ទំហំពាណិជ្ជកម្មកម្ពុជា និងអន្តរជាតិ សម្រេចបានថវិកាប្រមាណ ៥២,៤២ ប៊ីលានដុល្លារអាមេរិក ស្មើនឹងកំណើន ៩,១ភាគរយ បើធៀបនឹងទិន្នន័យឆ្នាំ២០២១។ ក្នុងនោះ ការនាំចេញមានចំនួន ២២,៤៨ ប៊ីលានដុល្លារអាមេរិក កើនឡើង ១៦ភាគរយ និងការនាំចូលមានចំនួន ២៩,៩៤ ប៊ីលានដុល្លារអាមេរិក មានការកើនទ្បើង ៤ភាគរយ។ នេះបើតាមរដ្ឋមន្រ្តីក្រសួងពាណិជ្ជកម្ម បញ្ជាក់នៅក្នុងពិធីបើកសន្និបាតបូកសរុបការងារ​ពាណិជ្ជកម្ម​ឆ្នាំ២០២២ និងទិសដៅអនុវត្តន៍ការងារពាណិជ្ជកម្មឆ្នាំ២០២៣ ដើម្បីពិនិត្យ និងវាយតម្លៃលើស​មិទ្ធផលការងារ​ដែលក្រសួងសម្រេចបាន ក្នុងរយៈពេលមួយឆ្នាំកន្លងទៅ ក៏ដូចជាពិភាក្សាពីបញ្ហាប្រឈមនានា និងលើកទិស​ដៅសម្រាប់ឆ្នាំបន្ទាប់ ស្របតាមកម្មវិធីនយោបាយ និងយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាល​នីតិកាលទី៦ នៃរដ្ឋសភា ក្នុងបុព្វហេតុចូលរួមអភិវឌ្ឍសេដ្ឋកិច្ច និងសង្គម។

លោក ប៉ាន សូរស័ក្តិ បានលើកឡើងថា សន្និបាតប្រចាំឆ្នាំនេះ ប្រព្រឹត្តទៅក្នុងរយៈពេល០២ថ្ងៃ គឺចាប់ថ្ងៃទី៣០-៣១ ខែមករា ឆ្នាំ២០២៣ ដើម្បីផ្តល់ឱកាសឱ្យមន្រ្តីរាជការក្រសួងពាណិជ្ជកម្ម និងស្ថាប័នពាក់ព័ន្ធចូលរួមពិភាក្សា​ផ្លាស់ប្តូរ​បទពិសោធន៍ ចែករំលែកចំណេះដឹង និងធាតុចូលនានាសម្រាប់រៀបចំទិសដៅការងារពាណិជ្ជកម្មឆ្នាំ២០២៣ ព្រមទាំងអាចទទួលយកនូវអនុសាសន៍ល្អៗ ដើម្បីយកទៅអនុវត្តភារកិច្ចរៀងៗខ្លួនឱ្យទទួលបានប្រសិទ្ធផល និងប្រសិទ្ធភាពខ្ពស់ដោយស្មារតីទទួលខុសត្រូវខ្ពស់ សំដៅធ្វើឱ្យក្រសួងអាចសម្រេចបាន​នូវជោគជ័យតាមទិសដៅ​ការងារដែលបានគ្រោងទុក។

លោករដ្ឋមន្រ្តី ក៏ស្វាគមន៍ចំពោះតំណាងរបស់ក្រសួង-ស្ថាប័នពាក់ព័ន្ធ និងវិស័យឯកជន ដើម្បីធ្វើបទអន្តរាគមន៍​អំពីបេសកកម្ម និងកិច្ចសហប្រតិបត្តិការរបស់ស្ថាប័ននីមួយៗមកលើការងារពាណិជ្ជកម្ម សំដៅរួមគ្នាអនុវត្តឱ្យបាន​ជោគជ័យលើគោលនយោបាយ និងភារកិច្ច ដែលរាជរដ្ឋាភិបាលបានប្រគល់ជូន៕