«មហោស្រពតន្ត្រីទេសចរណ៍អន្តរជាតិ កម្ពុជា-ចិន» ​នឹងរៀបចំនៅខេត្ត​សៀម​រាប នៅថ្ងៃទី ៦ ខែធ្នូ

ក្រសួងទេសចរណ៍ សហការជាមួយស្ថានទូតចិនប្រចាំកម្ពុជា នឹងរៀប​ចំព្រឹត្តិការណ៍ «មហោស្រពតន្ត្រីទេសចរណ៍អន្តរជាតិ កម្ពុជា-ចិន» អមដោយការបង្ហាញវប្បធម៌តន្ត្រីចម្រុះ កម្ពុជា​-ចិន នៅថ្ងៃទី៦ ខែធ្នូ ឆ្នាំ២០២៥ នៅខេត្តសៀមរាប ដោយមានការចូលរួមសម្តែងពីសិល្បករ សិល្បការិនីជាតិ និងសិល្បករ សិល្បការិនីមកពីប្រទេសចិន។​

​ព្រឹត្តិការណ៍នេះ រៀបចំឡើងក្នុងគោលបំណង លើកកម្ពស់វិស័យសិល្បៈកម្ពុជា ផ្លាស់ប្តូរវប្បធម៌ និងពង្រឹងចំណងមិត្តភាព កម្ពុជា-ចិន ឱ្យកាន់តែរឹងមាំ និងស្អិតរមួត និងជំរុញការផ្សព្វផ្សាយ​សក្តា​នុពល​ទេសចរណ៍ ដ៏សម្បូរបែបរបស់កម្ពុជា ជាពិសេសតំបន់សៀមរាបអង្គរ ឱ្យកាន់តែទូលំទូលាយ​ទៅ​កាន់​ទីផ្សារទេសចរចិន និងអន្តរជាតិ សំដៅទាក់ទាញទេសចរ និងវិនិយោគិនអន្តរជាតិឱ្យ​មក​ទស្សនា និងវិនិយោគនៅកម្ពុជាកាន់តែច្រើនថែមទៀត៕