ព័ត៌មានអន្ដរជាតិ
តម្លៃប្រេងបន្តធ្លាក់ចុះជាង២ដុល្លារថ្ងៃអង្គារ ដោយសារទស្សនវិស័យខ្សោយចំពោះតម្រូវការ
តម្លៃប្រេងបានបន្តធ្លាក់ចុះជាង ២ ដុល្លារ ពេលបើកការជួញដូរនាព្រឹកថ្ងៃអង្គារនេះ ក្រោយពេលអង្គការនៃប្រទេសនាំចេញប្រេងកាត (OPEC) ទម្លាក់ទស្សនវិស័យរបស់ខ្លួនស្ដីពីកំណើនតម្រូវការប្រេងពិភពលោកឆ្នាំ ២០២៤ និង ២០២៥ ខណៈមានសេចក្ដីរាយការណ៍ថា អ៊ីស្រាអែលអាចនឹងវាយប្រហារលើយោធាអ៊ីរ៉ង់ដើម្បីជាការសងសឹក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
តម្លៃប្រេងឆៅនាពេលអនាគត ម៉ាក Brent បានធ្លាក់ចុះប្រមាណ ២,១១ ដុល្លារ ឬ ២,៧ ភាគរយ ដោយជួញដូរនៅត្រឹម ៧៥,៣៥ ដុល្លារ/បារ៉ែល ខណៈតម្លៃប្រេងឆៅនាពេលអនាគតអាមេរិក ម៉ាក West Texas Intermediate (WTI) បានធ្លាក់ចុះ ២,០៧ ដុល្លារ ឬ ២,៨ ភាគរយ ដោយជួញដូរនៅត្រឹម ៧៣,៧៦ ដុល្លារ/បារ៉ែល។
តម្លៃប្រេងទាំងពីរបានធ្លាក់ចុះប្រហែល ២ ដុល្លារ/បារ៉ែល រួចស្រាប់ទៅហើយ នៅពេលបញ្ចប់ការជួញដូរកាលពីថ្ងៃចន្ទ។ ការបន្តធ្លាក់ចុះនេះ កើតឡើងទោះបីជាជម្លោះមជ្ឈិមបូព៌ា ដែលអាចរំខានដល់ការផ្គត់ផ្គង់ប្រេង និងធ្វើឱ្យតម្លៃហក់ឡើងនោះ បន្តស្ថិតនៅក្នុងស្ថានភាពតានតឹងក៏ដោយ។
ជុំវិញបញ្ហានេះ អ្នកវិភាគបានភ្ជាប់វាទៅនឹងរបាយការណ៍ដែលថា អ៊ីស្រាអែល «មានឆន្ទៈ» វាយប្រហារលើគោលដៅយោធារបស់អ៊ីរ៉ង់ ជាជាងកំណត់គោលដៅលើហេដ្ឋារចនាសម្ព័ន្ធនុយក្លេអ៊ែរ ឬប្រេងរបស់ប្រទេសនេះ ដើម្បីជាការសងសឹកលើក្រុងតេអេរ៉ង់ ដែលផ្លោងមីស៊ីលលើអ៊ីស្រាអែលជិត ២០០ ដើម កាលពីដើមខែ។ សេចក្ដីរាយការណ៍នេះ បន្ថយការព្រួយបារម្ភដែលថា ការសងសឹករបស់អ៊ីស្រាអែលនឹងរំខានដល់ការផ្គត់ផ្គង់ប្រេង ដែលធ្វើឱ្យតម្លៃរបស់វាហក់ឡើងខ្ពស់ភ្លាមៗ។
