កសិដ្ឋានគិរីសួគ៌ មានសមត្ថភាពផលិតទឹកដោះគោស្រស់បានជិត ២ម៉ឺនលីត្រ ក្នុងមួយថ្ងៃ

កសិដ្ឋានចិញ្ចឹមគោយកទឹកដោះគិរីសួគ៌ ស្ថិតនៅភ្នំតាម៉ៅ ស្រុកបាទី ខេត្តតាកែវ បច្ចុប្បន្នមានសមត្ថភាពផលិតទឹកដោះគោស្រស់បានជិត ២ម៉ឺនលីត្រ ក្នុងមួយថ្ងៃ ខណៈកសិដ្ឋានគ្រោងដាក់គោ ២០០ក្បាល បន្ថែមទៀត ដើម្បីឆ្លើយតបទៅនឹងតម្រូវការទីផ្សារ។

លោក សៅ ណារ៉ុង នាយកប្រតិបត្តិស្ដីទី កសិដ្ឋានគិរីសួគ៌ នៃក្រុមហ៊ុន Khmer Fresh Milk ប្រាប់ កម្ពុជាថ្មី ថា បច្ចុប្បន្នកសិដ្ឋានគិរីសួគ៌អាចមានសមត្ថភាពផលិតទឹកដោះគោស្រស់ផ្គត់ផ្គង់ទីផ្សារបានប្រមាណ ១ម៉ឺន ៨ពាន់លីត្រ ក្នុងមួយថ្ងៃ។

លោកបន្តថា សម្រាប់ពេលបច្ចុប្បន្នកសិដ្ឋានគិរីសួគ៌ក៏មានគោសរុបចំនួន ១ពាន់ ១រយក្បាល និងមានគោដែលអាចផលិតទឹកដោះបានចំនួនជិត ៦០០ក្បាលផងដែរ។

យ៉ាងណាមិញ ទាក់ទងនឹងបរិមាណទឹកគោស្រស់ចំនួនប៉ុននេះ លោក សៅ ណារ៉ុង បញ្ជាក់ដែរថា បរិមាណផ្គត់ផ្គង់ទឹកដោះគោស្រស់ក្នុងស្រុកនៅតែមានកម្រិតទាបខ្លាំង ប្រសិនបើធៀបនឹងការនាំចូលពីក្រៅប្រទេស។

ទោះជាយ៉ាងណា នាយកប្រតិបត្តិស្ដីទីរូបនេះ បានឱ្យដឹងទៀតដែរថា នៅក្នុងខែកក្កដានេះ កសិដ្ឋានគិរីសួគ៌ក៏នឹងគ្រោងដាក់គោតាមផែនការបន្ថែមទៀត ចំនួនជាង ២០០ក្បាល ដើម្បីឆ្លើយតបទៅនឹងតម្រូវការទីផ្សារ។

កសិដ្ឋានចិញ្ចឹមគោយកទឹកដោះគិរីសួគ៌​បានបើកសម្ពោធជាផ្លូវការកាលពីថ្ងៃទី ​១១ ខែមេសា ឆ្នាំ ២០២៤ កន្លងទៅ ​ក្រោមវត្តមានសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

កសិដ្ឋាន​គិរីសួគ៌មានរោងចក្រកែច្នៃទឹកដោះគោ និងយ៉ាអួរ ប្រកបដោយបច្ចេកវិទ្យាខ្ពស់លើផ្ទៃដីចំនួន ៣០០ ហិកតា ស្ថិតនៅភ្នំតាម៉ៅ ស្រុកបាទី ខេត្តតាកែវ។

គួរបញ្ជាក់ថា បច្ចុប្បន្នកម្ពុជា មានកសិដ្ឋានផលិតគោយកទឹកដោះចំនួន ៤ គឺកសិដ្ឋានគិរីសួគ៌ កសិដ្ឋាន មូមូ​ ហ្វាម កសិដ្ឋានឧទ្យានជាតិឬស្សីត្រឹប និងកសិដ្ឋានអូម៉៕

អត្ថបទ ៖ សួស សិត