ពន្ធដារ ប្រមូលចំណូលកើនឡើងជិត​៧០ភាគរយ ស្មើជាង ១៩០០លានដុល្លារ

គិតត្រឹមឆមាសទី១ ឆ្នាំ២០២២ អគ្គនាយកដ្ឋានពន្ធដារ ប្រមូលពន្ធ-អាករ បានចំនួន ៧៩៨០,៥៧ប៊ីលានរៀល  (ប្រមាណជា ១៩៧០,៥១ លានដុល្លារ) ដែលស្មើនឹង ៦៩,៨៩% នៃច្បាប់ផែនការហិរញ្ញវត្ថុប្រចាំឆ្នាំ។ នេះបើតាមការបញ្ជាក់របស់លោក គង់ វិបុល អគ្គនាយកដ្ឋានពន្ធដារ។

លោក គង់ វិបុល បានឱ្យដឹងថា ទិន្នន័យនេះ បើធៀបទៅនឹងចំណូល-ពន្ធអាកររយៈពេលដូចគ្នាក្នុងឆ្នាំ ២០២១ មានការកើនឡើងចំនួន ១៨៣៣,៥៩ ប៊ីលានរៀល (ប្រមាណជា ៤៥២,៧៤ លានដុល្លារ) ដែលស្មើ នឹង ២៩,៨៧%។

ក្នុងនោះ ចំណូលពីប្រភេទពន្ធសំខាន់ៗបានរក្សាកំណើន ធៀបនឹងរយៈពេលដូចគ្នាក្នុងឆ្នាំ ២០២១ ដោយក្នុងនោះ ពន្ធលើប្រាក់ចំណូល២៧,១៩% អាករលើតម្លៃបន្ថែម ៣៣,៣៧% ពន្ធលើប្រាក់បៀវត្ស ២៥,១៦% អាករពិសេស ៣៤,០១% ពន្ធប្រថាប់ត្រាលើការផ្ទេរកម្មសិទ្ធអចលនទ្រព្យ ៤៤,៣៨% និងពន្ធលើឈ្នួលផ្ទះ និងដី ១០,១២%។

គួរបញ្ជាក់ថា នៅឆមាសទី១ ឆ្នាំ២០២១ កន្លងទៅ អគ្គនាយកដ្ឋានពន្ធដារ ប្រមូលចំណូលបាន ៦១៣៩,៤១ប៊ីលានរៀល (ប្រមាណជា ១៥១៥,៩០ លានដុល្លារ) ដែលស្មើនឹង ៦៧,៥៨% នៃផែនការ ច្បាប់ហិរញ្ញវត្ថុប្រចាំឆ្នាំ ២០២១៕

នាង រតនៈ