សេដ្ឋកិច្ច

ផលិតកម្មអំបិលកម្ពុជា សម្រេចបានជាង ១៦ ម៉ឺនតោន នៅឆ្នាំ ២០២៤

បានផុស

៣ ខែ មុន

នៅ

ថ្ងៃអង្គារ ២៥ កុម្ភៈ ២០២៥

ដោយ

ផលិតកម្មអំបិលកម្ពុជាសម្រេចបានជាង ១៦ ម៉ឺនតោន (១៦៨ ៨៨២) នៅក្នុងឆ្នាំ ២០២៤ លើផ្ទៃដីស្រែអំបិលជិត ៤ ពាន់ហិកតា (៣ ៩៨៧) (កំពត ៣ ៤៨៩ហិកតា កែប ៤៩៧ហិកតា)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមរបាយការណ៍របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ចេញផ្សាយនៅថ្ងៃទី ២៥ ខែកុម្ភៈ ឆ្នាំ ២០២៥ នេះ បង្ហាញថា កម្ពុជាមានក្រុមផលិតអំបិលចំនួន ១៩១ ក្រុម ក្នុងនោះខេត្តកំពតផលិតបាន ១២៨ ៤៧៤ តោន ខេត្តកែប ផលិតបាន ៤០ ៤០៨ តោន។ ការលក់ចេញបានចំនួន ៧៤ ១៨៥ តោន។

លោក ប៊ុន ណារិន ប្រធានសមាគមផលិតអំបិលកម្ពុជា ប្រាប់កម្ពុជាថ្មីថា ផលិតកម្មអំបិលរដូវកាលថ្មី បានចាប់ផ្តើមតាំងពីខែតុលា ឆ្នាំ ២០២៤ មក ដែលគិតមកដល់ពេលបច្ចុប្បន្ននេះ គឺអាចប្រមូលផលបានខ្លះៗ សម្រាប់លក់នៅលើទីផ្សារ។

បើតាមលោក ប៊ុន ណារិន ប្រសិនបើអាកាសធាតុអំណោយផលល្អ លោករំពឹងថានឹងអាចផលិតអំបិលបានដល់ ១០ ម៉ឺនតោន នៅក្នុងឆ្នាំ ២០២៥។

លោក ប៊ុន ណារិន បញ្ជាក់ថា ទោះបីទិន្នផលកើនពិតមែន ប៉ុន្តែតម្លៃអំបិលបានធ្លាក់ចុះ បើធៀបនឹងឆ្នាំ ២០២៣ ដែលតម្លៃជាមធ្យមអាចលក់បាន ១ ម៉ឺន ៥ ពាន់រៀល ក្នុងមួយបាវ ៥០ គីឡូក្រាម ខណៈបច្ចុប្បន្នតម្លៃបានធ្លាក់ចុះមក ចន្លោះពី ៧ ពាន់រៀល ទៅ ១ ម៉ឺនរៀល ក្នុងមួយបាវ ៥០ គីឡូក្រាម។

ក្នុងមួយឆ្នាំៗ កម្ពុជាត្រូវការអំបិលចន្លោះពី ៧-១០ ម៉ឺនតោន ដើម្បីបំពេញតម្រូវការក្នុងស្រុក។ ក្រៅពីផលអំបិលក្នុងស្រុក បណ្តាខេត្តនៅជាប់ព្រំដែនថៃ និងវៀតណាម ក៏តែងនាំចូលអំបិលមកដាក់លក់ផងដែរ ប៉ុន្តែនៅឆ្នាំ ២០២៤ ពុំមានការនាំអំបិលចូលពីបរទេសនោះទេ។ នេះបើតាមក្រសួងឧស្សាហកម្ម៕

អត្ថបទ៖ ឡេង ដេត