សេដ្ឋកិច្ច

កម្ពុជាចំណាយជាង ១ ពាន់លានដុល្លារ ក្នុងការនាំចូលប្រេង

បានផុស

៧ ខែ មុន

នៅ

ថ្ងៃសុក្រ ២៨ វិច្ឆិកា ២០២៥

ដោយ

កម្ពុជាបានចំណាយប្រាក់ជាង ១ ពាន់លានដុល្លារ លើការនាំចូលប្រេងឥន្ធនៈ និងប្រេងម៉ាស៊ូត ដើម្បីផ្គត់ផ្គង់ការប្រើប្រាស់ក្នុងស្រុកក្នុងរយៈពេល ១០ ខែ ឆ្នាំ ២០២៥ ធ្លាក់ចុះ ១១,២១ ភាគរយ បើធៀបនឹងរយៈពេលដូចគ្នាក្នុងឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទិន្នន័យពីក្រសួងពាណិជ្ជកម្ម តម្លៃនាំចូលប្រេងសរុបនោះ ការនាំចូលប្រេងម៉ាស៊ូតមានតម្លៃជាង ១,០៧៧ លានដុល្លារ ធ្លាក់ចុះ ១១,២១ ភាគរយ និងប្រេងសាំង មានតម្លៃ ៦៧៥ លានដុល្លារ ធ្លាក់ចុះ ១៥,៩៨ ភាគរយ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ប្រាប់កម្ពុជាថ្មីនៅថ្ងៃទី ២៨ ខែវិច្ឆិកា ឆ្នាំ ២០២៥ ថា ដើមឡើយយើងវាយតម្លៃលើប្រេងទៅលើកំណើនចរាចរសេដ្ឋកិច្ចក្នុងប្រទេស កំណើនប្រើប្រាស់ប្រេងមានន័យថា ដំណើរការដឹកជញ្ជូន សេដ្ឋកិច្ច ឬសេវាកម្ម វាដើរ ប៉ុន្តែឥឡូវ ដំណើរការសេដ្ឋកិច្ចពិបាកប៉ាន់ស្មានដោយសារប្រេងណាស់។

អ្នកឧកញ៉ា លឹម ហេង បន្ថែមថា ការនាំចូលប្រេងធ្លាក់ចុះ បណ្ដាលមកពីប្រជាពលរដ្ឋ និងរោងចក្រមួយចំនួន គាត់ប្រើអគ្គិសនីជំនួសដោយប្រេង ជាពិសេសគឺយានយន្ត ឥឡូវយើងឃើញហើយ វាច្រើនតែប្រើរថយន្តអគ្គិសនី ជំនួសដោយប្រេង។

អ្នកឧកញ៉ា លឹម ហេង យល់ឃើញថា៖ «វាមិនប៉ះពាល់ដល់កំណើនសេដ្ឋកិច្ចយើងទេ កំណើនសេដ្ឋកិច្ចយើងនៅតែកើនហើយថាមពលបៃតងមកជំនួស ថាមពលវារីអគ្គិសនីដែលកម្ពុជាកំពុងបង្កើនជាង ៦០% នៅទូទាំងប្រទេសទៅហើយ ដល់អញ្ចឹងការនាំចូលប្រេងនឹងថយចុះជាបណ្ដើរៗ»។

ប្រទេសកម្ពុជាមានគោលបំណងបង្កើនចំណែកថាមពលកកើតឡើងវិញរបស់ខ្លួនឱ្យបានយ៉ាងហោចណាស់ ៧០ ភាគរយ ត្រឹមឆ្នាំ ២០៣០ ដោយរួមចំណែកដល់គោលដៅបរិស្ថាន និងកំណើនសេដ្ឋកិច្ច ដោយផ្តោតលើប្រសិទ្ធភាពថាមពល។

លោក កែវ រតនៈ រដ្ឋមន្ត្រីក្រសួងរ៉ែ និងថាមពល មានប្រសាសន៍ថា ប្រភពដែលមិនប៉ះពាល់ដល់បរិស្ថានដូចជា ថាមពលសូឡា ខ្យល់ វារីអគ្គិសនី និងជីវម៉ាស នឹងរួមចំណែកយ៉ាងសំខាន់ដល់គោលដៅបរិស្ថាន និងសេដ្ឋកិច្ចរបស់ប្រទេស។

លោកបញ្ជាក់ថា៖ «នៅពេលដែលយើងផលិតអគ្គិសនីកាន់តែច្រើនពីប្រភពកកើតឡើងវិញ យើងមើលឃើញអត្ថប្រយោជន៍ពិតនៃថាមពលប្រកបដោយនិរន្តរភាព។ ការណ៍នេះរួមបញ្ចូលទាំងអគារបៃតង ឧបករណ៍ប្រើប្រាស់ យានជំនិះអគ្គិសនី និងអគ្គិសនីនៃឧស្សាហកម្ម និងកសិកម្មផងដែរ»។

ទោះយ៉ាងណា ក្រសួងរ៉ែ និងថាមពលបានព្យាករថា តម្រូវការប្រើប្រាស់ប្រេងឥន្ធនៈនៅកម្ពុជានឹងកើនឡើងដល់ ៤,៨លានតោនត្រឹមឆ្នាំ២០៣០ កើនឡើងពី ២,៨លានតោនកាលពីឆ្នាំ២០២០៕

អត្ថបទ៖ ឡេង ដេត