ជប៉ុន៖ កម្ពុជាមានកាលានុវត្តភាព និងសក្ដានុពល​វិនិយោគ

លោកស្រី ម៉ារីសា ហារុតា (Marisa Haruta) ប្រធានអង្គការពាណិជ្ជកម្មក្រៅ​ប្រទេសជប៉ុន​ប្រចាំ​នៅកម្ពុជា ដែលផុតអាណត្តិការងារ បានឱ្យដឹងថា ក្នុងរយៈពេល៤ឆ្នាំដែលលោកស្រី បំពេញការងារនៅកម្ពុជា លោក​ស្រីបាន​សង្កេតឃើញកាលានុវត្តភាព និងសក្តានុពលធំធេងនៅ​កម្ពុជា ដែលក្រុមហ៊ុនជប៉ុនមួយ​ចំនួនមិនទាន់បានដឹងនៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ម៉ារីសា ហារុតា លើកឡើងនៅក្នុងជំនូបពិភាក្សាការងារជាមួយអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជានៅព្រឹកថ្ងៃទី ១៤ ខែសីហា ឆ្នាំ ២០២៤។

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា មានប្រសាសន៍ថា កម្ពុជា-ជប៉ុនមាន​ទំនាក់ទំនង​ដ៏រឹងមាំ ទាំងផ្នែកសេដ្ឋកិច្ច ពាណិជ្ជកម្ម វិនិយោគ និងប្រជាជន។ ជប៉ុនគឺជាដៃគូពាណិជ្ជកម្មនិងវិនិយោគដ៏ចម្បងមួយរបស់កម្ពុជា។ ហើយថា​ ប្រទេសទាំងពីរបានលើកកម្ពស់ទំនាក់ទំនងទ្វេភាគី ទៅជាភាពជាដៃគូយុទ្ធសាស្រ្តគ្រប់ជ្រុងជ្រោយ កាលពីឆ្នាំ២០២៣ កន្លងទៅ។

អ្នកឧកញ៉ា ក៏បានលើកឡើងអំពីចក្ខុវិស័យ កម្ពុជាឆ្នាំ២០៣០ ក្លាយជាប្រទេសចំណូល​មធ្យមកម្រិតខ្ពស់ និងកម្ពុជាឆ្នាំ២០៥០ ក្លាយជាប្រទេសចំណូលខ្ពស់។

កម្ពុជា គឺជាគោលដៅវិនិយោគដ៏គួរទាក់ទាញ និងមានទីផ្សារទូលំទូលាយនៅទូទាំងពិភពលោក ដោយមានក្របខណ្ឌកិច្ចព្រមព្រៀងសេរីតំបន់និងទ្វេភាគីជាមួយប្រទេសជាច្រើន។

អ្នកឧកញ៉ា ជំរុញអង្គការពាណិជ្ជកម្មក្រៅប្រទេសជប៉ុន សហ​ការ​រៀបចំព្រឹត្តិការណ៍ធុរកិច្ច និងទាញយក​ប្រយោជន៍​អតិ​បរ​មាពីក្របខណ្ឌកិច្ចសហប្រតិបត្តិការតំបន់ និងទ្វេភាគីកម្ពុជា-ជប៉ុន។

លោកស្រី ម៉ារីសា ហារុតា​បានលើកឡើងអំពីកិច្ចសហប្រតិបត្តិល្អរវាង​អង្គការពាណិជ្ជកម្មក្រៅប្រទេសជប៉ុន និងសភា​ពាណិជ្ជកម្មកម្ពុជា ជាពិសេស ការរៀបចំព្រឹត្តិការណ៍ជំរុញធុរកិច្ចនិងវិនិយោគរួមគ្នា​ជាច្រើនលើកច្រើនសារ។

លោកស្រីបានគូសបញ្ជាក់ថា ក្នុងរយៈពេល៤ឆ្នាំដែលលោកស្រី បំពេញការងារនៅកម្ពុជា លោកស្រីបានសង្កេតឃើញកាលានុវត្តភាព និងសក្តានុពលធំធេងនៅកម្ពុជា ដែលក្រុមហ៊ុនជប៉ុន​មួយចំនួនមិនទាន់បានដឹងនៅឡើយ។

អង្គការពាណិជ្ជកម្មក្រៅប្រទេសជប៉ុន បានសហការផលិតជាវីដេអូជាច្រើនដើម្បីផ្សព្វផ្សាយអំពីកម្ពុជា ទៅកាន់វិនិយោគិនជប៉ុន។

លោកស្រីបានថ្លែងអំណរគុណ សភាពាណិជ្ជកម្មកម្ពុជា និងអ្នកឧកញ៉ា គិត ម៉េង ដែលតែងចូលរួមគាំទ្រ និងសហការជាមួយអង្គការពាណិជ្ជកម្មក្រៅប្រទេសជប៉ុន ដែលធ្វើឲ្យបេសកកម្មរបស់លោកស្រីទទួលបានជោគជ័យនិងលទ្ធផលជាផ្លែផ្កា។

ក្នុងឱកាសនៃជំនួបពិភាក្សាការងារនិងជម្រាបលា នាពេលនេះ លោកស្រី បានណែនាំឲ្យស្គាល់ប្រធានថ្មីនៃអង្គការពាណិជ្ជកម្មក្រៅប្រទេសជប៉ុនប្រចាំនៅកម្ពុជា គឺលោក វ៉ាកាបាយ៉ាស៊ិ កូហី (Wakabayashi Kohei) ដែលនឹងបំពេញភារកិច្ចបន្តពីលោកស្រី។

លោក វ៉ាកាបាយ៉ាស៊ិ កូហី បង្ហាញនូវសេចក្តីសោមនស្សរីករាយ និងបន្តកិច្ចសហប្រតិបត្តិការល្អ​ជាមួយសភាពាណិជ្ជកម្មកម្ពុជា៕