ចិនគ្រោងដាក់ពន្ធលើ​ស្រោមអនាម័យ ​ដើម្បីស្ដារអត្រាកំណើតដែលកំពុងធ្លាក់ចុះ

ប្រទេសចិននឹងដាក់ពន្ធ ១៣% លើស្រោមអនាម័យ និងថ្នាំពន្យារកំណើតផ្សេងៗទៀតចាប់ពីឆ្នាំក្រោយ ដោយបញ្ចប់គោលនយោបាយលើកលែងពន្ធរយៈពេល ៣ ទសវត្សរ៍ ខណៈ​ប្រទេស​នេះ​កំពុង​ប្រឈមមុខ​នឹងការធ្លាក់ចុះ​ចំនួនប្រជាជន​គួរឱ្យព្រួយបារម្ភ។

​សារព័ត៌មាន Bloomberg កាលពីពេលថ្មីៗនេះ បានរាយការណ៍កាលពីពេលថ្មីៗនេះថា ច្បាប់ពន្ធលើតម្លៃបន្ថែម (VAT) ដែលត្រូវបានកែសម្រួល បានចែងថា អ្នកប្រើប្រាស់ត្រូវតែបង់ VAT ១៣% លើផលិតផលពន្យារកំណើត ដែលទទួលបាន​ការលើកលែងពន្ធតាំងតែពីឆ្នាំ ១៩៩៣ មក។ ​

នៅឆ្នាំ ១៩៩៣ ​ចិនបានលុបចោលពន្ធ​លើផលិតផល​ពន្យារ​កំណើត ដើម្បីលើកកម្ពស់ផែនការគ្រួសារ និងអនុវត្តគោលនយោបាយកូន១​។

ការសម្រេចចិត្តដាក់ពន្ធ​ឡើងវិញនេះ គឺជាការផ្លាស់ប្តូរគោលនយោបាយដ៏សំខាន់មួយរបស់ទីក្រុងប៉េកាំង ​ចំពេលចិនកំពុងប្រឈមមុខនឹងវិបត្តិប្រជាសាស្ត្រកាន់តែធ្ងន់ធ្ងរឡើងៗ។ តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ចំនួនប្រជាជនចិន បានធ្លាក់ចុះជាលើកទី៣ជាប់ៗគ្នា ក្នុងឆ្នាំ ២០២៤ ដោយមានចំនួន​កំណើតត្រឹមតែ ៩,៥៤ លាននាក់ប៉ុណ្ណោះ។ រ៉យទ័របាន​ស្រង់​ទិន្នន័យពីការិយាល័យស្ថិតិជាតិ ​ដែលបង្ហាញថា ចំនួនប្រជាជនចិនបានធ្លាក់ចុះ ១,៣៩ លាននាក់ មកត្រឹម ១,៤០៨ ​ប៊ីលាននាក់ កាលពីឆ្នាំមុន ដោយធ្លាក់ចុះពី ១,៤០៩ ​ប៊ីលាននាក់ ក្នុងឆ្នាំ ២០២៣។

មែនទែនទៅ អត្រាកំណើតរបស់ប្រទេសចិន បានធ្លាក់ចុះអស់ជាច្រើនទសវត្សរ៍មកហើយ ដោយសារតែគោលនយោបាយកូន១ ​ចាប់ពីឆ្នាំ ១៩៨០ ដល់ឆ្នាំ ២០១៥ ក៏ដូចជា​កំណើនយ៉ាងឆាប់រហ័សនៃនគរូបនីយកម្ម​ និង​កំណើនតម្លៃនៃការរស់នៅ (ការចំណាយប្រចាំថ្ងៃសម្រាប់ការរស់នៅ)សម្រាប់ពលរដ្ឋ។

រួមជាមួយនឹងពន្ធថ្មីលើផលិតផលពន្យារកំណើត ច្បាប់អាករលើតម្លៃបន្ថែម (VAT) ថ្មី បានណែនាំការលើកទឹកចិត្តជាច្រើន ដែលមានគោលបំណងកាត់បន្ថយបន្ទុកហិរញ្ញវត្ថុលើគ្រួសារវ័យក្មេង​។ ក្នុងនោះ ចិននឹង​លើកលែងពន្ធចាប់ពីខែមករា ឆ្នាំ ២០២៦ សម្រាប់​ការចំណាយលើការថែទាំកុមារ​រហូតដល់ថ្នាក់មត្តេយ្យ ​ក៏ដូចជាការចូលរួមវិភាគទានដល់សេវាថែទាំមនុស្សចាស់ ការគាំទ្រដល់ជនពិការ និងសេវាទាក់ទងនឹងអាពាហ៍ពិពាហ៍ជាដើម។

កន្លងមក រដ្ឋាភិបាលកណ្តាលចិន​បានអនុវត្តវិធានការគាំទ្រ​ការមាន​កូនជាច្រើនរួចហើយ រួមទាំងការឧបត្ថម្ភជាសាច់ប្រាក់ ការពង្រីកសេវាថែទាំកុមារ និងការពន្យារពេលឈប់សម្រាកសម្រាប់ឪពុកម្តាយជាដើម៕