ព័ត៌មានជាតិ

មួយឆ្នាំៗ ក្រុមហ៊ុន ម៉ុង ឫទ្ធី ចំណាយថវិកា ៤០ លានដុល្លារ ប្រមូលទិញផលកសិករមកផលិតជាចំណីសត្វ

បានផុស

៥ ខែ មុន

នៅ

ថ្ងៃចន្ទ ២៣ កុម្ភៈ ២០២៦

ដោយ

រោងចក្រផលិតចំណីសត្វរបស់ក្រុមហ៊ុន ម៉ុង ឫទ្ធី នៅស្រុកព្រៃនប់ ខេត្តព្រះសីហនុ បានចំណាយថវិកាប្រមាណ ៤០ លានដុល្លារ លើការប្រមូលទិញកសិផលរបស់កសិករដើម្បីផលិតចំណីសត្វផ្គត់ផ្គង់ទីផ្សារក្នុងស្រុក។ នេះបើតាមអ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី ថ្លែងប្រាប់អ្នកសារព័ត៌មានក្នុងដំណើរទស្សនកិច្ចតំបន់អភិវឌ្ឍកសិឧស្សាហកម្មរបស់ក្រុមហ៊ុន ម៉ុង ឫទ្ធី គ្រុបនៅស្រុកព្រៃនប់ ខេត្តព្រះសីហនុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកឧកញ៉ា ម៉ុង ឫទ្ធី បានថ្លែងថា បច្ចុប្បន្នរោងចក្រផលិតចំណីសត្វរបស់ក្រុមហ៊ុនមានសមត្ថភាពផលិតបាន ២២ ម៉ឺនតោនក្នុងមួយឆ្នាំ និងបង្កើនសមត្ថភាពដល់ ៣៥ ម៉ឺនតោននៅពេលដំណើរការពេញលេញ។

លោកថា តាមរយៈខ្សែសង្វាក់ផលិតកម្មរបស់រោងចក្រ ក្រុមហ៊ុនត្រូវការប្រមូលទិញផលពីកសិករមានដូចជាដំឡូងមី ពោត រាប់សិបលានតោនដើម្បីផ្គត់ផ្គង់ខ្សែសង្វាក់រោងចក្រ។

ពាក់ព័ន្ធការប្រមូលទិញផលកសិកម្ម អ្នកឧកញ៉ាបានគូសបញ្ជាក់ថា កសិករក៏អាចនាំយកមកលក់ដោយផ្ទាល់នៅរោងចក្រ ដើម្បីកុំឲ្យខាតបង់ថ្លៃកំមីស្យុង ឬការស៊ីពីលើពីឈ្មួយកណ្ដាល។

បើតាមអ្នកឧកញ៉ា ម៉ុង ឫទ្ធី តាមរយៈរោងចក្រផលិតចំណីសត្វរបស់ក្រុមហ៊ុន បានជួយកាត់បន្ថយការហូរចេញវត្ថុធាតុដើមក្នុងស្រុកទៅក្រៅប្រទេសនាំឲ្យខាតបង់ដល់តម្លៃសេដ្ឋកិច្ចជាតិ ខណៈដែលកន្លងមកលោកមើលឃើញថា កសិករតែងតែនាំចេញវត្ថុធាតុដើមទៅលក់ទៅក្រៅប្រទេសក្នុងតម្លៃថោក ហើយត្រឡប់មកវិញត្រូវទិញចំណីសត្វដែលកែច្នៃរួចក្នុងតម្លៃខ្ពស់គុណជាពីរគុណជាបីដែលនាំឲ្យខាតបង់ច្រើន៕