សហគមន៍កសិកម្មអន្លង់ស្វាយសាមគ្គីរុងរឿង និងដេប៉ូ អ៊ូ មួយ ចុះកិច្ចសន្យាទិញ-លក់ដំឡូងមី ៣០០០ តោន

សហគមន៍កសិកម្មអន្លង់ស្វាយសាមគ្គីរុងរឿង និងដេប៉ូ អ៊ូ មួយ នៅថ្ងៃទី ១៨ ខែតុលា ឆ្នាំ ២០២៤ បានឯកភាពចុះកិច្ចសន្យាទិញ-លក់ដំឡូងមីស្រស់ចំនួន ៣០០០ តោន។

លោក ជា ពិសី អនុប្រធាននាយកដ្ឋានកសិ-ឧស្សាហកម្ម និងសហការី នៅថ្ងៃទី ១៨ ខែតុលា ឆ្នាំ២០២៤ បានសហការជាមួយមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង ចុះសម្របសម្រួល ផ្គូផ្គង រវាងសហគមន៍កសិកម្មអន្លង់ស្វាយ​សាមគ្គីរុងរឿង ជាមួយដេប៉ូ អ៊ូ មួយ និងរវាងសហគមន៍កសិកម្មអភិវឌ្ឍន៍ចំការលើ ជាមួយដេប៉ូ លៀង ប៊ុនហៀង​ក្នុងការទិញលក់ដំឡូងមីស្រស់ ស្របតាមយន្តការផលិតកម្មកសិកម្មតាមកិច្ចសន្យា។

ជាលទ្ធផល តាមរយៈការសម្របសម្រួល គូភាគីរវាងសហគមន៍កសិកម្មអន្លង់ស្វាយសាមគ្គីរុងរឿង និងដេប៉ូ អ៊ូ មួយ ឯកភាពគ្នារៀបចំកិច្ចសន្យាក្នុងការទិញ-លក់ដំឡូងមីស្រស់ ក្នុងបរិមាណទាំង​អស់សម្រាប់តែភាគីអ្នកផលិតដែលមានឈ្មោះចូលរួមអនុវត្តក្នុងកិច្ចសន្យា និងគូភាគីរវាង​សហគមន៍​កសិកម្មអភិវឌ្ឍន៍ចំការលើ និងដេប៉ូ លៀង ប៊ុនហៀង ឯក​ភាព​គ្នារៀប​ចំកិច្ចសន្យា​ការទិញលក់ដំឡូងមីស្រស់ ចំនួន ៣០០០ តោន នឹងបានឈានដល់​កំណត់​ថ្ងៃសម្រាប់​រៀបចំពិធីចុះកិច្ចសន្យាផ្លូវការផងដែរ៕