ក្រុមហ៊ុនថៃប្ដូរយុទ្ធសាស្រ្តដាក់អក្សរខ្មែរលើការវេចខ្ចប់ ចំពេលការលក់នៅកម្ពុជាធ្លាក់ចុះ

កាសែតថៃ The Nation បាន​រាយការណ៍នៅថ្ងៃអង្គារនេះថា ក្រុមហ៊ុនថៃមួយចំនួនបាន​ផ្លាស់ប្ដូរយុទ្ធសាស្រ្តទីផ្សារ​ ដោយ​ដាក់អក្សរខ្មែរលើការវេចខ្ចប់ផលិតផលរបស់ខ្លួន​ ចំពេលដែល​ការលក់​នៅទីផ្សារកម្ពុជាធ្លាក់ចុះ ជុំវិញភាពតានតឹងព្រំដែន។

The Nation បាន​ស្រង់សម្ដីប្រភពម្នាក់ពីក្រុមហ៊ុនលក់ទំនិញចាំបាច់មួយ ដែលនិយាយជាអនាមិក ដោយមិនបានបញ្ជាក់ថា ក្រុមហ៊ុនថៃណាខ្លះ​បាន​ធ្វើដូច្នេះនោះទេ។ យ៉ាងណាមិញ កាសែតដដែលបានកត់សម្គាល់ថា វាគឺជា កិច្ចប្រឹងប្រែងសម្របខ្លួនដ៏សំខាន់ និងជាយុទ្ធសាស្រ្ត ដើម្បីផ្ដាច់ម៉ាកយីហោ​ផលិតផលថៃពីបញ្ហានយោបាយ ឬព្រំំដែនជាមួយកម្ពុជា។

ការរាយការណ៍ជុំវិញបញ្ហានេះ ធ្វើឡើងចំពេលដែលក្រុមហ៊ុនថៃធំៗនៅកម្ពុជា ដូចជា ក្រុមហ៊ុនភេសជ្ជៈ Carabao, ក្រុមហ៊ុនមី MAMA, និងក្រុមហ៊ុនផលិត និងចែកចាយទឹកផ្លែឈើ Malee ជាដើមនោះ បាន​រាយការណ៍ពីការធ្លាក់ចុះយ៉ាងគំហុកនៃប្រាក់ចំណូល ឬប្រាក់ចំណេញរបស់ខ្លួននៅត្រីមាសទី៣។ ​

នាយកប្រតិបត្តិក្រុមហ៊ុន Carabao Group លោក Sathien Sathientham បានឱ្យដឹងថា ការលក់ភេសជ្ជៈរបស់ខ្លួនលើទីផ្សារកម្ពុជាមានការធ្លាក់ចុះខ្លាំង ដែលបង្កការខាតបង់ «ជាច្រើនរយលានបាត» ដោយសារតែជម្លោះព្រំដែនកម្ពុជា-ថៃ។

គេមើលឃើញថា ថៃបានសម្រេចបិទព្រំដែនជាឯកតោភាគីនៅខែមិថុនា ដោយកាត់ផ្ដាច់គ្រប់ច្រកដឹកជញ្ជូនតាមព្រំដែនគោក​រវាងប្រទេសទាំង២មកទល់ពេលនេះ ដែលធ្វើឱ្យពាណិជ្ជកម្មតាមព្រំដែនគោកធ្លាក់ចុះទាំងស្រុង។ លើសពីនេះ កំណើននៃរលកពហិការទំនិញថៃ ក្នុងចំំណោមអ្នកប្រើប្រាស់កម្ពុជា បាន​ធ្វើឱ្យ​ស្ថានភាពកាន់តែអាក្រក់សម្រាប់អាជីវកម្ម​​ថៃ។ លោក Sathien បានបញ្ជាក់ពីបញ្ហានេះ ថាធ្វើឱ្យការលក់ Carabao ធ្លាក់ចុះខ្លាំង។

