ថៃ គ្រោងខ្ចីលុយបរទេស ៦៦.៦៥ ពាន់លានដុល្លារ​បន្ថែមទៀត ទុកសម្រាប់ឆ្នាំសារពើពន្ធ ២០២៤

បើយោងតាមក្រសួងហិរញ្ញវត្ថុថៃបានឲ្យដឹងថា រដ្ឋាភិបាលថៃគ្រោងនឹងខ្ចីលុយបរទេសប្រហែល ៦៦.៦៥ ពាន់លានដុល្លារសម្រាប់ឆ្នាំសារពើពន្ធ ២០២៤ ដែលចាប់ផ្តើមនៅថ្ងៃទី១ ខែតុលានេះតទៅ ហើយកើនឡើងប្រហែល ៩ ភាគរយ បើប្រៀបធៀបនឹងឆ្នាំបច្ចុប្បន្ន ។

តាមប្រភពដែលដឹងពីគម្រោងនេះនិយាយថា ថវិកាជាង ១៩ ពាន់លានដុល្លារនៃកម្ចីសរុបនឹង​ផ្តល់​ហិរញ្ញប្បទាន​ដល់​ឱនភាព​ថវិកា ខណៈប្រហែល ៤៧ ពាន់លានដុល្លារត្រូវបានគេកំណត់សម្រាប់ការផ្តល់ហិរញ្ញប្បទានឡើងវិញ និងដើម្បីរៀបចំរចនាសម្ព័ន្ធបំណុលដែលមានស្រាប់ ។

ទន្ទឹមនឹងនេះ ប្រហែលពាក់កណ្តាលនៃកម្ចីនោះ នឹងត្រូវបានបង្កើនតាមរយៈការលក់មូលបត្របំណុលរបស់រដ្ឋាភិបាល ខណៈដែលនៅសល់នឹងត្រូវបានផ្តល់ហិរញ្ញប្បទានតាមរយៈវិក្កយបត្ររតនាគារ ប័ណ្ណសន្សំ ការប្តូរលិខិតធានា និងលិខិតសន្យាជាដើម ។

ពាក់ព័ន្ធនឹងបញ្ហានេះដែរ រដ្ឋាភិបាលគ្រោងថៃក៏គ្រោងនឹងលក់មូលបត្របំណុលរដ្ឋាភិបាលរហូតដល់ ៧.៥ ពាន់លានដុល្លារក្នុងត្រីមាសចុងក្រោយនៃឆ្នាំនេះ ។

គួរឲ្យដឹងថា គណៈរដ្ឋមន្ត្រីថ្មីរបស់ប្រទេសថៃ បានអនុម័តលើការចំណាយថវិកាខ្ពស់ចំនួន ៩៦ ពាន់លានដុល្លារសម្រាប់ឆ្នាំសារពើពន្ធ ២០២៤ រួមជាមួយនឹងឱនភាពថវិកាធំជាង ១៩ ពាន់លានដុល្លារ ដើម្បីស្តារសេដ្ឋកិច្ចឡើងវិញ ៕

ប្រែសម្រួល៖ នាង រតនៈ

ប្រភព៖ Bangkok post

ចុចអាន៖ នាយករដ្ឋមន្ត្រីថៃ បង្ហើបផ្តល់តំណែងមួយ ក្នុងជួររដ្ឋាភិបាលឲ្យលោក ថាក់ស៊ីន ពេលចេញពីពន្ធនាគារ