ចិញ្ចឹមត្រីតាមតង់កៅស៊ូ​ងាយស្រួល បាន​ចំណូល​​ប្រចាំ​ថ្ងៃ​ផង មិន​បាច់​ចាយ​លុយ​ទិញត្រី​ពីផ្សារផង

សម្រាប់ប្រជាពលរដ្ឋនៅក្នុងក្រុងបាត់ដំបងមួយចំនួនបានប្រើប្រាស់ថវិកាបន្តិចបន្តួច ចំណាយទិញតង់កៅស៊ូសម្រាប់ចិញ្ចឹមត្រី ដើម្បីបម្រើ​ដល់ការផ្គត់ផ្គង់ធ្វើជាម្ហូបអាហារប្រចាំថ្ងៃ​ក្នុង​គ្រួសារ ដែល​អាច​កាត់បន្ថយការចំណាយថវិកាទិញ​ពីទីផ្សារ ខណះក៏ជា​ប្រភព​ចំណូល​សម្រាប់​ផ្គត់ផ្គង់ក្នុងគ្រួសារ។

មន្រ្តី​ជំនាញមើលឃើញថា ការចិញ្ចឹមត្រីជាលក្ខណះគ្រួសារតាមតង់កៅស៊ូ គឺជាការល្អប្រសើរសម្រាប់ដោះស្រាយធ្វើជាម្ហូបនៅក្នុងគ្រួសារ ស្របពេលបច្ចុប្បន្ននៅបឹងទន្លេសាបប្រភេទត្រីមួយចំនួនក៏មានកំណើនទាប។

អ្នកស្រី ចាន់ នី រស់នៅសង្កាត់រតន:ក្រុងបាត់ដំបង ក្នុងចំណោមពលរដ្ឋដែលទើបចាប់ផ្តើម​ចិញ្ចឹមត្រីតាមតង់បាន​ឲ្យដឹងថា គ្រុមគ្រួសារអ្នកស្រីមានសមាជិកច្រើន ហើយការបរិភោគប្រចាំថ្ងៃភាគច្រើនគឺចូលចិត្តត្រីជាងសាច់ផ្សេងៗ។

ខណៈ​ការចំណាយថវិកាទិញត្រីក៏ថ្លៃគួរសម អ្នកស្រីជ្រើសរើស​ការចិញ្ចឹមត្រីតាមតង់ បើទោះការចិញ្ចឹមលក់មិនសូវចំណេញ តែ​ក៏បានចំណូល​ខ្លះ​ក្នុងការផ្គត់ផ្គង់ក្នុងគ្រួសារដែរ។

អ្នកស្រីបន្តថា “តាមពិតទៅ ការចិញ្ចឹមត្រីក្នុងអាងតង់កៅស៊ូ គឺពិតជាល្អប្រសើរណាស់។ យើងចង់ស្លរស្ងោរអាំង​ចៀន ពេលណាក៏បាន មិនចាំបាច់ដើររកទិញនោះទេ ខ្ញុំចិញ្ចឹមត្រីអណ្តែង ហើយក្នុងនោះខ្ញុំបានដាក់ចិញ្ចឹមខ្យងស្រែមួយចំនួនផងដែរ។ សព្វថ្ងៃអត់ពិបាករឿងម្ហូបផង ទោះអត់លុយឲ្យតែមានអង្ករដាំបាយក៏មិនពិបាកដែរ”។

អ្នកស្រី​បន្ត​ថា ការ​ចិញ្ចឹម​នេះ​បានកាត់បន្ថយក្នុងការចំណាយថវិកាទិញពីទីផ្សារ និង​អាចរកថវិកាបន្ថែមបាន ក្រោយ​ពី​សល់​ពីការផ្គត់ផ្គង់ក្នុងគ្រួសារ។

ស្រ្តី​រូបនេះបាន​អះអាង​ថា ការចិញ្ចឹមក៏មិនមានការប្រឈមនោះទេ ខណៈ​ដែល​រយះពេលនៃការហុចផលចន្លោះពី ៣ ទៅ ៤ ខែប៉ុណ្ណោះ ខណះទីតាំងសម្រាប់ការចិញ្ចឹមក៏មិនពិបាកដែរ គ្រាន់តែចំណាយថវិកាបន្តិចបន្តួចដើម្បី​ទិញ​តង់ចិញ្ចឹមទៅតាមទំហំតម្រូវការ​ជាការស្រេច។

