សេដ្ឋកិច្ច

MISTI ជំរុញការចុះបញ្ជីកម្មសិទ្ធិឧស្សាហកម្ម ដើម្បីគាំទ្រនវានុវត្តន៍ និងឧស្សាហកម្ម ៤.០

បានផុស

៥ ខែ មុន

នៅ

ថ្ងៃពុធ ២៤ ធ្នូ ២០២៥

ដោយ

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅថ្ងៃទី២៣ ខែធ្នូ ឆ្នាំ២០២៥ បានរៀបចំសិក្ខាសាលាផ្សព្វផ្សាយស្តីពី «នីតិវិធីចុះបញ្ជីកម្មសិទ្ធិឧស្សាហកម្ម និងការប្រើប្រាស់ប្រព័ន្ធ E-Filing សម្រាប់ប្រកាសនីយបត្រតក្កកម្ម និងគំនូរឧស្សាហកម្ម» សំដៅជំរុញការចុះបញ្ជីកម្មសិទ្ធិឧស្សាហកម្ម ដើម្បីគាំទ្រនវានុវត្តន៍ និងឧស្សាហកម្ម ៤.០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងឱកាសនោះ លោក ភោគ សុវណ្ណរិទ្ធ រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងពីតួនាទីសំខាន់នៃប្រព័ន្ធកម្មសិទ្ធបញ្ញារបស់ជាតិ ក្នុងការលើកកម្ពស់ភាពប្រកួតប្រជែង និងនវានុវត្តន៍។

លោកបានលើកឡើងថា ការយល់ដឹងពីប្រព័ន្ធចុះបញ្ជីសិទ្ធបញ្ញាច្បាស់លាស់ សាមញ្ញ និងទំនើប គឺជាមូលដ្ឋានសម្រាប់ការច្នៃប្រឌិត ការបង្កើតផលិតផលថ្មីៗ និងការគាំទ្រអាជីវកម្មធុនតូច មធ្យម និងធំទាំងអស់។

លោក បានរំលេចពីការបន្តអនុវត្តកិច្ចសហប្រតិបត្តិការជាមួយអង្គការកម្មសិទ្ធិបញ្ញាពិភពលោក (WIPO) រួមទាំងការដាក់ឱ្យប្រើប្រាស់ប្រព័ន្ធស្វ័យប្រវត្តិកម្មកម្មសិទ្ធិបញ្ញាជំនាន់ទី៣ (IPAS3) និងការដាក់ឱ្យដំណើរការសេវាចុះបញ្ជីអនឡាញសម្រាប់ប្រកាសនីយបត្រតក្កកម្ម ម៉ូដែលមានអត្ថប្រយោជន៍ និងគំនូរឧស្សាហកម្ម ដែលប្រព័ន្ធឌីជីថលទាំងនេះត្រូវបានរៀបចំឡើង ដើម្បីកាត់បន្ថយពេលវេលា និងការចំណាយសម្រាប់អ្នកដាក់ពាក្យសុំ ព្រមទាំងបង្កើនតម្លាភាព និងប្រសិទ្ធភាព។

លោក ភោគ សុវណ្ណរិទ្ធ បានបន្ថែមថា «ប្រព័ន្ធកម្មសិទ្ធិបញ្ញាដែលមានប្រសិទ្ធភាព ទំនើប និងងាយស្រួលប្រើប្រាស់ គឺជាឫសគល់មួយដ៏សំខាន់ សម្រាប់ជំរុញការច្នៃប្រឌិតក្នុងស្រុក ទាក់ទាញការវិនិយោគពីបរទេស និងការពារលទ្ធផលនៃការស្រាវជ្រាវ និងអភិវឌ្ឍន៍»។

គួរគូសបញ្ជាក់ថា សិក្ខាសាលានេះមានការចូលរួមពីថ្នាក់ដឹកនាំ តំណាងស្ថាប័នពាក់ព័ន្ធ មន្ទីររាជធានី–ខេត្ត សាកលវិទ្យាល័យ សហគ្រាសធុនតូចនិងមធ្យម អ្នកជំនាញ និងសមាគមកម្មសិទ្ធិបញ្ញាកម្ពុជា ដើម្បីពង្រឹងការយល់ដឹងអំពីនីតិវិធី E-filing និងការការពារកម្មសិទ្ធិបញ្ញា ខណៈដែលកម្ពុជាកំពុងវិវត្តឆ្ពោះទៅរកសេដ្ឋកិច្ចផ្អែកលើចំណេះដឹង និងនវានុវត្តន៍ ស្របនឹងការអភិវឌ្ឍឧស្សាហកម្មជំនាន់ទី៤៕