ប៉ុន្តែកត្តាជំរុញឱ្យតម្លៃជួញដូរធ្លាក់ចុះកាន់តែខ្លាំងនោះ គឺទស្សនវិស័យតម្រូវការប្រេងលើពិភពលោករបស់ OPEC ដែលចេញផ្សាយកាលពីថ្ងៃចន្ទ។ ក្នុងរបាយការណ៍ប្រចាំខែរបស់ខ្លួន អង្គការនេះបាននិយាយថា តម្រូវការប្រេងពិភពលោកនឹងកើនឡើងត្រឹមតែ ១,៩៣ លានបារ៉ែល/ថ្ងៃប៉ុណ្ណោះ ក្នុងឆ្នាំ ២០២៤ ដោយធ្លាក់ចុះពីកំណើន ២,០៣ លានបារ៉ែល/ថ្ងៃ ដែល OPEC បានព្យាករទុកដោយគ្មានការកែប្រែរាប់តាំងពីខែកក្កដា ឆ្នាំ ២០២៣។
ចិន ដែលជាប្រទេសនាំចូលប្រេងដ៏ធំបំផុតមួយរបស់ពិភពលោក រួមចំណែកមួយភាគធំសម្រាប់ការធ្លាក់ចុះនៃកំណើនតម្រូវការប្រចាំឆ្នាំ។ OPEC បានកាត់បន្ថយការព្យាករកំណើនតម្រូវការរបស់ចិន មកត្រឹម ៥៨០ ០០០ បារ៉ែល/ថ្ងៃ ពីប្រមាណ ៦៥០ ០០០ បារ៉ែល/ថ្ងៃ ដោយសារតែបញ្ហាសេដ្ឋកិច្ច និងការងាកទៅរងថាមពលស្អាត។
ហើយចំពោះឆ្នាំ ២០២៥ វិញ OPEC បានកាត់បន្ថយការប៉ាន់ប្រមាណកំណើនតម្រូវការប្រេងពិភពលោករបស់ខ្លួន មកនៅត្រឹម ១,៦៤ លានបារ៉ែល/ថ្ងៃ ពីប្រមាណ ១,៧៤ លានបារ៉ែល/ថ្ងៃ៕
-
ព័ត៌មានអន្ដរជាតិ១ សប្តាហ៍ agoអាល្លឺម៉ង់ ក្តៅខ្លាំង ដល់ថ្នាក់រលាយផ្លូវរថភ្លើងអគ្គិសនី និងប្រេះហើប ផ្លូវល្បឿនលឿន
-
កីឡា១ សប្តាហ៍ agoលោក ពេជ្រ សុផាន់ រំលឹកគុណរបស់លោក អេ ភូថង ដែលធ្លាប់ជួយខ្លួនអំឡុងឆ្នាំ២០១៤ ធ្លាក់ដល់ទាល់ច្រកអស់ផ្លូវដើរ
-
សេដ្ឋកិច្ច១ ថ្ងៃ agoអ្នកជំនាញ៖ វិស័យអចលនទ្រព្យនៅកម្ពុជាមិនទាន់មានសញ្ញាងើបឡើងវិញរហូតដល់បច្ចុប្បន្ននេះ
-
ព័ត៌មានជាតិ៦ ថ្ងៃ agoដើម្បីបញ្ចៀសការកកស្ទះ អាជ្ញាធរខណ្ឌពោធិ៍សែនជ័យ និងក្រុមហ៊ុនកាណាស៊ីធី ចុះរុះរើរបងពង្រីកផ្លូវបន្ថែម
-
ព័ត៌មានជាតិ៦ ថ្ងៃ agoឱកាសសិស្សនិស្សិត! អាហារូបករណ៍ទេពកោសល្យឌីជីថលតេជោ ៦០០កន្លែង កំពុងបើកទទួលពាក្យ
-
ព័ត៌មានអន្ដរជាតិ១ ថ្ងៃ agoតើឥណ្ឌាពិតជាខ្នងបង្អែកដ៏រឹងមាំ របស់អ៊ីស្រាអែល ដូចអ្វីដែលលោក ណេតាន់យ៉ាហ៊ូ អួតអាងមែនទេ?
-
កីឡា១ សប្តាហ៍ agoតំបន់ប្រយុទ្ធបារាំងកំពុងពេញសាច់ល្អ ខណៈ Mbappé តាមស្មើគ្រាប់បាល់ Messi
-
ព័ត៌មានជាតិ១ សប្តាហ៍ agoចាប់ពីពេលនេះពលរដ្ឋដែលត្រូវធ្វើ ឬបន្តអត្តសញ្ញាណបណ្ណមិនចាំបាច់ត្រលប់ទីលំនៅឋានដើមឡើយ