ថៃ​ទទួលស្គាល់ថា ការចរចាពាណិជ្ជកម្ម​ជាមួយ​អាមេរិក គ្មានវឌ្ឍនភាពទៅមុខ

រដ្ឋមន្ត្រីក្រសួងពាណិជ្ជកម្មថៃ លោកស្រី Suphajee Suthamphan បានទទួលស្គាល់ថា ការចរចាលើពន្ធពាណិជ្ជកម្ម​ជាមួយ​សហរដ្ឋអាមេរិក ​គ្មានវឌ្ឍនភាព​ទៅមុខទេ ដោយបញ្ជាក់ថា ​អាមេរិកមិនទាន់បានកែសម្រួលលក្ខខណ្ឌរបស់ខ្លួននៅឡើយ។ នេះបើតាមការចុះផ្សាយរបស់កាសែត Khaosod។

​លោកស្រី Suphajee បាន​និយាយកាលពីព្រឹកថ្ងៃអង្គារនេះថា ​​ការពិភាក្សាចុងក្រោយបានបង្ហាញថា បញ្ហានេះនឹងត្រូវបានដោះស្រាយ​ក្នុងកិច្ចពិភាក្សាកម្រិតបច្ចេកទេស ដូចដែលបានបង្ហាញដោយក្រសួងការបរទេសសហរដ្ឋអាមេរិក ​ដែលនេះគឺជារឿងដដែលៗ​។ ​លោកស្រីបានសង្កត់ធ្ងន់ថា ​គ្មាន​ការផ្លាស់ប្តូរណាមួយពីតំណាងពាណិជ្ជកម្មសហរដ្ឋអាមេរិកនោះទេ។

ខណៈមាន​ក្ដីបារម្ភថាសហរដ្ឋអាមេរិកអាចប្រើប្រាស់វិធានការពន្ធដើម្បីដាក់សម្ពាធឱ្យថៃឈប់បាញ់កម្ពុជា លោក​ស្រី ​Suphajee បាននិយាយថា អាមេរិកមិនបាន​លើកយកបញ្ហានេះមកនិយាយជាមួយថៃនោះទេ។

​គួររំឭកថា ក្នុងបទសម្ភាសន៍ជាមួយកាសែត The Wall Street Journal ដែល​ថត​ទុក​កាលពីថ្ងៃសុក្រសប្ដាហ៍មុន​​ លោក​ត្រាំ បាននិយាយថា លោកបានព្រមានរដ្ឋាភិបាលថៃ និងកម្ពុជាថា ការបន្តប្រយុទ្ធគ្នានឹងជំរុញ​ឲ្យ​អាមេរិកលុបចោលកិច្ចព្រមព្រៀងពាណិជ្ជកម្ម និងដំឡើង​ពន្ធគយជាការដាក់ទណ្ឌកម្ម។ លោកបានឱ្យដឹងយ៉ាងដូច្នេះថា បន្ទាប់ពី​ហៅទូរសព្ទជាមួយនាយករដ្ឋមន្ត្រីថៃ លោក អានុទីន ឆានវីរៈគុល និងនាយករដ្ឋមន្ត្រីកម្ពុជា សម្ដេច ហ៊ុន ម៉ាណែត។

លោក​ ត្រាំ បាន​អះអាង​នៅថ្ងៃសុក្រថា ភាគីទាំង ២ បាន​ព្រមព្រៀងគ្នាលើបទឈប់បាញ់់នៅថ្ងៃដដែល ប៉ុន្តែបន្ទាប់ពីនោះ ភាគីថៃនៅតែបន្តវាយប្រហារឈ្លានពានលើកម្ពុជា ដោយប្រើទាំងគ្រាប់ផ្លោង ទម្លាក់គ្រាប់បែក និងបាញ់កាំភ្លើង៕