សេដ្ឋកិច្ច

កម្ពុជារកចំណូលបានជាង ២៧ លានដុល្លារ ពីការលក់សំបុត្រចូលទស្សនារមណីយដ្ឋានអង្គរ

បានផុស

២ years មុន

នៅ

ថ្ងៃព្រហស្បតិ៍ ១ សីហា ២០២៤

ដោយ

ភ្ញៀវទេសចរបរទេសជាង ៥៨ ម៉ឺននាក់ បានទិញសំបុត្រចូលទស្សនារមណីយដ្ឋានអង្គរនៅក្នុងរយៈពេល ៧ ខែ ឆ្នាំ ២០២៤ ដែលជួយឱ្យគ្រឹះស្ថានអង្គររកចំណូលបានជាង ២៧ លានដុល្លារ (២៧ ១៧៧ ៤៣០) កើនឡើង ៣៣,៧៦% ធៀបរយៈពេលដូចគ្នាឆ្នាំ ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍របស់គ្រឹះស្ថានអង្គរចេញផ្សាយនៅថ្ងៃទី ០១ ខែសីហា ឆ្នាំ ២០២៤ បង្ហាញថា នៅក្នុងរយៈពេល ៧ ខែ (គិតចាប់ពីខែមករា-កក្កដា) មានភ្ញៀវទេសចរបរទេសចំនួន ៥៨៤ ៣៧៥ នាក់ បានទិញសំបុត្រចូលទស្សនារមណីយដ្ឋានអង្គរ មានការកើនឡើង ៣៣% ធៀបនឹងរយៈពេលដូចគ្នាកាលពីឆ្នាំមុន។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATACC) បានថ្លែងប្រាប់កម្ពុជាថ្មីថា ស្ថានភាពភ្ញៀវទេសចរនៅខេត្តសៀមរាបនៅមានកម្រិត ខណៈចំនួនទេសចរភាគច្រើនកើនឡើងនៅតាមព្រំដែន ដែលមានភ្ញៀវជនជាតិថៃ និងវៀតណាម ចូលមកលេងតាមកាស៊ីណូ រយៈពេលខ្លីហើយត្រឡប់ទៅវិញ។

លោក ធួន ស៊ីណាន បញ្ជាក់ថា ស្ថានភាពភ្ញៀវទេសចរនៅកម្ពុជាមិនទាន់មានភាពល្អប្រសើរនៅឡើយទេ ដែលមានកំណើនតិចតូច និងមិនទាន់មានសញ្ញាវិជ្ជមានច្រើនគួរឱ្យកត់សម្គាល់នោះទេ។

យោងតាមក្រសួងទេសចរណ៍ នៅក្នុងឆមាសទី១ ឆ្នាំ ២០២៤ កម្ពុជាទទួលបានភ្ញៀវអន្តរជាតិសរុបចំនួនជាង ៣,១៦ លាននាក់ (៣ ១៦៦ ៤៩៧) មានការកើនឡើង ២២,៧% ធៀបនឹងរយៈពេលដូចគ្នានៅឆ្នាំ២០២៣។

ក្នុងចំណោមទេសចរជាង ៣,១៦ លាននាក់ទេសចរថៃឈរនៅលំដាប់លេខរៀងទី ១ មានចំនួន ៩៥៥ ២៥០ នាក់ កើន ៩,៧% វៀតណាមចំនួន ៦៣៩ ៥៤៩ នាក់ កើន ៣៨% ចិន ៣៨៩ ៣៦០ នាក់ កើន ៤៥,២% ឡាវ ១៨៨ ៧២៦ កើន៣៤,៤% អាមេរិក ១១២ ០៤៣ កើន ១៥,៧%៕

អត្ថបទ៖ ឡេង ដេត

Related Topics:គ្រឹះស្ថានអង្គរ