មួយខែមិថុនា CDC អនុម័តគម្រោងតម្លៃជាង ១០០លានដុល្លារ បានបង្កើតការងារជាង ១ម៉ឺនកន្លែង

ក្រុមប្រឹក្សាអភិវឌ្ឍន៍កម្ពុជា ដែលហៅកាត់ថា (CDC)បានឱ្យដឹងថា នៅក្នុងមិថុនា ឆ្នាំ២០២២ CDC បានអនុម័តគម្រោងវិនិយោគចំនួន១៤ គម្រោងដែលមានទុនវិនិយោគចំនួន១២៣លានដុល្លារអាមេរិក ដោយផ្តល់ឱកាសការងារជូនដល់ប្រជាពលរដ្ឋចំនួន ១១៥៧០នាក់។

ចំនួននេះ បើប្រៀបធៀបទៅនឹងខែ ឧសភាឆ្នាំ២០២២ កន្លងទៅ មានការថយចុះគួរឱ្យកត់សម្គាល់។ ពោលក្នុងខែឧសភាឆ្នាំ២០២២ CDC បានអនុម័តគម្រោងវិនិយោគចំនួន២០គម្រោងមានទុនវិនិយោគចំនួន១៩៨,១លានដុល្លារអាមេរិក ដោយបង្កើតឱកាសការងារជូនដល់ប្រជាពលរដ្ឋចំនួន១២៣៩៥កន្លែង។

ក្នុងចំណោមក្រុមចំនួន២០ក្រុមហ៊ុន ក្នុងនោះ មានគម្រោងបង្កើតរោងចក្រកាត់ដេរ និងសម្លៀកបំពាក់ រោងចក្រផលិតសំបកកំប៉ុង រោងចក្រដំឡើងរថយន្ត រោងចក្រកែច្នៃដើមឫស្សី រោងចក្រផលិតថង់ប្លាស្ទិករោងចក្រផលិតគ្រឿងសង្ហារិម រោងចក្រផលិតកាវ ថ្នាំលាប ទឹកថ្នាំ រោងចក្រផលិតក្តារប៉ាកេ និងក្តាបន្ទះ រោងចក្រផលិតកាបូប និងរោងចក្រផលិតស្បែកជើង៕ សំអឿន