សេដ្ឋកិច្ចម៉ាឡេស៊ីកើន ៥,២% ឆ្នាំមុន ខ្ពស់បំផុតក្នុងរយៈពេល៣ឆ្នាំ

សេដ្ឋកិច្ចប្រទេសម៉ាឡេស៊ីបាន​កើនឡើងក្នុងអត្រាខ្ពស់បំផុតក្នុងរយៈពេល ៣ ឆ្នាំ កាលពីឆ្នាំ ២០២៥ ដោយ​លើសការរំពឹងទុក ដោយសារតែភាពរឹងមាំនៃតម្រូវការក្នុងស្រុក ការនាំចេញ និងការវិនិយោគ ​ហើយ​សន្ទុះបែបនេះរំពឹងនឹង​បន្តទៀតមកឆ្នាំនេះ។ នេះបើតាមការឱ្យដឹងរបស់ធនាគារកណ្ដាលម៉ាឡេស៊ី។ ​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យរបស់ធនាគារកណ្ដាលបង្ហាញថា ​សេដ្ឋកិច្ចម៉ាឡេស៊ីបាន​កើនឡើង ៥,២% នៅឆ្នាំ ២០២៥ ដោយ​លើសកំណើន ៥,១% នៅឆ្នាំ ២០២៤ និងការរំពឹងទុកចន្លោះ ៤-៤,៨%។ អត្រាកំណើននៅឆ្នាំមុន គឺខ្ពស់បំផុតរាប់តាំងពីឆ្នាំ ២០២២ ពោលគឺពេលដែលប្រទេសនេះកត់ត្រានូវកំណើន ៩%។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

សេដ្ឋកិច្ចម៉ាឡេស៊ី បានកើនឡើងដល់ទៅ ៦,៣% ត្រីមាសចុងឆ្នាំ ២០២៥ ​ដែលជាអត្រាខ្ពស់បំផុត​ក្នុងរយៈពេល ១២ ត្រីមាស ហើយក៏លើសពីការរំពឹងទុកផងដែរ។ ​

ធនាគារកណ្តាលម៉ាឡេស៊ី បាននិយាយថា ការចំណាយរបស់​ប្រជាជនរបស់ម៉ាឡេស៊ីនឹង​កើនឡើងដោយសារតែការងារ កំណើនប្រាក់ឈ្នួល និង​គោលនយោបាយរបស់រដ្ឋាភិបាលនៅឆ្នាំនេះ ខណៈ​សកម្មភាពវិនិយោគ និងការនាំចេញនឹងបន្ត​រឹងមាំ។ ​

លោក Abdul Rasheed Ghaffour ទេសាភិបាលធនាគារកណ្តាលម៉ាឡេស៊ី បាន​ថ្លែង​ក្នុងសេចក្តីថ្លែងការណ៍មួយថា៖ «សន្ទុះកំណើននេះ​រំពឹងថានឹងបន្តនៅឆ្នាំ ២០២៦​ ដោយមានការគាំទ្រពីតម្រូវការក្នុងស្រុក និងការនាំចេញដ៏រឹងមាំ»។

យ៉ាងណាមិញ ទាំង​រដ្ឋាភិបាល និងធនាគារកណ្តាលម៉ាឡេស៊ី រំពឹងថា សេដ្ឋកិច្ចនឹងកើនឡើងចន្លោះពី ៤-៤,៥% ​នៅឆ្នាំនេះ ចំពេលមានភាពមិនប្រាកដប្រជាអំពីផលប៉ះពាល់នៃពន្ធគយរបស់​អាមេរិក ខណៈម៉ាឡេស៊ី​រងពន្ធអាមេរិក ១៩%៕