ព័ត៌មានអន្ដរជាតិ

អាមេរិកបង្កើនការនាំចេញឧស្ម័នធម្មជាតិពង្រាវទៅចិន មុន ត្រាំ ឡើងកាន់អំណាច

បានផុស

២ years មុន

នៅ

ថ្ងៃពុធ ២០ វិច្ឆិកា ២០២៤

ដោយ

សហរដ្ឋអាមេរិកបានបង្កើនការនាំចេញឧស្ម័នធម្មជាតិពង្រាវទៅឱ្យប្រទេសចិននៅឆ្នាំនេះ ខណៈមានក្ដីបារម្ភពីភាពកាន់តែតានតឹងនៃជម្លោះពាណិញ្ជកម្ម ពេលលោក ដូណាល់ ត្រាំ ឡើងកាន់អំណាចជាប្រធានាធិបតីអាមេរិកជាថ្មី។ នេះបើតាមការចុះផ្សាយរបស់សារព័ត៌មាន Bloomberg។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យគយចិន ដែលចេញផ្សាយកាលពីថ្ងៃពុធនេះ បានបង្ហាញថា ការនាំចូលឧស្ម័នធម្មជាតិពង្រាវរបស់ចិនពីសហរដ្ឋអាមេរិក បានកើនឡើងរហូតដល់ជាង ៦៣ ភាគរយ ក្នុងរយៈពេល១០ខែដើមឆ្នាំនេះ ធៀបនឹងរយៈពេលដូចគ្នាកាលពីឆ្នាំមុន។ ការណ៍នេះ បានធ្វើឱ្យអាមេរិកក្លាយជាប្រទេសទី៥ ដែលជាប់ក្នុងបញ្ជីអ្នកផ្គត់ផ្គង់ឧស្ម័នធម្មជាតិពង្រាវដល់ចិនធំជាងគេ ដោយឈរនៅពីក្រោយអូស្ត្រាលី កាតា រុស្ស៊ី និងម៉ាឡេស៊ី។

អាមេរិកបាននាំចេញឧស្ម័នធម្មជាតិពង្រាវទៅចិន ប្រមាណ ៣,៩ លានតោន គិតមកទល់ពេលនេះ ឆ្នាំនេះ។ ទោះបីជាចំនួនដដែលបង្ហាញពីកំណើនគួរឱ្យកត់សម្គាល់ក្ដី វារួមចំណែកត្រឹមតែប្រមាណ ៦ ភាគរយ នៃការនាំចូលឧស្ម័នធម្មជាតិពង្រាវសរុបរបស់ចិនប៉ុណ្ណោះ។

យ៉ាងណាមិញ យោងតាមការចុះផ្សាយរបស់ Bloomberg អ្នកនាំចូលរបស់ចិន បានចុះកិច្ចសន្យានាំចូលឧស្ម័នធម្មជាតិពង្រាវពីសហរដ្ឋអាមេរិក ប្រមាណ ១៤ លានតោន ចាប់ពីឆ្នាំ ២០២៦ ទៅ។

អ្នកវិភាគខ្លះលើកឡើងថា កំណើននៃការនាំចូលឧស្ម័នធម្មជាតិទៅចិន អាចគ្រាន់តែជាបណ្ដោះអាសន្នប៉ុណ្ណោះ ដោយអាចធ្លាក់ចុះមកវិញ ដោយសារតែគោលនយោបាយពន្ធរបស់លោក ត្រាំ។ ប្រសិនបើរដ្ឋបាល ត្រាំ នឹងអនុវត្តការដំឡើងពន្ធ ៦០ ភាគរយ លើទំនិញនាំចូលពីចិន ដូចការគំរាមរបស់ ត្រាំ មែននោះ នោះចិនអាចនឹងសងសឹកទៅលើសហរដ្ឋអាមេរិកវិញ ដោយកំណត់គោលដៅលើមុខទំនិញផ្សាយៗ រួមទាំងឧស្ម័ន។

រូបភាពបែបនេះ បានកើតឡើងក្នុងអំឡុងសង្គ្រាមពាណិជ្ជកម្មនៅអាណត្តិមុនរបស់លោក ត្រាំ រួចហើយ ដែលកាលនោះ វាបានធ្វើឱ្យមានការរំខានខ្លាំងដល់ការផ្គត់ផ្គង់ឧស្ម័នពីអាមេរិកទៅចិនស្ទើរតែពេញមួយឆ្នាំ ២០១៩៕