IMF ព្យាករកំណើនសេដ្ឋកិច្ចសកល​ ៣,៣% សម្រាប់​ឆ្នាំ ២០២៦ ប៉ុន្តែព្រមានពីបញ្ហាប្រឈមផ្សេងៗ​

មូលនិធិរូបិយវត្ថុអន្តរជាតិ (IMF) បានបង្កើនការព្យាករកំណើនសេដ្ឋកិច្ចពិភពលោកនៅឆ្នាំ ២០២៦ នេះបន្តិច ដល់ ៣,៣% ដោយលើកឡើងពី​ភាពស្រាកស្រាន្តនៃសម្ពាធពន្ធគយរបស់សហរដ្ឋអាមេរិក និងការវិនិយោគដ៏រឹងមាំលើបញ្ញាសិប្បនិម្មិត (AI) ខណៈព្រមានពីហានិភ័យសំខាន់ៗផ្សេងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរបាយការណ៍ស្ដីពី​ទស្សនវិស័យសេដ្ឋកិច្ចពិភពលោកចុងក្រោយបំផុតរបស់ខ្លួន​ ដែលចេញផ្សាយ​កាលពីថ្ងៃចន្ទ IMF បាននិយាយថា​ សេដ្ឋកិច្ចពិភពលោកនៅឆ្នាំ ២០២៦ នឹងកើនឡើងដល់ ៣,៣% ដោយ​ខ្ពស់ជាងការព្យាករនៅខែតុលា ឆ្នាំមុន ០,២%។ ​​កំណើន​ឆ្នាំ ២០២៥ ក៏​រំពឹងស្ថិតនៅក្នុងអត្រា ៣,៣% ផងដែរ ខណៈកំណើនឆ្នាំ ២០២៧ រំពឹងថានឹង​ថយចុះបន្តិចមកត្រឹម ៣,២%។ ​

ប្រធានសេដ្ឋវិទូ IMF លោក Pierre-Olivier Gourinchas បាននិយាយថា សេដ្ឋកិច្ចពិភពលោកបានបង្ហាញពីភាពធន់ ទោះបីជាមានការរំខានផ្នែកពាណិជ្ជកម្មនៅឆ្នាំ ២០២៥ ក៏ដោយ។

លោក Gourinchas បានប្រាប់អ្នកយកព័ត៌មាន យ៉ាងដូច្នេះថា៖ «យើងឃើញថា កំណើនសេដ្ឋកិច្ចពិភពលោកនៅតែមានភាពធន់។ ដូច្នេះ ក្នុងន័យមួយ សេដ្ឋកិច្ចពិភពលោកស្ទុះងើបឡើងវិញ​ពីការរំខានផ្នែកពាណិជ្ជកម្ម និងពន្ធគយនៅឆ្នាំ ២០២៥​»។

​IMF​ បាននិយាយថា អាជីវកម្មនានាបានសម្របខ្លួនទៅនឹងពន្ធគយខ្ពស់របស់សហរដ្ឋអាមេរិក តាមរយៈការរៀបចំរចនាសម្ព័ន្ធខ្សែច្រវ៉ាក់ផ្គត់ផ្គង់ឡើងវិញ ខណៈ​កិច្ចព្រមព្រៀងពាណិជ្ជកម្ម និងការប្តូរទិសដៅនាំចេញរបស់ប្រទេសចិនទៅកាន់ទីផ្សារ​ក្រៅសហរដ្ឋអាមេរិក បានធ្វើឱ្យផលប៉ះពាល់ថយចុះ។ ​

សម្រាប់ប្រទេសមាន​សេដ្ឋកិច្ចជឿនលឿន ​IMF បាន​ព្យាករកំណើន ១,៨% នៅឆ្នាំនេះ និង ១,៧% នៅឆ្នាំក្រោយ។ ​ដោយឡែកប្រទេសមាន​ទីផ្សារកំពុងរីកចម្រើន និងសេដ្ឋកិច្ចកំពុងអភិវឌ្ឍន៍ រំពឹងថានឹងកើនឡើង ៤,២% នៅឆ្នាំ​នេះ និង ៤,១% នៅឆ្នាំ​ក្រោយ​។​

ជាលម្អិត IMF បានព្យាករ ២,៤% សម្រាប់កំណើនសេដ្ឋកិច្ចអាមេរិកនៅឆ្នាំនេះ ​ដែលជំរុញដោយការវិនិយោគយ៉ាងច្រើនលើហេដ្ឋារចនាសម្ព័ន្ធ AI ដូចជាមជ្ឈមណ្ឌលទិន្នន័យ បន្ទះឈីបទំនើប និងការផលិតថាមពល ខណៈព្យាករ ៤,៥% សម្រាប់ចិន ដែលជំរុញដោយការធូរស្រាលនៃបរិយាកាសពាណិជ្ជកម្មសកល និងគោលនយោបាយជំរុញក្នុងស្រុក ទោះបីជាអត្រានេះទាបជាងកំណើន ៥% នៅឆ្នាំ ២០២៥ ក្ដី។ ការវិនិយោគ AI ក៏បានគាំទ្រដល់កំណើន​ក្នុងតំបន់មួយចំនួននៃទ្វីបអឺរ៉ុប រួមទាំង​អេស្ប៉ាញ និងចក្រភពអង់គ្លេសផងដែរ។

ទោះជាយ៉ាងណាក៏ដោយ ​IMF បានព្រមានថា ការរីកចម្រើននៃ AI ក៏នាំមកនូវហានិភ័យផងដែរ។ លោក Gourinchas បាននិយាយថា ការវិនិយោគយ៉ាងឆាប់រហ័សលើវិស័យនេះ អាចជំរុញអតិផរណា ហើយ​ប្រសិនបើ AI មិន​ធ្វើឱ្យ​ផលិតភាពប្រសើរឡើងដូច​គេរំពឹងទុកទេ​ នោះវិនិយោគិនអាចបាត់បង់ទំនុកចិត្ត ហើយតម្លៃទ្រព្យសកម្ម ដូចជាភាគហ៊ុន អាចនឹងធ្លាក់ចុះ។ ការធ្លាក់ចុះនៃតម្លៃទីផ្សារនេះ អាចធ្វើឱ្យអ្នកប្រើប្រាស់ និងអាជីវកម្មចំណាយ និងវិនិយោគតិចជាងមុន ដែលនឹងធ្វើឱ្យកំណើនសេដ្ឋកិច្ចថយចុះ។

ក្រៅពីបញ្ហានេះ IMF ក៏បានគូសបញ្ជាក់ពីភាពតានតឹងភូមិសាស្ត្រនយោបាយ ការរំខានខ្សែច្រវ៉ាក់ផ្គត់ផ្គង់ និងការផ្ទុះឡើងជាថ្មីនៃជម្លោះពាណិជ្ជកម្ម​ ថាជាហានិភ័យអវិជ្ជមានធំៗផងដែរ។

ដោយឡែក អតិផរណាសកលរំពឹងថានឹងបន្តថយចុះ ដោយធ្លាក់ចុះពី ៤,១% ក្នុងឆ្នាំ ២០២៥ មកត្រឹម ៣,៨% ​ក្នុងឆ្នាំ ២០២៦ និង ៣,៤% ក្នុងឆ្នាំ ២០២៧​ ដែលផ្តល់ឱ្យបណ្ដាធនាគារកណ្តាលនូវឱកាសកាន់តែច្រើន ដើម្បីគាំទ្រកំណើនសេដ្ឋកិច្ចតាមរយៈគោលនយោបាយរូបិយវត្ថុ​ដែលសមស្រប៕