កម្ពុជានាំចេញកំពឹសបង្កកជិត ៣៦ តោន ទៅកាន់ទីផ្សារចិននៅដើមឆ្នាំនេះ

នៅក្នុងរយៈពេល ៥ ខែ ចាប់ពីខែមករា ដល់ខែឧសភា ឆ្នាំ ២០២៤ កម្ពុជាក៏បាននាំចេញ​កំពឹស​បង្កក​​ចំនួន ៣៥.៨០ តោន ទៅកាន់ទីផ្សារប្រទេសចិន បន្ទាប់ពីភាគីទាំងពីរបានចុះ​កិច្ចព្រម​​​ព្រៀង​​​ពាណិជ្ជ​​​កម្មសេរីចាប់តាំងពីឆ្នាំ ២០២០។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទចេញផ្សាយនៅថ្ងៃទី ០១ ខែកក្កដា ឆ្នាំ ២០២៤។

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍​នៅក្នុង​ពិធីទិវាមច្ឆជាតិនៅថ្ងៃទី ០១ ខែកក្កដា ឆ្នាំ ២០២៤នេះថា នេះគឺជាលទ្ធផលនៃកិច្ចសហការយ៉ាងជិតស្និទ្ធជាមួយដៃគូអភិវឌ្ឍនានា លើការពង្រឹងគុណភាព សុវត្ថិភាព និងការកែច្នៃផលិត​ផល ជលផលកម្ពុជា សម្រាប់ទីផ្សារក្នុងស្រុក និងនាំចេញ។

លោករដ្ឋមន្ត្រីក្រសួងកសិកម្មបានបញ្ជាក់ថា ការកែច្នៃដោយសហគ្រាសធុនតូច និងមធ្យមក្នុងស្រុក នឹងជួយដោះស្រាយបញ្ហាទីផ្សាររបស់ប្រជានេសាទ សម្រាប់ផលិតផលផលដែលប្រមូលបានពីធម្មជាតិ និងវារីវប្បកម្មដែលងាយបាត់បង់គុណភាពផង និងផ្តល់នូវជម្រើសផលិតផលជលផលដែលមានគុណភាព អនាម័យ និងសុវត្ថិភាពសម្រាប់អ្នកទទួល​ទានក្នុងស្រុក​ផង។

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទចេញផ្សាយនៅថ្ងៃទី ០១ ខែកក្កដា ឆ្នាំ ២០២៤​នេះ បង្ហាញថា​ ក្រៅពីកំពឹសបង្កកក៏មាន​ផលិត​ផល​ជលផលមួយ​ចំនួន​ទៀតដូចជា បង្កងប៉ាករស់ចំនួន ២.៣០ តោន និងអន្ទង់ប្រមាណ ២០០ គីឡូក្រាមផងដែរដែលត្រូវបាននាំទៅកាន់ទីផ្សារប្រទេសចិន។

សូមជំរាបថា ផលិតផលជលផលធម្មជាតិរបស់កម្ពុជា​ជាង១០ប្រភេទត្រូវបានអនុញ្ញាតឱ្យនាំចេញទៅកាន់ទីផ្សារប្រទេស​ចិន រួមមាន កំពឹសទឹកសាប អន្ទង់ទឹក​សាប បង្កកង​កណ្ដូប ត្រីប្រាធំ ត្រីប្រាខ្ចៅ ខ្យងទឹកសាបពីរប្រភេទ បង្គាខ្លឹង បង្គាស និងបង្គាប៉ារ៉ា។

នៅឆ្នាំ ២០២៣ កម្ពុជានាំចេញផលិតផលជលផល សម្រេចបាន ៣ ៦១០ តោន ទៅកាន់​ប្រទេស​​ជិតខាង មានកើនឡើងជាង ៤៥ ភាគរយ បើធៀបនឹងឆ្នាំ ២០២២ ក្នុងនោះផលិតផលស្រស់សម្រេចបាន ៣ ៤២៤ តោន និងផលិតផល​កែច្នៃចំនួន ១៨៦ តោន៕

អត្ថបទ៖ ឡេង ដេត