ការផលិតអំបិលធម្មជាតិនឹងចាប់ផ្ដើមដំណើរផលិតអំបិលឡើងវិញនៅដើមខែមករានេះ

កសិករដែលជាអ្នកផលិតអំបិលធម្មជាតិ ស្ថិតនៅតំ​បន់ជាប់មាត់សមុទ្រ បានចាប់ផ្ដើមដំណើរការផលិតអំបិលសម្រាប់ផ្គត់ផ្គង់ទីផ្សារឡើងវិញ ខណៈពេលកន្លងមក ទិន្នផលអំបិលផលិតបានច្រើនគួរសម តែតម្លៃវិញមានការធ្លាក់ចុះជាខ្លាំង។

លោក ប៊ុន ណារិន ប្រធាន​សមាគម​ផលិត​អំបិល​កម្ពុជា ប្រាប់កម្ពុជាថ្មី ​នៅថ្ងៃទី២ ខែមករា ឆ្នាំ២០២៥ នេះថា កសិករដែលជាអ្នកផលិតអំបិលដែលស្ថិតនៅតំបន់ជាប់មាត់សមុទ្រ ក្នុងនោះមានដូចជា៖ ខេត្តកំពត និងកែប បានចាប់ផ្ដើមដំណើរការសង្វាក់ផលិតកម្មអំបិលធម្មជាតិឡើងវិញហើយ ខណៈដែរកន្លងផលអំបិលទទួលបានផលល្អគួរសម ចំណែកឯតម្លៃវិញមានការធ្លាក់ចុះ កត្តានេះហើយដែលនាំឱ្យកសិករមានការខាតបង់ជាខ្លាំងផងដែរ។

បើតាមលោក ប៊ុន ណារិន ដដែល កាលពីរដូវកាលមុន នៅចន្លោះខែវិច្ឆិកា និងខែធ្នូឆ្នាំ២០២៤ កន្លងទៅ ទិន្នផលអំបិលធម្មជាតិ មានការធ្លាក់ថ្លៃជាងខ្លាំង ក្នុងនោះតម្លៃអំបិល៥០គីឡូ លក់បានត្រឹមតែ ៨០០០រៀល​ ទៅ៨៥០០រៀល តែប៉ុណ្ណោះ។ នេះបើតាមការបញ្ជាក់របស់ប្រធានសមាគមផលិតអំបិលកម្ពុជា។

ប្រធានសមាគមរូបនេះ បានបញ្ជាក់ទៀតថា ទាក់ទងនឹងដំណើរការផលិតអំបិលនេះដែរ នៅតំបន់ខ្លះក៏នៅមិនទាន់អាចរៀបចំដី ដើម្បីបាច់បញ្ចូលទឹកក្នុងស្រែបាន ដោយសារតំបន់ទាំងនោះបានជួបប្រទះនឹងទឹកជោរ ដែលកើតឡើងអំពីបញ្ហាអាកាសធាតុ ដូចជា៖ ខ្យល់ព្យុះ​ និងភ្លៀងធ្លាក់ខ្លាំង កាលពីចុងខែធ្នូ ឆ្នាំ២០២៤ កន្លងទៅ។

លោក ប៊ុន ណារិន បានស្នើប្រជាពលរដ្ឋទាំងអស់មេត្តាជួយគាំទ្រផលិតអំបិលរបស់កសិករខ្មែរ ជាជាងអំបិលដែលនាំចូលពីប្រទេសជិតខាង ដើម្បីជួយដល់សេដ្ឋកិច្ចគ្រួសារកសិករខ្មែរ និងដើម្បីឱ្យពួកគាត់មានទឹកចិត្តក្នុងការផលិតអំបិលនេះតទៅទៀត។

គួរបញ្ជាក់ថា ទិន្នផលអំបិលកាលពីឆ្នាំ ២០២៤កន្លងទៅ សម្រេចបានជាង ១៣ ម៉ឺនតោន មានការកើន​ឡើងជាង​ឆ្នាំ​២០២៣ ដែលមានចំនួន ៨ ម៉ឺនតោន។

យោងតាមរបាយការណ៍​របស់​​​ក្រសួង​ឧស្សាហកម្ម ​វិទ្យាសាស្ត្រ​ ​បច្ចេកវិទ្យា​ ​និង​ន​វា​នុ​វត្ត​ន៍​បង្ហាញ​​ថា ផ្ទៃដីផលិតអំបិលនៅកម្ពុជាមានចំនួនជិត ៤ ពាន់ហិកតា (៣,៩៨៧.៣៥) ក្នុងនោះ​នៅ​ខេត្តកំពត ៣ ៤៨៩.៤៨ ហិកតា និងខេត្តកែប ៤៩៧.៨៧ ហិកតា។

​ក្នុង​មួយ​ឆ្នាំៗ​ កម្ពុជា​ត្រូវការ​អំបិល​ចន្លោះ​ពី​ ៧-១០​ ម៉ឺន​តោន ​ដើម្បី​បំពេញតម្រូវការ​​ក្នុងស្រុក​។ ក្រៅពី​ផល​អំបិល​ក្នុងស្រុក បណ្តា​ខេត្ត​នៅជាប់​ព្រំដែន​ថៃ និង​វៀតណាម ក៏​តែង​នាំចូល​អំបិល​មក​ដាក់លក់​ផងដែរ​៕

អត្ថបទ ៖ សួស​ សិត