ត្រាំ និង ស៊ី ចាប់ផ្ដើមជំនួប​នៅកូរ៉េខាងត្បូង ដោយ​​បញ្ហាពាណិជ្ជកម្មស្ថិតក្នុងរបៀបវារៈសំខាន់

ប្រធានាធិបតីសហរដ្ឋអាមេរិក លោក ដូណាល់ ត្រាំ និងសមភាគីចិន លោក ស៊ី ជីនពីង បាន​ចាប់ដៃគ្នាចាប់ផ្ដើមជំនួបប្រជុំ​នៅទីក្រុងប៊ូសាន នៃប្រទេសកូរ៉េខាងត្បូង នាព្រឹកថ្ងៃព្រហស្បតិ៍នេះ ដោយ​សង្រ្គាម​ពាណិជ្ជកម្មរវាងមហាអំណាចទាំង២ស្ថិតនៅក្នុងរបៀបវារៈសំខាន់។ នេះបើតាមការចុះផ្សាយរបស់សារព័ត៌មាន​អន្តរជាតិផ្សេង​ៗ​ រួមទាំងរ៉យទ័រ។

បើតាមរ៉យទ័រ ការរឹតត្បឹតការនាំចេញរ៉ែកម្រ និងបន្ទះឈីប​បញ្ញាសិប្បនិម្មិត (AI) ដែល​ជាស្នូលមួយ​នៃបញ្ហា​ពាណិជ្ជកម្ម ស្ថិតនៅក្នុងចំណោម​ប្រធានបទសំខាន់ៗ ដែល​មេដឹកនាំទាំង២ នឹង​ពិភាក្សាចរចាគ្នា​។ ​សម្រាប់លោក ត្រាំ ការទិញសណ្ដែកសៀងអាមេរិក និងការដោះស្រាយបញ្ហា​លំហូរថ្នាំញៀនហ្វេនតានីល​ពីភាគីចិន​ ក៏ជាប្រធានបទធំៗផងដែរ។

លោក ត្រាំ និងលោក ស៊ី បាន​ជួបគ្នាដោយផ្ទាល់​ចុង​ក្រោយ​កាលពីលើកមុន ក្នុងអំឡុងកិច្ចប្រជុំនៃប្រទេស G20 ឆ្នាំ ២០១៩។ ពេលជួបលោក ស៊ី ជាថ្មីនៅព្រឹកថ្ងៃព្រហស្បតិ៍នេះ លោក ត្រាំ បាន​ថ្លែងយ៉ាងដូច្នេះថា៖ «វាជាកិត្តិយសដ៏អស្ចារ្យមួយដែល​ជួប​មិត្ត​របស់ខ្ញុំម្នាក់។ ខានជួបគ្នាយូរហើយ បើគិតទៅ»។ ​

ប្រធានាធិបតីអាមេរិកដដែល បន្តថា៖ «យើងបាន​ព្រមគ្នា​លើ​បញ្ហា​ជាច្រើនរួចហើយ ហើយយើងនឹងយល់ព្រមលើ​បញ្ហា​មួយចំនួនទៀតឥឡូវនេះ»។ លោកបាន​និយាយទៅកាន់លោក ស៊ី យ៉ាងដូច្នេះថា៖ «វាជាកិត្តិយសមួយដែល​អ្នកឈរ​នៅទីនេះជាមួយយើង សូមអរគុណច្រើន»​។ ​

​ថ្លែងពេល​​បើក​កិច្ចប្រជុំ លោក ស៊ី ឯណោះវិញ​បាន​ឱ្យដឹងថា លោក និង​ប្រធានាធិបតី ត្រាំ បានរក្សាទំនាក់ទំនងយ៉ាងជិតស្និទ្ធ រួមទាំងការសន្ទនាតាមទូរស័ព្ទចំនួន ៣ លើក ដើម្បីរក្សាទំនាក់ទំនង​ឱ្យ​មានស្ថិរភាព​។

លោក ស៊ី ថ្លែងយ៉ាងដូច្នេះថា៖ «​កាលពីប៉ុន្មានថ្ងៃមុន ក្រុមសេដ្ឋកិច្ច និងពាណិជ្ជកម្មរបស់យើងរៀងៗខ្លួន បានរៀបចំការពិគ្រោះយោបល់ជុំថ្មីមួយនៅទីក្រុងគូឡាឡាំពួរ (ម៉ាឡេស៊ី) ដោយឈានដល់ការឯកភាពគ្នាជាមូលដ្ឋានលើការដោះស្រាយកង្វល់ចម្បងបដិការ​នាពេលបច្ចុប្បន្ន ​ដោយសម្រេចបាន​នូវមូលដ្ឋានគ្រឹះចាំបាច់សម្រាប់កិច្ចប្រជុំរបស់យើងនៅថ្ងៃនេះ»។ ​

