ពាណិជ្ជកម្មកម្ពុជា-អន្តរជាតិ សម្រេចបានជាង ៣ពាន់លានដុល្លារក្នុងខែមករា ធ្លាក់ចុះជិត ២៩ភាគរយ

ទំហំពាណិជ្ជកម្មរវាងកម្ពុជា-អន្តរជាតិ នៅក្នុងខែ មករា ឆ្នាំ២០២៣នេះ បានធ្លាក់ចុះប្រមាណជិត ២៩% បើធៀបនឹង​ឆ្នាំមុន ជាមួយនឹងទំហំទឹកប្រាក់សរុបជាង ៣ពាន់៤រយលានដុល្លារ ដោយឡែកឆ្នាំមុន មានទំហំជិត ៤ពាន់ ៩រយ​លានដុល្លារ។ នេះបើតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា។

បើតាមរបាយការណ៍ដដែល បានបង្ហាញថា ប្រទេសចិន ជាដៃគូពាណិជ្ជកម្មដ៏ធំជាងគេបំផុតរបស់កម្ពុជា ដោយមាន​ទំហំពាណិជ្ជកម្មសរុបជិត ១ពាន់លានដុល្លារ ធ្លាក់ចុះជាង ១៨ ភាគរយ។ រីឯអាមេរិក ឈរនៅចំណាត់ថ្នាក់ពី២ បន្ទាប់ពីប្រទេសចិន មានទំហំពាណិជ្ជកម្មសរុបជាមួយកម្ពុជាជិត ៦រយលានដុល្លារ ធ្លាក់ចុះ ២៣ភាគរយ បន្ទាប់ពីនេះ គឺប្រទេស វៀតណាម ថៃ ជប៉ុន និងឥណ្ឌូនេស៊ី គឺសុទ្ធតែមានការធ្លាក់ចុះផងដែរ។

ចំពោះមុខទំនិញ សំខាន់ៗ ដែលកម្ពុជានាំចេញទៅកាន់ទីផ្សារអន្តរជាតិរួមមាន ផលិតផលវាយនភណ្ឌកាត់​ដេរសម្លៀកបំពាក់ ស្បែកជើង និងផលិតផលធ្វើដំណើរ, ផលិតផលកសិកម្ម គ្រឿងអេឡិចត្រូនិក អគ្គិសនី និងផលិតផលកង់ជាដើម។

សូមបញ្ជាក់ថា ទំហំពាណិជ្ជកម្មកម្ពុជា និងអន្តរជាតិ កាលពីឆ្នាំ ២០២២ សម្រេចបានទឹកប្រាក់ ប្រមាណ៥២,៤២​ពាន់លានដុល្លារអាមេរិក ស្មើនឹងកំណើន៩,១ភាគរយ បើធៀបនឹងឆ្នាំ២០២១។ នេះបើតាមទិន្នន័យ​របស់ក្រសួង​ពាណិជ្ជកម្ម។

ក្រសួងពាណិជ្ជកម្ម បានប្តេជ្ញាចិត្តខ្ពស់ ក្នុងការជំរុញកំណើនវិស័យពាណិជ្ជកម្ម ដោយបានកែប្រែបញ្ហាប្រឈម​ទៅជា​ឱកាស តាមរយៈការធ្វើកំណែទម្រង់ស៊ីជម្រៅលើគ្រប់ផ្នែក ការកាត់បន្ថយចំណាយ និងការពង្រឹ​ងភាពប្រកួត​ប្រជែងនៃ ទំនិញនាំចេញរបស់កម្ពុជា ទៅកាន់ទីផ្សារអន្តរជាតិ និងដោយបង្កលក្ខណៈងាយស្រួល និងបង្កើតបរិយាកាសអំណោយ​ផលដល់ការធ្វើធុរកិច្ច និងការវិនិយោគនៅក្នុងប្រទេសកម្ពុជា៕