ព័ត៌មានអន្ដរជាតិ

នាយករដ្ឋមន្ត្រីថៃ បង្ហើបផ្តល់តំណែងមួយ ក្នុងជួររដ្ឋាភិបាលឲ្យលោក ថាក់ស៊ីន ពេលចេញពីពន្ធនាគារ

បានផុស

៣ years មុន

នៅ

ថ្ងៃសុក្រ ២២ កញ្ញា ២០២៣

ដោយ

នាយករដ្ឋមន្ត្រីថៃ លោក សេតថា ថាវីស៊ីន មើលឃើញថា លោក ថាក់ស៊ីន ស៊ីណាវ៉ាត្រា អាចដើរតួនាទីមួយក្នុងជួររដ្ឋាភិបាល នៅពេលគាត់ត្រូវបានដោះលែងពីពន្ធនាគារ ។

នាយករដ្ឋមន្ត្រីថៃ លោក សេតថា ថាវីស៊ីន (រូបថត៖ Ken Kobayashi)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សេតថា បាននិយាយក្នុងបទសម្ភាសជាមួយលោកស្រី Haslinda Amin នៃទូរទស្សន៍ Bloomberg ក្នុងទីក្រុងញូវយ៉ក ជាទីដែលលោកកំពុងចូលរួមមហាសន្និបាតអង្គការសហប្រជាជាតិថា “ខ្ញុំជឿ! លោក ថាក់ស៊ីន មានតម្លៃដើម្បីបន្ថែមដល់រដ្ឋាភិបាល និងប្រជាជនថៃ”។

វត្តមានរបស់លោក សេតថា ក្នុងសម័យប្រជុំលើកទី៧៨ នៃមហាសន្និបាត UN គឺជាការចូលរួមនៅក្រៅប្រទេសលើកដំបូងរបស់គាត់ ចាប់តាំងពីចូលកាន់តំណែង។

និយាយអំពីលោកថាក់ស៊ីន ដែលនៅតែត្រូវបានគេចាត់ទុកថាជាអ្នកយុទ្ធសាស្ត្រសំខាន់របស់គណបក្សភឿថៃ លោក សេតថា បានសង្កត់ធ្ងន់ថា “គាត់នៅតែជានាយករដ្ឋមន្ត្រីដ៏មានប្រជាប្រិយបំផុត ក្នុងប្រវត្តិសាស្ត្រនយោបាយថៃ។ ជាក់ស្តែង នឹងមានផលល្អ ហើយប្រសិនបើគាត់មានសេរីភាពមែន នោះជារឿងសមហេតុផលណាស់សម្រាប់ខ្ញុំ ដែលត្រូវសុំយោបល់ពីគាត់ ក៏ដូចជានាយករដ្ឋមន្ត្រីផ្សេងទៀតដែរ”។

លោក ថាក់ស៊ីន ស៊ីណាវ៉ាត្រា (រូបថត៖ Shutterstock)

ទោះបីជាយ៉ាងណាក៏ដោយ លោកសេតថា មិនបញ្ជាក់ច្បាស់ថាតើ តួនាទីអ្វីដែលលោក ថាក់ស៊ីន គួរកាន់នោះទេ។

លោក ថាក់ស៊ីន បានវិលត្រលប់មកប្រទេសថៃវិញ កាលពីថ្ងៃទី២២ខែសីហា ក្រោយនិរទេសខ្លួនឯងនៅក្រៅប្រទេសអស់រយៈពេលជាង១៥ឆ្នាំ។

បច្ចុប្បន្នគាត់កំពុងសម្រាកក្រោយវះកាត់នៅមន្ទីរពេទ្យប៉ូលិស បន្ទាប់ពីត្រូវបានបញ្ជូនទៅមន្ទីរពេទ្យ ត្រឹមតែប៉ុន្មានម៉ោងប៉ុណ្ណោះ ក្រោយពីការកាត់ទោសដាក់ពន្ធនាគារ ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ស្តេចថៃ កាត់បន្ថយទោសជាប់ពន្ធនាគាររបស់លោក ថាក់ស៊ីន មកត្រឹម១ឆ្នាំ