៧ខែឆ្នាំនេះ រថយន្តអគ្គិសនីនៅកម្ពុជា កើនឡើងប្រមាណ ១៥៥គ្រឿង

រដ្ឋមន្ត្រីក្រសួងសាធារណៈការនិងដឹកជញ្ជូន បានលើកឡើងថា “ត្រឹមរយៈពេល ៧ខែក្នុងឆ្នាំ ២០២២ រថយន្តអគ្គិសនី​មានការកើនឡើងប្រមាណ១៣០០ភាគរយនៅក្នុងប្រទេសកម្ពុជា”។

លោករដ្ឋមន្ត្រី ស៊ុន ចាន់ថុល ថ្លែងនៅក្នុងកិច្ចប្រជុំបូកសរុបការងារសុវត្ថិភាពចរាចរណ៍ផ្លូវគោក ប្រចាំឆមាសទី១ និងលើកទិសដៅការងារឆមាសទី២ ឆ្នាំ ២០២២ នៅថ្ងៃទី ១៨ សីហាថា ក្នុងឆ្នាំនេះ រថយន្តអគ្គិសនីចំនួន ១៥៥ គ្រឿងមានការចុះបញ្ជីប្រើប្រាស់នៅក្នុងប្រទេស ដែលចំនួននេះ មានការកើនឡើង ប្រមាណ ១៣០០ភាគរយ បើប្រៀបធៀបនឹងឆ្នាំ ២០២១ ក្នុងរយៈពេល ៧ខែដូចគ្នា ដែលមានឡានអគ្គិសនី ត្រឹមតែ ១១គ្រឿងប៉ុណ្ណោះ ស្មើនឹង ៨០០ ភាគរយ។

ជាមួយគ្នានេះ  ក្រសួងបានដាក់ឱ្យប្រើប្រាស់កន្លែងសាកថ្មរថយន្តអគ្គិសនី មាន៤ទីតាំង រួមមាន នៅក្នុងខេត្តព្រះសីហនុ សៀមរាប បាត់ដំបង និងរាជធានីភ្នំពេញ(នៅក្នុងក្រសួងសាធារណការ និងដឹកជញ្ជូន) ដែលជាជំនួយរបស់ UNDP។ បន្ថែមពីលើជំនួយនេះ ក្រសួងសារធារណការ និងដឹកជញ្ជូនក៏បានដាក់បន្ថែមចំនួន ៣គ្រឿងទៀត ដោយប្រើប្រាស់ថាម​ពល​ស្រូបយកមកពីពន្លឺព្រះអាទិត្យដោយផ្ទាល់។

លោក ស៊ុន ចាន់ថុល បានបញ្ជាក់ថា ក្រៅពីរថយន្តអគ្គិសនី UNDP បានផ្តល់ឱ្យម៉ូតូអគ្គិសនីចំនួន ៣០គ្រឿងទៀត ដើម្បីជាការលើកទឹកចិត្តដល់ប្រជាពលរដ្ឋចាប់អារម្មណ៍មកប្រើប្រាស់រថយន្តអគ្គិសនីកាន់តែច្រើនឡើង។

រដ្ឋមន្ត្រីក្រសួងសាធារណការ និងដឹកជញ្ជូន ក៏បានអំពាវនាវដល់ប្រជាពលរដ្ឋឱ្យប្រើប្រាស់រថយន្តអគ្គិសនី (EVs) ឱ្យបានកាន់តែច្រើនផងដែរ ព្រោះចំណេញការចំណាយច្រើន បើធៀបនឹងរថយន្តប្រើប្រាស់ប្រេង។

សូមបញ្ជាក់ថា ដើម្បីលើកទឹកចិត្តឱ្យមានកំណើននៃការប្រើប្រាស់ឡានអគ្គិសនីកាន់តែច្រើន រាជរដ្ឋាភិបាល បានកាត់បន្ថយពន្ធនាំចូលប្រមាណ ៥០ភាគរយ សម្រាប់ចំពោះការនាំចូលរថយន្តអគ្គិសនីឱ្យកាន់មកកាន់កម្ពុជា។

អត្ថបទ៖ នាង រតនៈ