អតិថិជន។​

អាជីវកររូបនេះ បាន​បញ្ជាក់ថា មានអតិថិជនមួយៗទិញដែរ ប៉ុន្តែទិញជាដុំមាសជាគីឡូ ខណៈគ្រឿង​មាស​លែង​មានជួញដូរហើយ៕

អត្ថបទ៖ ឡេង ដេត