ព័ត៌មានអន្ដរជាតិ

ពាណិជ្ជកម្មព្រំដែនគោកថៃ-កម្ពុជា បន្តធ្លាក់ចុះ ៩៩,៩% នៅខែតុលា

បានផុស

៧ ខែ មុន

នៅ

ថ្ងៃព្រហស្បតិ៍ ២៧ វិច្ឆិកា ២០២៥

ដោយ

នាយកដ្ឋានពាណិជ្ជកម្មអន្តរជាតិថៃ (DIT) បានឱ្យដឹងថា ពាណិជ្ជកម្មឆ្លងព្រំដែនគោករវាងថៃ និងកម្ពុជា បានបន្តធ្លាក់ចុះ ៩៩,៩% នៅខែតុលា ដោយសារតែការបិទច្រកព្រំដែន ទោះបីទំហំពាណិជ្ជកម្មឆ្លងដែនសរុបរបស់ថៃបានកើនឡើង ៤,២% ដល់ ១៤៦,៦ ប៊ីលានបាតក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់កាសែត The Nation នៅថ្ងៃព្រហស្បតិ៍នេះ អគ្គនាយិកានៃនាយកដ្ឋានពាណិជ្ជកម្មអន្តរជាតិរបស់ក្រសួងពាណិជ្ជកម្មថៃ លោកស្រី អារ៉ាដា ហ្វួងតុង (Arada Fuangtong) បាននិយាយថា ពាណិជ្ជកម្មថៃ-កម្ពុជាតាមព្រំដែននៅតុលា មានប្រមាណ ៩ លានបាត ដែលស្មើនឹងការធ្លាក់ចុះ ៩៩,៩%។

ក្រៅពីនេះ ពាណិជ្ជកម្មឆ្លងដែនមីយ៉ាន់ម៉ា-ថៃ ក៏បានធ្លាក់ចុះប្រមាណ ១៦,៧% មកត្រឹមប្រមាណ ១៣,៩ ប៊ីលានបាត ផងដែរ ដោយសារតែការរឹតត្បឹតច្រកព្រំដែន។

ក្រសួងពាណិជ្ជកម្មថៃបាននិយាយថា ការធ្លាក់ចុះពាណិជ្ជកម្មព្រំដែនជាមួយកម្ពុជា និងមីយ៉ាន់ម៉ា ត្រូវការការកែសម្រួលគោលនយោបាយជាបន្ទាន់ ដើម្បីបន្ធូរបន្ថយការរឹតបន្តឹងពាណិជ្ជកម្ម។

គួររំឭកថា យោធាថៃបានសម្រេចចិត្តជាឯកតោភាគីលើការបិទព្រំដែនគោកជាមួយកម្ពុជាកាលពីខែមិថុនា ក្នុងបរិបទនៃភាពតានតឹងព្រំដែន។ ចាប់ពីពេលនោះមក ពាណិជ្ជកម្មរវាងប្រទេសទាំង២បានធ្លាក់ចុះជាគំហុក ខណៈក្រុមហ៊ុនថៃដែលត្រូវនាំចូលមកកម្ពុជា បានបង្វែរផ្លូវដឹកជញ្ជូនរបស់ខ្លួនទៅកាត់តាមឡាវ ឬផ្លូវទឹកវិញ៕