រោងចក្រ​ផលិតប្រព័ន្ធខ្សែភ្លើងសម្រាប់​រថយន្ត​ នឹង​លេច​រូបរាង​នៅ​ប៉ោយប៉ែត

ក្រុមហ៊ុន Toyota Tsusho Corporation ដែលកំពុងវិនិយោគនៅក្នុងតំបន់សេដ្ឋកិច្ចពិសេសសានកូ ប៉ោយប៉ែតនឹងបង្កើតគម្រោងវិនិយោគផលិតប្រព័ន្ធខ្សែភ្លើងសម្រាប់រថយន្តនៅចុងឆ្នាំ២០២៣នេះ ដែលអាចផ្តល់ឱកាសការងារជូនប្រជាពលរដ្ឋប្រមាណ ៨០០ នាក់។

គម្រោងវិនិយោគថ្មីនេះត្រូវបានលើកឡើងកាលពីពេលថ្មីៗនេះ នៅក្នុងជំនួបពិភាក្សាការងាររវាងលោក ជា វុទ្ធី អគ្គលេខាធិការរងគណៈកម្មាធិការវិនិយោគកម្ពុជា និងជាគណៈកម្មាធិការតំបន់សេដ្ឋកិច្ចពិសេសកម្ពុជាជាមួយក្រុមហ៊ុន Toyota Tsusho Corporation។

លោក ជា វុទ្ធី បានមានប្រសាសន៍ថា ក្រុមហ៊ុន Toyota Tsusho Corporation មានប្រតិបត្តិការវិនិយោគនៅក្នុងតំបន់សេដ្ឋកិច្ចពិសេស សានកូ ប៉ោយប៉ែត ចាប់តាំងពីឆ្នាំ ២០១៦ និងបាន​កំពុងពង្រីកសកម្មភាពវិនិយោគរបស់ខ្លួនជាបន្តបន្ទាប់ ដែលក្នុងនោះនឹងបង្កើតគម្រោងវិនិយោគថ្មីមួយទៀត ក្នុងតំបន់សេដ្ឋកិច្ចពិសេស សានកូ ប៉ោយប៉ែត លើការ​ផលិតប្រព័ន្ធខ្សែភ្លើងសម្រាប់រថយន្ត។

លោកបានបន្តថា គម្រោងវិនិយោគថ្មីនេះគ្រោងចាប់ផ្តើមដំណើរការនៅខែឆ្នូ ឆ្នាំ២០២៣ ខាងមុខ និងអាចស្រូបយកកម្លាំង​ពលកម្មប្រមាណ ៨០០ កន្លែងបន្ថែមទៀត ខណៈបច្ចុប្បន្នកម្មករនិយោជិតកម្ពុជាមួយចំនួនកំពុងទទួលការបណ្តុះបណ្តាលនៅប្រទេសថៃ។

ខេត្តបន្ទាយមានជ័យមានតំបន់សេដ្ឋកិច្ចពិសេសចំនួន ៤ កន្លែង រួមមានតំបន់សេដ្ឋកិច្ចពិសេសអូរនាង តំបន់សេដ្ឋកិច្ចពិសេសសានកូ តំបន់សេដ្ឋកិច្ចពិសេសប៉ោយប៉ែតភីភី និងសួនឧស្សាហម្ម ស៊ីសុផុន អ៉ិនដាសស្រ្ទៀលផាក ដោយមាន​រោងចក្​រចំនួន​ជាង ២០ កំពុងដំណើរការដោយប្រើប្រាស់កម្មករជាង ១ ម៉ឺននាក់៕

អត្ថបទ៖ សំអឿន