ការលុបចោលគម្រោងសាងសង់ផ្ទះនៅអាល្លឺម៉ង់កើនឡើងខ្ពស់ ដោយសារតែវិបត្តិហិរញ្ញវត្ថុ

វិបត្តិ​សាងសង់​ផ្ទះ​នៅ​ប្រទេស​អាល្លឺម៉ង់​កំពុង​កាន់​តែកើនឡើង​ខ្លាំង ខណៈ​ក្រុមហ៊ុន​សាងសង់​បាននិយាយ​ថា ​ពួកគេ​កំពុង​ប្រឈមបញ្ហានេះ ដោយសារតែអតិថិជនបានលុបចោលគម្រោងសាងសង់ ក៏ដូចជាកង្វះការបញ្ជាទិញដែលបណ្ដាលមកពីវិបត្តិហិរញ្ញវត្ថុ ។

បើយោងតាមការស្ទង់មតិរបស់វិទ្យាស្ថាន Ifo ដែលមានមូលដ្ឋាននៅទីក្រុង Munich បានឲ្យដឹងថា នៅក្នុងខែតុលា ក្រុមហ៊ុនសាងសង់លំនៅដ្ឋានប្រមាណ ២២.២ ភាគរយទទួលរងផលប៉ះពាល់ ដោយសារតែការលុបចោលគម្រោង ។ នោះគឺជាកម្រិតខ្ពស់បំផុត ចាប់តាំងពីកំណត់ត្រាបានចាប់កើតមានឡើងនៅក្នុងឆ្នាំ ១៩៩១ ដែលមានត្រឹមកម្រិត ២១.៤ ភាគរយប៉ុណ្ណោះ ស្របពេលដែល ការរំពឹងទុកអាជីវកម្មនៅក្នុងវិស័យនេះ ក៏បានធ្លាក់ចុះដល់កម្រិតទាបបំផុតក្នុងកំណត់ត្រាផងដែរ ។

បើតាមលោក Klaus Wohlrabe ប្រធានផ្នែកអង្កេតនៅវិទ្យាស្ថាន Ifo បាននិយាយថា ទស្សនវិស័យសម្រាប់ការសាងសង់លំនៅដ្ឋាននៅតែអាប់អួរនៅឡើយ ដោយក្រុមហ៊ុនជាច្រើនកំពុងរៀបចំយុទ្ធសាស្ត្រសម្រាប់គ្រាលំបាកនេះ ។ ស្ថានភាពបែបនេះ កំពុងតែគម្រាមកំហែងដល់ក្រុមហ៊ុនសាងសង់ជាច្រើន ដោយនៅក្នុងនោះ មានក្រុមហ៊ុនមួយចំនួន បានរាយការណ៍ពីវិបត្តិហិរញ្ញវត្ថុរួចទៅហើយ ។

ពាក់ព័ន្ធជាមួយការបញ្ជាទិញវិញ គឺមានការធ្លាក់ចុះគួរឲ្យកត់សម្គាល់ ដោយសារអត្រាការប្រាក់ខ្ពស់ និងតម្លៃសម្ភារៈកើនឡើងធ្វើឲ្យមានភាពមិនច្បាស់លាស់ក្នុងចំណោមអ្នកអភិវឌ្ឍន៍ ។ នៅក្នុងខែតុលា ក្រុមហ៊ុនសាងសង់ប្រមាណ ៤៨.៧ ភាគរយបានរាយការណ៍ពីការខ្វះខាត ឬការបញ្ជាទិញ ដោយបានកើនឡើងពីកម្រិត ៤៦.៦ ភាគរយនៅក្នុងខែកញ្ញា ៕

ប្រែសម្រួល៖ នាង រតនៈ

ប្រភព៖ BNN Bloomberg