ព័ត៌មានអន្ដរជាតិ

តម្លៃប្រេងអន្តរជាតិហក់ឡើងកាន់តែខ្ពស់ ដល់ជាង ៩០ ដុល្លារ/បារ៉ែល

បានផុស

២ ខែ មុន

នៅ

ថ្ងៃសៅរ៍ ៧ មីនា ២០២៦

ដោយ

តម្លៃប្រេងអន្តរជាតិបានហក់ឡើងកាន់តែខ្ពស់ដល់ជាង ៩០ ដុល្លារ/បារ៉ែល ពេលបិទការជួញដូរកាលពីថ្ងៃសុក្រ ដែលជាថ្ងៃបិទការជួញដូរប្រចាំសប្ដាហ៍ ដោយសារតែជម្លោះរវាងអ៊ីស្រាអែល/សហរដ្ឋអាមេរិក និងអ៊ីរ៉ង់ ដែលបង្កកង្វល់ផ្នែកផ្គត់ផ្គង់ប្រេងទូទាំងសកល។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅនាពេលអនាគត ម៉ាក Brent បានកើនឡើង ៧,២៨ ដុល្លារ ឬ ៨,៥២% ដល់ ៩២,៦៩ ដុល្លារ/បារ៉ែល ខណៈតម្លៃប្រេងអាមេរិក ម៉ាក West Texas Intermediate crude (WTI) បានកើនឡើង ៩,៨៩ ដុល្លារ ឬ ១២,២១% ដល់ ៩០,៩០ ដុល្លារ/បារ៉ែល។

ក្នុងអត្រាប្រចាំសប្ដាហ៍ តម្លៃប្រេង WTI បានកើនឡើង ៣៥,៦៣% និងតម្លៃប្រេងម៉ាក Brent ២៧% ដែលជាកំណើនប្រចាំសប្ដាហ៍ដ៏ខ្ពស់បំផុតរាប់តាំងពីវិបត្តិកូវីដ១៩ក្នុងរដូវផ្ការីកឆ្នាំ ២០២០។

គេមើលឃើញថា តម្លៃប្រេង WTI កើនឡើងច្រើនជាងតម្លៃប្រេងម៉ាក Brent ២ថ្ងៃជាប់ៗគ្នាហើយ ចំពេលដែលក្រុមហ៊ុនចម្រាញ់ប្រេងនៅទូទាំងពិភពលោក ប្រញាប់ប្រញាល់ទិញប្រេងឆៅពីប្រភពផ្សេងៗ ដើម្បីជំនួសប្រេងដែលពួកគេមិនអាចនាំចូលពីមជ្ឈិមបូព៌ា ដោយសារតែការរំខានការផ្គត់ផ្គង់មជ្ឈិមបូព៌ា ក្រោយច្រកហ័រមូហ្ស ដែលរួមចំណែកប្រមាណ ២០% ដល់ការដឹកជញ្ជូនប្រេងសម្រាប់តម្រូវការប្រចាំថ្ងៃរបស់ពិភពលោក ត្រូវបានបិទខ្ទប់ដោយសារតែជម្លោះ។

ចំពេលដែលជម្លោះមិនទាន់បង្ហាញសញ្ញាស្រាកស្រាន្ត ហើយដំណឹកជញ្ជូនតាមច្រកហ័រមូហ្សបន្តជាប់គាំងដែលអាចអូសបន្លាយរយៈពេលយូរ អ្នកវិភាគទីផ្សារខ្លះបានព្យាករថា តម្លៃប្រេងអាចឡើងលើស ១០០ ដុល្លារ/បារ៉ែល ខណៈធនាគារវិនិយោគអាមេរិក JP Morgan រំពឹងថាវាអាចឡើងដល់ ១២០/បារ៉ែល ហើយមន្រ្តីថាមពលកាតា ថាអាចដល់ ១៥០ ដុល្លារ/បារ៉ែល ផងក៏ថាបាន៕