ប្រធានាធិបតីចិន​ ដដែល​បានបន្តយ៉ាងដូច្នេះថា៖ «ក្នុងនាមជាប្រទេសដែលមានសេដ្ឋកិច្ចធំជាងគេទាំង២របស់ពិភពលោក ការប៉ះទង្គិចគ្នាម្តងម្កាលក៏ជារឿងធម្មតាដែរ។ ​ពេលជួប​ព្យុះ និងបញ្ហាប្រឈមនានា លោកប្រធានាធិបតី ត្រាំ និងខ្ញុំ ក្នុងនាមជាអ្នកដឹកនាំ គួរតែដឹកនាំផ្លូវ និង​មើលពី​ស្ថានភាពទូទៅ ដោយធានាថាទំនាក់ទំនងចិន-សហរដ្ឋអាមេរិក បន្តទៅមុខជាលំដាប់»។

គួរគូសបញ្ជាក់ថា ជំនួប​លោក ត្រាំ និងលោក ស៊ី ត្រូវបាន​រៀបចំឡើងនៅក្នុងអាកាសយានដ្ឋាន Gimhae នៅទីក្រុងប៊ូសាន ប្រទេសកូរ៉េខាងត្បូង ដែល​កំពុងរៀបចំកិច្ចប្រជុំកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) នៅកូនក្រុង Gyeongju ដែលនៅមិនឆ្ងាយប៉ុន្មានពីប៊ូសាន។

មុនកិច្ចប្រជុំចាប់ផ្ដើម មេដឹកនាំទាំង ២ បាន​ចាប់ដៃគ្នានៅចំពោះមុខប្រព័ន្ធផ្សព្វផ្សាយ ហើយលោក ត្រាំ បាន​និយាយថា៖ «យើងនឹង​មាន​កិច្ចប្រជុំដ៏ជោគជ័យជាមួយ​គ្នា។ ប៉ុន្តែគាត់(ស៊ី)ជាអ្នកចរចាដ៏តឹងតែង។​ វាមិនស្រួលទេ»។

លោក ស៊ី ឯណោះវិញ បាន​និយាយនៅពេលបើកកិច្ចប្រជុំថា អាមេរិក និងចិន​គួរតែជាដៃគូ និងមិត្តភក្តិនឹង​គ្នា ហើយបន្តថា៖ «​លោកប្រធានាធិបតី (ត្រាំ) ខ្ញុំត្រៀមខ្លួនរួចជាស្រេចដើម្បីបន្តធ្វើការជាមួយលោក ​ក្នុងការ​កសាងមូលដ្ឋានគ្រឹះដ៏រឹងមាំសម្រាប់ទំនាក់ទំនងចិន-សហរដ្ឋអាមេរិក និងបង្កើតបរិយាកាសដ៏ល្អប្រសើរសម្រាប់ការអភិវឌ្ឍប្រទេសទាំង២»។

គួរគូសបញ្ជាក់ថា ការជួបគ្នាចុងក្រោយនេះ ធ្វើឡើងខណៈអាមេរិក និងចិន​​ បន្តជាប់ផុងក្នុងសង្រ្គាម​ពាណិជ្ជកម្ម​ ដែល​ផ្ទុះឡើងជាថ្មីក្រោយ​លោក ត្រាំ ឡើងកាន់អំណាច​អាណត្តិទី២ ដោយ​ប្រកាសពន្ធខ្ពស់លើប្រទេសទូទាំងពិភព​លោក រួមទាំងចិន។ ភាពតានតឹងបាន​ស្រាកស្រាន្តបន្តិចនៅពាក់កណ្ដាលខែឧសភា ក្រោយ​ភាគីទាំង២ សម្រេចបានកិច្ចព្រមព្រៀងបណ្ដោះអាសន្នលើការផ្អាកការអនុវត្តពន្ធខ្ពស់រយៈពេល ៩០ ថ្ងៃ ហើយបន្ត ៩០ ថ្ងៃទៀត ក្រោយ​ការព្រមព្រៀងចាស់ផុតកំណត់។

យ៉ាងណាមិញ ភាពតានតឹងផ្ទុះឡើងជាថ្មីម្ដងទៀតនៅប៉ុន្មានសប្ដាហ៍មុន ក្រោយ​ចិន​ប្រកាសការរឹត​ត្បឹត​ថ្មីលើការនាំចេញបច្ចេកវិទ្យារ៉ែកម្រ និងរ៉ែកម្រ ដែលចិន​រួមចំណែកពី ៧០-៩០ ភាគរយ លើខ្សែច្រវ៉ាក់ផ្គត់ផ្គង់។ ជាការឆ្លើយតប លោក ត្រាំ បាន​ប្រកាសពន្ធបន្ថែមថ្មី ១០០ ភាគរយ លើទំនិញ​​ចិន ខណៈជម្លោះពន្ធចាស់មិនទាន់ចប់គ្នាដាច់ស្រេច៕