ធនាគារជាតិផ្ដល់ការអនុគ្រោះចំពោះអ្នកខ្ចីប្រាក់ដែលរងផលប៉ះពាល់ជាក់ស្ដែងដោយទឹកជំនន់

ធនាគារជាតិ នៃកម្ពុជានៅថ្ងៃទី ១៨ ខែតុលានេះ បានប្រកាសអនុគ្រោះចំពោះអ្នកខ្ចីប្រាក់ដោយរងផលប៉ះពាល់ជាក់ស្ដែងដោយសារទឹកជំនន់ធ្ងន់ធ្ងរ។

សេចក្ដីជូនដំណឹងរបស់ធនាគារជាតិចេញផ្សាយនៅថ្ងៃទី ១៨ ខែតុលានេះ បញ្ជាក់ថា ធនាគារជាតិបានពិភាក្សាជាមួយសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ដោយចូលរួមការពារអតិថិជន និងបន្តការអនុគ្រោះតាមរយៈការរៀបចំឥណទានឡើងវិញតាមលក្ខខណ្ឌដូចជា៖

– ការកាត់បន្ថយចំនួនប្រាក់ដើមឥណទាន ឬចំនួនដែលត្រូវសងនូវឥណទានប្រតិទាន

– ការបន្ថយអត្រាការប្រាក់ទាបជាងលក្ខខណ្ឌនៃកិច្ចសន្យាដើម

– ការពន្យាពេលទូទាត់សងប្រាក់ដើម ឬការប្រាក់ ឬការធ្វើមូលធនកម្មការប្រាក់

– ការពន្យឥណទានប្រតិទាន

– ការបន្ថែម ឬការផ្លាស់ប្ដូរអ្នករួមខ្ចី ឬអ្នកធានាប្រសិនបើមាន

– ការផ្លាស់ប្ដូរពីឥណទានមានការទូទាត់សងតាមការបង់រំលស់ទៅជាការទូទាត់តែការប្រាក់ហើយទូទាត់សងប្រាក់ដើមទាំងអស់នៅឥណទានប្រតិទាន

– ការលើកលែង ឬបន្ថយទ្រព្យធានា

– ការបន្ថយលក្ខខណ្ឌកិច្ចសន្យា

ធនាគារជាតិបញ្ជាក់ថា ការផ្ដល់រយៈពេលអនុគ្រោះដោយគ្មានការទូទាត់សង ដែលអាចមានរយៈពេលរហូតដល់ ៦ ខែ គិតចាប់ពីថ្ងៃប្រសិទ្ធិភាពនៃកិច្ចសន្យាថ្មី។

ធនាគារជាតិបញ្ជាក់ថា ដើម្បីរួមចំណែកសម្រាលបន្ទុក និងស្ដារជីវភាពរបស់អ្នកខ្ចី គ្រឹះស្ថានគួរពិចារណាផ្ដល់ការអនុគ្រោះដូចជា ការបន្ធូរបន្ថយការប្រាក់ និងកម្រៃផ្សេងៗ ពាក់ព័ន្ធនឹងឥណទាន ឬលើកលែងការផាកពិន័យ និងចៀសវាងរឹបអូសទ្រព្យធានាររបស់អ្នកខ្ចីប្រាក់ជាដើម៕