ដៃគូអភិវឌ្ឍធំៗចំនួន ៧ ផ្តល់ហិរញ្ញប្បទាន​រាប់លានដុល្លារ​ក្នុងវិស័យអប់រំនៅកម្ពុជា

ក្នុងមួយឆ្នាំៗ រាជរដ្ឋាភិបាល បានចំណាយថវិកាជាច្រើន ក្នុងការអភិវឌ្ឍវិស័យអប់រំ នៅកម្ពុជា។ ជាក់ស្តែង ដើម្បីគាំទ្រដល់ការអនុវត្តផែនការយុទ្ធសាស្រ្តវិស័យអប់រំ ឆ្នាំ ២០១៩-២០២៣ និងយុទ្ធសាស្រ្តកំណែទម្រង់​ការគ្រប់គ្រងអប់រំ យុវជន និងកីឡា រាជរដ្ឋាភិបាល បានបង្កើនការចំណាយលើក្រសួងអប់រំជាបន្តបន្ទាប់។ ក្រៅពីថវិកាកកម្មវិធី ដែលជាបន្ទុករបស់រាជរដ្ឋាភិបាល ហិរញ្ញប្បទានដៃគូអភិវឌ្ឍធំៗ ចំនួន ៧ បាននិងកំពុង​ចូលរួមចំណែកផងដែរ។ ដោយក្នុងនោះរួមមាន៖

កម្មវិធីអភិវឌ្ឍន៍វិស័យអប់រំមធ្យមសិក្សាទុតិយភូមិ មានទំហំថវិកា ៤៥លានដុល្លារ( ១៥លានដុល្លារសម្រាប់កម្មវិធី និង ៣០លានដុល្លារសម្រាប់គម្រោង) គាំទ្រដោយធនាគារអភិវឌ្ឍន៍អាស៊ី និងមានរយៈពេលអនុវត្តពីឆ្នាំ ២០១៧ ដល់ ២០២១។ លើសពីនេះទៀត កម្មវិធីអភិវឌ្ឍន៍វិស័យអប់រំនៅមធ្យមសិក្សាទុតិយភូមិទី២ មានទំហំថវិកា ៥០លានដុល្លារ( កម្មវិធី ១៥លានដុល្លារ និងគម្រោង ៣៥លានដុល្លារ និងមានរយៈពេលអនុវត្តពីឆ្នាំ ២០១៨ ដល់  ២០២៤។

គម្រោងកែលម្អការអប់រំនៅមធ្យមសិក្សា មានទំហំថវិកា ៤០លានដុល្លារ គាំទ្រដោយធនាគារពិភពលោក និងមានរយៈពេលអនុវត្តពីឆ្នាំ ២០១៧ ដល់ ២០២២។

មូលនិធិភាពជាដៃគូអប់រំសកលទី៣ មានទំហំថវិកា ២០,៦លានដុល្លារ គាំទ្រដោយមូលនិធិភាពជាដៃគូអប់រំសកលទី៣ និងផ្តោតលើការអភិវឌ្ឍសមត្ថភាព និងកម្មវិធីអប់រំគ្រូបង្រៀន។

មូលនិធិភាពជាដៃគូសម្រាប់អភិវឌ្ឍសមត្ថភាពដំណាក់កាលទី៣ មានទំហំថវិកា ២៣,៣៨លានដុល្លារ មានរយៈពេលអនុវត្តពីឆ្នាំ ២០១៨ ដល់ ២០២១។

គម្រោងបង្កើតមូលដ្ឋានគ្រឹះដល់វិទ្យាស្ថានគរុកោសល្យ មានទំហំថវិកា ៣០លានដុល្លារ គាំទ្រដោអង្គការ JICA និងមានរយៈពេលពីឆ្នាំ ២០១៧ ដល់ ២០២២។

គម្រោងកែលម្អបរិស្ថានសាលារៀន និងការផ្គត់ផ្គង់សម្ភារៈបរិក្ខាអប់រំនៅកម្ពុជា មានទំហំថវិកា ៤០លានដុល្លារ គាំទ្រដោយប្រទេសចិន និងមានរយៈពេលអនុវត្តពីឆ្នាំ ២០១៦ ដល់ ២០១៨។

គម្រោងកែលម្អអប់រំនៅឧត្តមសិក្សា មានទំហំថវិកា ៩២,៥លានដុល្លារ គាំទ្រដោយធនាគារពិភពលោក និងមានរយៈពេលអនុវត្តពីឆ្នាំ ២០១៨ ដល់ ២០២៤។ នេះបើយោងតាមរបាយការណ៍របស់ក្រសួងអប់រំយុវជន និងកីឡា ផ្សព្វផ្សាយនៅក្នុងសន្និសីទ ស្តីពីសមិទ្ធផលសម្រេចបានរយៈពេល ៥ឆ្នាំ (២០១៨-២០២២) របស់ក្រសួងអប់រំ នៅព្រឹកថ្ងៃទី ១៦ ខែ សីហា ឆ្នាំ ២០២២៕