អ្នកក្រុងបាងកក សម្រុកលក់មាស យកលុយ ខណៈតម្លៃហក់ឡើងខ្ពស់

អ្នកក្រុងបាងកកបានសម្រុកទៅលក់មាស យកលុយ ខណៈសង្រ្គាមដែលកំពុងបន្តនៅក្នុងប្រទេសអ៊ុយក្រែន បានធ្វើឲ្យតម្លៃមាសហក់ឡើងដល់កម្រិតខ្ពស់ថ្មីមួយទៀត។

យោងតាមរបាយការណ៍របស់សារព័ត៌មាន Thai PBS World, ជនជាតិថៃបានតម្រង់ជួរនៅខាងក្រៅហាងមាសមួយកន្លែងក្នុងទីក្រុងបាងកក ដើម្បីលក់មាស។ របាយ​ការណ៍​បញ្ជាក់​ថា គិត​ត្រឹម​ម៉ោង ១២ និង ៥៦ នាទី​ថ្ងៃត្រង់​ម្សិលមិញ តម្លៃ​មាសទិញ​ចូល ​បាន​ឡើង​ដល់ ៣១ ៨៥០ បាត (៩៦២ដុល្លារ) ចំណែកលក់ចេញ ៣១ ៩៥០ បាត (៩៦៥ដុល្លារ)។

យោងតាមសមាគមពាណិជ្ជករមាសបានឲ្យដឹងថា តម្លៃទិញមាសដែលកែច្នៃរួច បានកើនឡើងដល់ ៣១ ២៧៥.០៨ បាត (៩៤៤ដុល្លារ) ហើយតម្លៃលក់ចេញបានកើនឡើងដល់ ៣២ ៤៥០បាត (៩៨០ដុល្លារ)។ សមាគមនេះព្យាករណ៍ថា តម្លៃមាសនឹងកើនឡើងដល់ចន្លោះពី ៣២ ០០០ទៅ ៣៣ ០០០បាត ប្រសិនបើសង្រ្គាមរបស់រុស្ស៊ីនៅអ៊ុយក្រែននៅតែបន្ត។

តម្លៃត្រូវបានគេរំពឹងថានឹងនៅតែប្រែប្រួល ដោយអ្នកជំនាញទីផ្សារមាសជាច្រើននិយាយថា តម្លៃអាចធ្លាក់ចុះម្តងទៀតនៅពេលសង្រ្គាមបញ្ចប់។

Thai PBS World រាយការណ៍ថា ចន្លោះថ្ងៃទី២៨ខែកុម្ភៈដល់ថ្ងៃទី៥ខែមីនា តម្លៃមាសជាមធ្យមគឺពី២៩ ៣៥០ទៅ ៣០ ២៥០បាត៕

ប្រែសម្រួល៖ Vann Vann

ប្រភព៖ Thaiger

ចុចអាន៖ តម្លៃមាសនៅវៀតណាម ហក់ឡើងកប់ពពក ព្រោះឥទ្ធិពល សង្គ្រាមរុស្ស៊ី-អ៊ុយក្រែន