បើតាមនាយខ័ណ្ឌរដ្ឋបាលជលផលខេត្ត លោក ជួង សុភា បានឲ្យដឹងថា ការចិញ្ចឹមត្រីជាលក្ខណះគ្រួសារតាម​តង់កៅ​ស៊ូឬស្រះ គឺជាផ្នែកមួយដ៏ប្រសើរសម្រាប់សម្រួល​ដល់ការរស់នៅប្រចាំថ្ងៃទៅលើម្ហូបអាហារផ្គត់ផ្គង់ប្រចាំថ្ងៃ កាត់បន្ថយការចំណាយ ឬប្រើឧបករណ៍ខុសច្បាប់ណាមួយ ដើម្បីទាញយកត្រីពីបឹងទន្លេសាប។

ការចិញ្ចឹមត្រីជាលក្ខណះគ្រួសារ មិនសូវចំណាយថវិការច្រើនពេកទេ ក្រៅពីតម្លៃតង់មួយចំនួនទៅតាមទំហំ។ កន្លងមកខាងលោកក៏បានអនុវត្តលើគម្រោងផងដែរ បានចុះទៅធ្វើការណែនាំ និងផ្តល់ចំណីត្រី ដែលការអនុវត្តតាមគម្រោងនេះ គឺសម្រាប់ការចិញ្ចឹមត្រីប្រភេទត្រី អណ្តែង ដើម្បីទ្រទ្រង់ជីវិភាពរបស់យុទ្ធជន នៅកងពលលេខ ៥៣ ដែលជាលទ្ធផល បានល្អប្រសើររហូតបច្ចុប្បន្ន។

លោក ជួង សុភា បាន​បន្ថែម​ថា ប្រភេទត្រីអណ្តែងជាត្រីមួយប្រភេទពេញនិយមលក់លើទីផ្សារ ហើយមានតម្លៃថ្លៃគួរសម ទាំងត្រីស្រស់ ទាំងត្រីឆ្អើរ ហើយ​ការកែច្នៃធ្វើម្ហូបក៏បានច្រើនប្រភេទផងដែរ។

លោកថា ចំពោះការថែទាំ និងផ្តល់ចំណីសម្រាប់ប្រភេទត្រីអណ្ដែង​មិនលំបាកទេ គឺផ្តល់​តាមរយះកាកសំណល់​ផ្ទះ​បាយ ហើយ ១ អាទិត្យដូរទឹកម្តង ត្រឹម ៥០ ភាគរយប៉ុណ្ណោះ មានន័យថា យកទឹកចេញត្រឹម​ពាក់កណ្តាល ហើយដាក់បញ្ចូលពាក់​កណ្តាលវិញ។ តែទឹកដែលយកចេញគឺសម្រាប់ស្រោចទៅលើបន្លែគ្រប់ប្រភេទ ព្រោះជា​ប្រភពជីដ៏សំខាន់មួយ​ដែលកើត​ចេញពីកាកសំណល់ផ្ទះបាយ មិនអាចយកចេញហើយចោលដោយអត់ប្រយោជន៍នោះទេ។

លោកក៏បានជំរុញឲ្យប្រជាពលរដ្ឋចិញ្ចឹមប្រភេទត្រីនេះផងដែរ ដោយសារ​តែមិនពិបាករកចំណីនោះទេ ហើយហុចផលមក​វិញ ត្រឹមរយះពេល ៣ ទៅ ៤ ខែប៉ុណ្ណោះ។

បើតាម​មន្ត្រីកសិកម្មខេត្តបាត់ដំបង​ ចំនួនពលរដ្ឋដែលចិញ្ចឹមត្រីជាលក្ខណះគ្រួសារទាំងក្នុងស្រះនិងអាងតង់កៅស៊ូសរុបចំនួន​ជាង ៣ ០០០ គ្រួសារ ក្នុងនោះមានចិញ្ចឹមតាមតង់់កៅស៊ូចំនួន ៦៥ គ្រួសារ ដែល​តួលេខនេះ​ក្នុងឆ្នាំ ២០២៣ ចំពោះ​ឆ្នាំ២០២៤ នៅមិនទាន់បានធ្វើបច្ចុប្បន្នភាពនៅឡើយ៕

អត្ថបទ៖ សៅ សារិទ្ធ