ព័ត៌មានអន្ដរជាតិ

IMF៖ ជម្លោះអ៊ីរ៉ង់អាចប៉ះពាល់ដល់កំណើនសេដ្ឋកិច្ចសកលតាមរយៈវិបត្តិថាមពល និងពាណិជ្ជកម្ម

បានផុស

៤ ខែ មុន

នៅ

ថ្ងៃពុធ ៤ មីនា ២០២៦

ដោយ

មូលនិធិរូបិយវត្ថុអន្តរជាតិ (IMF) បានលើកឡើងថា វាលឿនពេកក្នុងការវាយតម្លៃអំពីផលប៉ះពាល់សេដ្ឋកិច្ចកើតចេញពីជម្លោះរវាងសម្ព័ន្ធមិត្តអ៊ីស្រាអែល-សហរដ្ឋអាមេរិក និងអ៊ីរ៉ង់ ប៉ុន្តែបានព្រមានថា ការរំខានពាណិជ្ជកម្ម ការហក់ឡើងខ្ពស់នៃតម្លៃថាមពល និងការប្រែប្រួលទីផ្សារ ដែលអាចប៉ះពាល់ដល់កំណើនសេដ្ឋកិច្ចសកល កំពុងលេចចេញជារូបរាងរួចហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងបែបនេះ ធ្វើឡើងចំពេលដែលជម្លោះមជ្ឈិមបូព៌ាបន្តតានតឹងខ្លាំង ដោយធ្វើឱ្យប៉ះពាល់ដល់លំហូរពាណិជ្ជកម្មប្រេង និងឧស្ម័នធម្មជាតិពង្រាវកាត់តាមច្រកសមុទ្រហ័រមូហ្ស (Hormuz) ដ៏សំខាន់លើពិភពលោក។

ក្នុងសេចក្តីថ្លែងការណ៍ចេញផ្សាយនៅថ្ងៃទី ៣ ខែមីនា IMF បាននិយាយថា ខ្លួនកំពុងតាមដានយ៉ាងដិតដល់នូវការវិវត្តនៅមជ្ឈិមបូព៌ា ហើយបានសង្កេតឃើញពីការរំខានដល់សកម្មភាពពាណិជ្ជកម្ម និងសេដ្ឋកិច្ច កំណើនតម្លៃថាមពល និងបម្រែបម្រួលទីផ្សារហិរញ្ញវត្ថុ។ មូលនិធិនេះបានពិពណ៌នាអំពីស្ថានភាពនេះថា «មានការប្រែប្រួលខ្ពស់» ហើយខ្លួននឹងផ្តល់ការវាយតម្លៃគ្រប់ជ្រុងជ្រោយមួយ ក្នុងទស្សនវិស័យសេដ្ឋកិច្ចពិភពលោកខែមេសាខាងមុខ។

ថ្លែងក្នុងសន្និសីទអនាគតនៃហិរញ្ញវត្ថុរបស់វិទ្យាស្ថាន Milken នៅទីក្រុងវ៉ាស៊ីនតោន ថ្ងៃទី៣ មីនា លោក Dan Katz អនុប្រធានគ្រប់គ្រងទី១របស់ IMF បាននិយាយថា ផលប៉ះពាល់សកលនឹងអាស្រ័យលើរយៈពេលនៃការអូសបន្លាយរបស់ជម្លោះ វិសាលភាពនៃការខូចខាតដល់ហេដ្ឋារចនាសម្ព័ន្ធ និងឧស្សាហកម្ម និងថាតើកំណើនតម្លៃថាមពលមានរយៈពេលខ្លី ឬរ៉ាំរ៉ៃឬអត់។

លោក Katz បានព្រមានថា ភាពមិនប្រាកដប្រជាយូរអង្វែង និងការកើនឡើងជាបន្តបន្ទាប់នៃតម្លៃថាមពល អាចធ្វើឱ្យធនាគារកណ្តាលទូទាំងពិភពលោក មានការប្រុងប្រយ័ត្ន ជាពិសេសពាក់ព័ន្ធនឹងអស្ថិរភាពនៃអតិផរណា។

IMF បានព្យាករកំណើនសេដ្ឋកិច្ចសកល ៣,៣% នៅឆ្នាំ ២០២៦ នេះ ប៉ុន្តែមូលនិធិបានលើកឡើងពីភាពមិនប្រាកដប្រជាថ្មី នៅពេលដែលជម្លោះកាន់តែធ្ងន់ធ្ងរឡើងៗ។

អ្នកវិភាគ និងអ្នកធ្វើគោលនយោបាយកំពុងតាមដានពីស្ថានភាពច្រកសមុទ្រហ័រមូហ្ស ដែលជាផ្លូវដឹកជញ្ជូនដ៏សំខាន់សម្រាប់លំហូរថាមពលសកល។ ការរំខានលើច្រកនេះ អាចរីករាលដាលយ៉ាងឆាប់រហ័សទៅក្នុងបណ្តាញពាណិជ្ជកម្ម និងផលិតកម្ម។ ក្នុងទីផ្សារថាមពល ជម្លោះបានធ្វើឱ្យលក្ខខណ្ឌផ្គត់ផ្គង់កាន់តែតឹងតែង និងបង្កើនភាពមិនប្រាកដប្រជាជុំវិញការដឹកជញ្ជូន ធ្វើឱ្យតម្លៃប្រេងកើនឡើង។ ដោយសារតែវិបត្តិនេះ តម្លៃប្រេងអន្តរជាតិម៉ាក Brent បានហក់ឡើងលើស ៨០ ដុល្លារ/បារ៉ែល គិតត្រឹមថ្ងៃពុធ (៤ មីនា)៕