ស៊ី ព្រម​ទិញ​អង្ករពីថៃ ៥០០ ០០០ តោន អំឡុងរាជដំណើរទស្សនកិច្ច​របស់​ស្ដេចថៃទៅចិន

ប្រធានាធិបតីចិន លោក ស៊ី ជីនពីង បានជម្រាប​ជូន​ព្រះមហាក្សត្រថៃ​​នៅថ្ងៃសុក្រនេះ អំពីការព្រមព្រៀងរបស់ចិន​លើ​ការ​ទិញអង្ករថៃចំនួន ៥០០ ០០០ ម៉ឺនតោន ដែល​ប្រទេស​ទាំង២​បា​នចរចាគ្នានាពេលកន្លងមក។ ​

តាមការចុះផ្សាយរបស់កាសែត Khaosod នាយករដ្ឋមន្រ្តីមន្រ្តីថៃលោក អានុទីន ឆានវីរៈគុន បាន​ឱ្យ​ដឹង​អំពីការណ៍នេះនៅរសៀលថ្ងៃសុក្រ ចំពេលដែល​​ព្រះមហាក្សត្រថៃ ព្រះបាទ​ វ៉ាជីរ៉ាឡុងកន និង អគ្គមហេសី ស៊ុតធីតា ​កំពុង​យាង​​បំពេញ​ព្រះរាជដំណើរ​ទស្សនកិច្ចទៅប្រទេសចិន​រយៈពេល​ ៥ថ្ងៃ​ ដោយ​រាប់ពីថ្ងៃ​ព្រហស្បតិ៍។

មែនទែនទៅ ការទិញ​អង្ករថៃ គឺជាផ្នែកមួយនៃការចរចាជាយូរមកហើយរវាងមន្រ្តីថៃ និងចិន ដែលជាទីផ្សារទិញអង្ករដ៏ធំលើពិភពលោក ចំពេលដែលការធ្លាក់ចុះតម្លៃអង្ករសកល កំពុងប៉ះពាល់ដល់ប្រជាកសិករនៅប្រទេសដាំស្រូវ​ធំៗ រួមទាំងថៃ។

ក្នុងអំឡុង​ជំនួបក្រៅកិច្ចប្រជុំំកំពូលកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) នៅកូរ៉េខាងត្បូងកាលពីចុងខែតុលា លោក អានុទីន បាន​អះអាងថា លោកបានរំឭកទៅកាន់់ប្រធានាធិបតីចិន លោក ស៊ី លើការទិញអង្ករ ៥០០ ០០ តោន។

ជុំវិញការទិញអង្ករដដែល គេមិនទាន់ឃើញព័ត៌មាន​ណាមួយ​ពីភាគីចិននៅឡើយ គិតត្រឹមរសៀលថ្ងៃសុក្រនេះ យ៉ាងណាមិញ​ វាជាប្រធានបទដែលគេរំពឹងរួចស្រាប់ហើយ សម្រាប់ព្រះរាជដំណើរទស្សនកិច្ចទៅចិន​របស់ ​ព្រះបាទ​ វ៉ាជីរ៉ាឡុងកន ​ដែលបង្កើតប្រវត្តិសាស្រ្តក្លាយ​ជាព្រះមហាក្សត្រថៃគ្រងរាជ​ដំបូងគេដែលបានយាងបំពេញទស្សនកិច្ចជាផ្លូវការនៅសាធារណរដ្ឋប្រជាមានិតចិន ដើម្បីពង្រឹងមិត្តភាព និងពង្រឹងទំនាក់ទំនងរវាងប្រទេសទាំង​២។ នេះបើតាម Khaosod។

តាមការចុះផ្សាយរបស់បណ្ដាញទូរទស្សន៍ BBC ព្រះរាជដំណើរទស្សនកិច្ចដដែល គឺតបតាមការអញ្ជើញរបស់​លោក ស៊ី ដើម្បីអបអរសាទរខួបលើកទី ៥០ នៃការបង្កើតទំនាក់ទំនងការទូតរវាង​ចិន និងថៃ។ ​គេជឿថា​ ចិនបានជំរុញឱ្យមានព្រះរាជដំណើរទស្សនកិច្ចនេះ អស់រយៈពេលជាច្រើនឆ្នាំមកហើយ៕