កសិដ្ឋាន មូមូ ហ្វាម មានសមត្ថភាពផលិតទឹកដោះគោស្រស់ ២ ៥០០ លីត្រ ក្នុងមួយថ្ងៃ

កសិដ្ឋានចិញ្ចឹមគោយកទឹកដោះក្នុងស្រុកមួយ បច្ចុប្បន្នអាចមានសមត្ថភាពផលិតទឹកដោះគោស្រស់បានចំនួន ២ ៥០០លីត្រ ក្នុងមួយថ្ងៃ និងគ្រោងដាក់គោចំនួន ៣០០ ក្បាលបន្ថែមទៀត ដើ​ម្បីឆ្លើយតបនឹងតម្រូវការទីផ្សារ។

លោក យន់ សុផាត ជាម្ចាស់កសិដ្ឋានចិញ្ចឹមគោយកទឹកដោះ មូមូ ហ្វាម ប្រាប់ កម្ពុជាថ្មី ថា កសិដ្ឋានរបស់លោកនាពេលបច្ចុប្បន្ន អាចមានសមត្ថភាពផលិតទឹកដោះគោស្រស់បានចំនួន២៥០០លីត្រ ក្នុងមួយថ្ងៃ និងគ្រោងនាំគោចំនួន៣០០ក្បាលទៀត នាពេលខាងមុខនេះ។

លោក យន់ សុផាត បន្តថា ចំពោះទីផ្សារវិញ ទឹកដោះគោស្រស់ មូមូ  បច្ចុប្បន្ននេះ កាន់តែទទួលបានការគាំទ្រយ៉ាងខ្លាំងពីសំណាក់ប្រជាជនខ្មែរ ខណៈការផលិតរាល់ថ្ងៃស្ទើរតែដាក់ស្ដុក និងរកទឹកដោះគោជូនអតិថិជនសឹងតែពុំទាន់។

យ៉ាងណាមិញ ទោះបីជាការផលិតហាក់មានកំណើនជាងមុនបន្ដិច​ក៏ពិតមែន ប៉ុន្ដែការផលិតទឹកគោស្រស់នៅក្នុងស្រុកក៏នៅតែមិនទាន់អាចឆ្លើយតបទៅនឹងតម្រូវការទីផ្សារបាននៅឡើយ។

លោកយន់ សុផាត បញ្ជាក់ថា៖ «គ្រាន់តែនៅក្នុងរាជធានីភ្នំពេញមួយ តម្រូវការទឹកដោះគោស្រស់មិនក្រោមពី ៣ម៉ឺនលីត្រ ក្នុងមួយថ្ងៃ នោះទេ! កត្តាទាំងនេះហើយ ដែលនាំឱ្យយើងត្រូវពង្រីកការចិញ្ចឹម និងផលិតទឹកដោះគោស្រស់ ឱ្យបានក្នុងបរិមាណច្រើនជាងមុន»។

សម្រាប់ពេលបច្ចុប្បន្ន​ កសិដ្ឋាន មូមូ ហ្វាម រប​ស់លោក យន់ សុផាត មានគោសរុបចំនួន ៣០០ក្បាល និងមានគោដែលអាចផលិតទឹកដោះបានចំនួន ១៥០ក្បាល។ បច្ចុប្បន្នកសិដ្ឋានមានទីតាំងស្ថិតនៅ ខ្នោការ សង្កាត់បារុង ក្រុងអរិយក្សត្រ​ ខេត្តកណ្ដាល។

គួរជម្រាបដែរថា តាមរបាយការណ៍កាលពីឆ្នាំ ២០២៤ កសិដ្ឋានចិញ្ចឹមគោយកទឹកដោះក្នុងស្រុកមានចំនួន៤កសិដ្ឋាន និងមានគោយកទឹកដោះចំនួន ១.១៧៦ ក្បាល ដែលអាចផលិតទឹកដោះគោស្រស់ ជាង ១៣ ពាន់លីត្រក្នុងមួយថ្ងៃ ​ស្មើនឹងជាង ៥ លានលីត្រក្នុង១ ឆ្នាំ ឬ ១៧ ភាគរយ នៃតម្រូវការទឹកដោះគោ​ស្រស់ក្នុងស្រុកជាង ៣០ លានលីត្រ៕

អត្ថបទ ៖ សួស សិត