ព័ត៌មានអន្ដរជាតិ

ការហក់ឡើងភ្លាមៗនៃតម្លៃប្រេង បង្ករលកនៃផលប៉ះពាល់ទូទាំងអាស៊ាន

បានផុស

៤ ខែ មុន

នៅ

ថ្ងៃពុធ ១១ មីនា ២០២៦

ដោយ

វិបត្តិតម្លៃប្រេងដែលហក់ឡើងខ្ពស់ភ្លាមៗដោយសារតែជម្លោះមជ្ឈិមបូព៌ា កំពុងបង្ករលកនៃផលប៉ះពាល់ដែលរីករាលដាលពាសពេញអាស៊ីអាគ្នេយ៍ ដោយបង្កើនក្ដីព្រួយបារម្ភអំពីអតិផរណា និងថ្លៃថាមពលនៅទូទាំងតំបន់។ នេះបើតាមការចុះផ្សាយរបស់កាសែតសិង្ហបុរី The Business Times កាលពីថ្ងៃចន្ទ (៩ មីនា)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រលកនៃផលប៉ះពាល់ បានបង្ហាញឱ្យឃើញហើយថា ការហក់ឡើងនៃតម្លៃប្រេងបានបង្កើនថ្លៃដឹកជញ្ជូន និងផលិតកម្មអាហារនៅប្រទេសហ្វីលីពីន គំរាមកំហែងដល់តម្លៃអគ្គិសនីនៅថៃ បង្កើនការចំណាយសម្រាប់ឧបត្ថម្ភធននៅម៉ាឡេស៊ី និងឥណ្ឌូណេស៊ី និងជំរុញតម្លៃប្រេងសាំងនៅស្ថានីយចាក់សាំងនៅសិង្ហបុរី ឱ្យដល់កម្រិតខ្ពស់ក្នុងឆ្នាំ ២០២២ នៅពេលពិភពលោកប្រឈមនឹងវិបត្តិថាមពលកាលនោះ។

អ្នកវិភាគនៅក្រុមហ៊ុនសេវាកម្មហិរញ្ញវត្ថុ Nomura បានព្រមានថា តំបន់អាស៊ីអាគ្នេយ៍ប្រឈមនឹងវិបត្តិ Stagflation (ការជាប់គាំងនៃកំណើនសេដ្ឋកិច្ច ប៉ុន្តែអតិផរណាខ្ពស់) ហើយភាពធ្ងន់ធ្ងរគឺអាស្រ័យលើរយៈពេលនៃការរំខានពីជម្លោះមជ្ឈិមបូព៌ា។

Nomura បាននិយាយយ៉ាងដូច្នេះថា៖ «ប្រសិនបើវាបន្តទៅមុខ នោះក្រុមហ៊ុននានាអាចប្រឈមនឹងសម្ពាធប្រាក់ចំណេញខ្សោយ និងការកាត់បន្ថយផលិតកម្ម ហើយអ្នកប្រើប្រាស់អាចប្រឈមនឹងតម្លៃអាហារខ្ពស់ជាងមុន»។

ការហក់ឡើងនៃតម្លៃថាមពលនេះ កើតឡើងបន្ទាប់ពីការរំខានដល់ការផ្គត់ផ្គង់ប្រេងសកលពីជម្លោះអ៊ីស្រាអែល សហរដ្ឋអាមេរិក និងអ៊ីរ៉ង់ ដែលបង្កការរាំងស្ទះដល់ច្រកសមុទ្រហ័រមូហ្ស ដែលដឹកជញ្ជូនប្រេងប្រមាណ ២០% នៃតម្រូវការសកលប្រចាំថ្ងៃ។ អាស៊ី រួមទាំងអាស៊ីអាគ្នេយ៍ ពឹងផ្អែកខ្លាំងលើការនាំចូលប្រេង និងឧស្ម័នធម្មជាតិពង្រាវពីមជ្ឈិមបូព៌ា ដោយដឹកជញ្ជូនកាត់តាមច្រកហ័រមូហ្ស។

អ្នកវិភាគលើកឡើងថា ការពឹងផ្អែកបែបនេះ ធ្វើឱ្យអាស៊ីអាគ្នេយ៍ងាយរងគ្រោះទៅនឹងការហក់ឡើងភ្លាមៗនៃតម្លៃប្រេងសកល។ ពួកគេបន្តថា រដ្ឋាភិបាលក្នុងតំបន់អាចប្រឈមមុខនឹងការចំណាយកាន់តែច្រើនសម្រាប់ឧបត្ថម្ភធនប្រេងឥន្ធនៈ និងកំណើនសម្ពាធសារពើពន្ធ ប្រសិនបើតម្លៃថាមពលនៅតែខ្ពស់។

ថ្លៃប្រេងឥន្ធនៈខ្ពស់ ក៏នឹងជំរុញឱ្យការចំណាយប្រតិបត្តិការអាជីវកម្ម និងថ្លៃដឹកជញ្ជូនកើនឡើង ដែលអាចនាំឱ្យមានអតិផរណាកាន់តែទូលំទូលាយក្នុងតំបន់។

អ្នកសេដ្ឋកិច្ចព្រមានថា ការរំខានយូរអង្វែងចំពោះការផ្គត់ផ្គង់ប្រេងនៅមជ្ឈិមបូព៌ា អាចធ្វើឱ្យកំណើនសេដ្ឋកិច្ចនៅអាស៊ីអាគ្នេយ៍ថយចុះ និងបង្ហាញពីការពឹងផ្អែកជាបន្តបន្ទាប់របស់តំបន់ លើការនាំចូលប្រេងឥន្ធនៈហ្វូស៊ីល៕