សេដ្ឋកិច្ច ចិន កាន់តែមានសម្ពាធ ស្របពេលក្រុមហ៊ុនអចលនទ្រព្យ​ដ៏ធំមួយទៀត​ ជួបប្រទះបញ្ហា

ក្រុមហ៊ុនអភិវឌ្ឍន៍អចលនទ្រព្យដ៏​ធំមួយទៀតរបស់ចិនគឺ Country Garden កំពុងបង្កក្តីព្រួយបារម្ភដល់សេដ្ឋកិច្ចចិន ជាពិសេសវិនិយោគិនជាច្រើននាក់ក៏មានការភ័យ​ខ្លាចផងដែរ បន្ទាប់ពីក្រុមហ៊ុននេះបានអាក់ខានទូទាត់បំណុលសំខាន់ៗ ហើយការលក់របស់ក្រុមហ៊ុនក្រោមកិច្ចសន្យា បានធ្លាក់ចុះជិតមួយភាគបីក្នុងរយៈពេល ៦ ខែដំបូងនៃឆ្នាំនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Country Garden គឺជាក្រុមហ៊ុនអភិវឌ្ឍន៍ដ៏ធំបំផុតតាមរយៈការលក់អចលនទ្រព្យ ។ កាល​ពីថ្ងៃទី១ ខែសីហា ក្រុមហ៊ុនបានលុបចោលផែនការដើម្បីបញ្ចូលសាច់ប្រាក់ទៅក្នុងអាជីវកម្មដែលកំពុងតែត្រូវការ ខណៈសប្តាហ៍នេះ ​ក្រុមហ៊ុន​ក៏បានខកខានការទូទាត់ការប្រាក់ចំនួន ២ លើកផងដែរលើមូលបត្របំណុល​ដែលត្រូវទូទាត់ជាប្រាក់ដុល្លារ ប៉ុន្តែ​ការទូទាត់មូលបត្របំណុលនេះ គឺក្រុមហ៊ុនអាចមានពេលរហូតដល់ ៣០ ថ្ងៃ ។

ពាក់ព័ន្ធនឹងបញ្ហារបស់ក្រុមហ៊ុន Country Garden នេះដែរ កំពុងធ្វើឲ្យវិនិយោគិនមានក្តីព្រួយបារម្ភ​ ដោយ​នឹកឃើញដល់ក្រុមហ៊ុនអចលនទ្រព្យ​ដ៏ធំ Evergrande ដែលជួបប្រទះវិបត្តិហិរញ្ញវត្ថុយ៉ាងធ្ងន់ធ្ងរ អំឡុងឆ្នាំ ២០២១ កន្លងទៅ ។

ចាប់តាំងពីដើមឆ្នាំ ២០២៣ មក តម្លៃទីផ្សាររបស់ក្រុមហ៊ុន Country Garden បានធ្លាក់ចុះជាងពាក់កណ្តាល ហើយពាណិជ្ជករជាច្រើនរូប ក៏បាននិងកំពុងប្តូរមូលបត្របំណុលមួយចំនួនរបស់ខ្លួនផងដែរ ។

ចំពោះបញ្ហាមួយនេះ នាំឲ្យពាណិជ្ជករមានការភ្ញាក់ផ្អើលជាខ្លាំង ដោយសារតែឆ្នាំមុន ក្រុមហ៊ុនរកចំណូលបានជាង ៥០ ពាន់លានដុល្លារពីការលក់ ហើយទទួលបានអត្ថប្រយោជន៍យ៉ាងច្រើនពីវិធានការជំរុញទីផ្សារអចលនទ្រព្យ ដែលរួមបញ្ចូលការគាំទ្រផ្នែកហិរញ្ញវត្ថុ ។ សម្រាប់ក្តីបារម្ភពេលនេះ បើទោះបីជាទីក្រុងប៉េកាំងបានសន្យាគាំទ្របន្ថែមទៀតដល់ទីផ្សារអចលនទ្រព្យក៏ដោយ ក៏វិធានការអាចនឹងមិនគ្រប់គ្រាន់នោះឡើយ ។

ដោយឡែក ភាគច្រើននៃការធ្លាក់ចុះហិរញ្ញវត្ថុរបស់ក្រុមហ៊ុន Country Garden បណ្តាលមកការលក់អាផាតមិនចុះតម្លៃ ។ ទន្ទឹមនឹងនេះ ក្រុមហ៊ុនក៏បានចេញ​សេចក្តី​ព្រមានទាក់ទងនឹងប្រាក់ចំណេញនៅក្នុងខែកក្កដាផងដែរ បន្ទាប់ពីក្រុមហ៊ុនទំនងបាត់បង់ប្រាក់ចំណូលជាង ៣០ ភាគរយនៅឆមាសទី១ ដោយសារតែ​និន្នាការលក់បានធ្លាក់ចុះ ។

គួរបញ្ជាក់ថា នេះគឺជាសញ្ញាដ៏អាក្រក់មួយផ្សេងទៀតសម្រាប់ទស្សនវិស័យសេដ្ឋកិច្ចរបស់ប្រទេសចិន ខណៈដែលលោក​ ស៊ី ជីនពីង កំពុងសម្លឹងមើលការស្តារសេដ្ឋកិច្ចឡើងវិញ បន្ទាប់ពីវិធានការទប់ស្កាត់កូវីដ ១៩ ដ៏តឹងរ៉ឹងរយៈពេល ៣ ឆ្នាំមកនេះ ៕

ប្រែសម្រួល៖ នាង រតនៈ

ប្រភព៖​ New York Times