មន្ត្រីជាន់ខ្ពស់​ជំរុញឱ្យពន្លឿនបញ្ចប់ឯកសារ​ចក្ខុវិស័យកម្ពុជា​ ឆ្នាំ២០៥០ ​ដើម្បីជាមូលដ្ឋាន​ក្នុង​ការ​អភិវឌ្ឍសេដ្ឋកិច្ច​

មន្ត្រីជាន់ខ្ពស់​នៃក្រសួងសេដ្ឋកិច្ច និងហិរញ្ញវត្ថុ​បាន​ជំរុញ​ឱ្យក្រុមការងារត្រូវបន្តសិក្សា និង​រៀបចំ​ឯកសារ​ចក្ខុវិស័យកម្ពុជា ឆ្នាំ ២០៥០ នេះ ឱ្យ​បាន​រួចរាល់​ក្នុងឆ្នាំ ២០២៥ នេះ​ដើម្បី​ត្រៀម​ខ្លួន​ និងរៀប​ចំមូលដ្ឋានគ្រឹះក្នុងការអភិវឌ្ឍឱ្យបានរឹងមាំសំដៅប្រែក្លាយកម្ពុជាទៅជាប្រទេសចំណូលខ្ពស់​ក្នុងឆ្នំា ២០៥០។

​នៅក្នុងកិច្ចប្រជុំពិភាក្សាស្វែងរកធាតុចូលលើសេចក្តីព្រាង «ចក្ខុវិស័យកម្ពុជាឆ្នាំ ២០៥០» និងឯកសារទស្សនាទាន «គោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ ២០២៦-២០៣៥» កាលពីថ្ងៃទី ១១ ខែវិច្ឆិកា លោកបណ្ឌិតសភាចារ្យ ហ៊ាន សាហ៊ីប ​រដ្ឋលេខាធិការ​ក្រសួងសេដ្ឋកិច្ច និងហិរញ្ញវត្ថុ និងជាអនុប្រធានប្រចាំការឧត្តមក្រុមប្រឹក្សាសេដ្ឋកិច្ចជាតិ បានលើក​ឡើងថា ឯកសារ «ចក្ខុវិស័យកម្ពុជាឆ្នាំ ២០៥០» នេះត្រូវបាន ឧត្តមក្រុមប្រឹក្សាសេដ្ឋកិច្ចជាតិ រៀបចំសេចក្ដីព្រាងឯកសារដំបូងនៅឆ្នាំ ២០១៨-២០១៩ ដោយបានពិគ្រោះយោបល់ជាមួយក្រសួង-ស្ថាប័ន រដ្ឋបាលថ្នាក់ក្រោមជាតិ ព្រមទាំងដៃគូអភិវឌ្ឍន៍ពាក់ព័ន្ធ។

​ប៉ុន្តែការរៀបចំឯកសារនេះត្រូវបានផ្អាកមួយរយៈ ដោយសារការរីករាលដាលនៃជំងឺកូវីដ-១៩, ស្ថានភាពសេដ្ឋកិច្ច សង្គម និង នយោបាយក្នុង និងក្រៅប្រទេស មានការប្រែប្រួលខ្លាំង ដូចជា ការរីករាលដាលនៃជំងឺកូវីដ-១៩ នៅបន្តជាបញ្ហាប្រឈម, សង្រ្គាមរុស្ស៊ី-អ៊ុយក្រែន, ជម្លោះ និងភាពតានតឹងនៅតំបន់មជ្ឈឹមបូព៌ា, ការប្រកួតប្រជែងដ៏ស្វិតស្វាញខាងផ្នែកពាណិជ្ជកម្មអន្តរជាតិជាដើម ដែលកត្តាទាំងនេះ អាចនឹងផ្តល់ផលប៉ះពាល់ដល់ការសម្រេចចក្ខុវិស័យកម្ពុជា។

​លោកបណ្ឌិតសភាចារ្យ​បានបន្តថា ក្នុងកាលៈទេសៈដែលស្ថានភាព និងនិន្នាការតំបន់ និងសកល ប្រឈមនឹងហានិភ័យខ្ពស់ ដែលប្រទេសនានាត្រូវខិតខំប្រឹងប្រែង ដើម្បីប្រឈមនឹងវិបត្តិផង និងចាប់យកកាលានុវត្តភាពផង, ឧត្តមក្រុមប្រឹក្សាសេដ្ឋកិច្ចជាតិ ត្រូវបន្តសិក្សា និងរៀបចំឯកសារ​ចក្ខុវិស័យកម្ពុជា ឆ្នាំ ២០៥០ នេះ ឱ្យបានរួចរាល់ក្នុងឆ្នាំ ២០២៥ នេះ ដើម្បីត្រៀមខ្លួន និងរៀបចំមូល​ដ្ឋានគ្រឹះក្នុងការអភិវឌ្ឍឱ្យបានរឹងមាំ ដើម្បីប្រែក្លាយកម្ពុជាទៅជាប្រទេស ចំណូលខ្ពស់ក្នុងឆ្នំា ២០៥០ ។

ជាមួយគ្នានេះ, លោកមបណ្ឌិតសភាចារ្យ បានស្នើអង្គប្រជុំផ្តល់ធាតុចូលទៅលើឯកសារ «ចក្ខុវិស័យកម្ពុជាឆ្នាំ ២០៥០» និង ឯកសារទស្សនាទាន «គោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ ២០២៦-២០៣៥» សំដៅកែលម្អសេចក្តីព្រាងឯកសារដ៏មានសារៈសំខាន់នេះ ឱ្យកាន់តែមានភាពគ្រប់ជ្រុងជ្រោយ និងល្អប្រសើរថែមទៀត មុននឹងស្នើសុំការសម្រេចរបស់រាជរដ្ឋាភិបាល។

អង្គប្រជុំ បានវាយតម្លៃខ្ពស់ចំពោះក្រុមការងារឧត្តមក្រុមប្រឹក្សាសេដ្ឋកិច្ចជាតិដែលបានរៀបចំឯកសារនេះឡើង ប្រកបដោយខ្លឹមសារ និងភាពគ្រប់ជ្រុងជ្រោយ ព្រមទាំងគាំទ្រយ៉ាងពេញទំហឹងចំពោះការសម្រេចឱ្យបាននូវចក្ខុវិស័យក្នុងឆ្នាំ ២០៥០ ដោយមិនមានការរាថយ ទោះស្ថិតក្នុងកាលៈទេសៈណាក៏ដោយ សំដៅធ្វើយ៉ាងណាឱ្យកម្ពុជាមានមូលដ្ឋានគ្រឹះ និងរនាំងរឹងមាំ សម្រាប់អ្នកជំនាន់ក្រោយ៕

អត្ថបទ៖ សំអឿន