ក្នុងរបាយការណ៍កាលពីពេលថ្មីនេះ ក្រុមហ៊ុន Carabao បាន​ឱ្យដឹងថា ការលក់នៅទីផ្សារ CLMV (កម្ពុជា ឡាវ មីយ៉ាន់ម៉ា និងវៀតណាម) បាន​ធ្លាក់ចុះរហូតដល់ទៅ ៤៤% មកត្រឹម ៧២៧ លាន​បាត នៅត្រីមាសទី៣ ដែល​រួមចំណែកខ្លាំងដោយសារជម្លោះព្រំដែនកម្ពុជា-ថៃ។ ​

ចំណែកឯ លោក Pan Paniangvait នាយកប្រតិបត្តិក្រុមហ៊ុន Thai President Foods PCL ដែលជាក្រុមហ៊ុនផលិតមីកញ្ចប់ «MAMA»​ ឯណោះវិញ បានបញ្ជាក់ថា ប្រទេសកម្ពុជាគឺជាទីផ្សារនាំចេញដ៏សំខាន់មួយ ​ដោយរួមចំណែក ១៧-១៨% ​នៃការនាំចេញរបស់ក្រុមហ៊ុន​។ នៅត្រីមាសទី៣ ការលក់របស់ក្រុមហ៊ុនធ្លាក់ចុះរហូតដល់ទៅ ១២,១៧%។​

ស្ថានភាពក៏អាក្រក់ដូចគ្នា សម្រាប់​ក្រុមហ៊ុនផលិត និងចែកចាយទឹកផ្លែឈើ Malee។ នាយកប្រតិបត្តិរបស់ក្រុមហ៊ុននេះ លោក Ekarin Pinij បាន​លើកឡើងថា ការបិទព្រំដែនធ្វើឱ្យប៉ះពាល់ខ្លាំងដល់ការលក់នៅលើទីផ្សារកម្ពុជា​។ ​លោកបន្តថា ក្រុមហ៊ុនកំពុងធ្វើការយ៉ាងជិតស្និទ្ធជាមួយដៃគូចែកចាយ​នៅកម្ពុជា​លើ​ផែនការបន្ទាន់ ដោយរៀបចំស្តុកសម្រាប់ដាក់ទំនិញលក់ភ្លាមៗ នៅពេល​ស្ថានភាពប្រសើរឡើង។ ​ប្រាក់ចំណេញសុទ្ធរបស់ក្រុមហ៊ុនក្នុងរយៈពេល ៩ ខែដើមឆ្នាំ ២០២៥ ​បាន​ធ្លាក់ចុះរហូតដល់ទៅ ១៥,៨% មកត្រឹមប្រមាណ ២៣៩,៣ លាន​បាត។

សូម្បីតែទំនិញគ្រឿងសម្អាងថៃ ក៏រងផលប៉ះពាល់់ធ្ងន់ធ្ងរ​ផងដែរ។ មន្រ្តីពីក្រុមហ៊ុនចែកចាយគ្រឿងសម្អាងថៃ ​Karmarts បាន​និយាយថា ភាពតានតឹងព្រំដែនកម្ពុជា-ថៃ ធ្វើឱ្យការនាំចេញរបស់ខ្លួនប្រឈមមុខនឹង​ការលំបាកខ្លាំង ខណៈវាបណ្តាលឱ្យការលក់ធ្លាក់ចុះប្រហែល ៧-៨ លានបាត/ខែ ដោយរយៈពេល ៣ ខែចុងក្រោយនេះ បានបង្ហាញឱ្យឃើញថាពិបាកបំផុត។

កន្លងមក អាជីវកម្ម​ថៃបាន​ជំរុញឱ្យរដ្ឋាភិបាលរបស់ខ្លួនដោះស្រាយបញ្ហាជម្លោះជាមួយកម្ពុជាជាបន្ទាន់ ខណៈតួលេខពីរដ្ឋាភិបាលថៃបាន​បង្ហាញថា​ ថៃអាចខាតបង់សេដ្ឋកិច្ច ១០០ ប៊ីលាន​បាត ប្រសិន​បើ​ការបិទព្រំដែនបន្តអូសបន្លាយដល់ចុងឆ្នាំ ២០២៥៕