ម្ចាស់កសិដ្ឋាន​នៅមណ្ឌលគិរី៖ ចិញ្ចឹមជ្រូកកណ្ដុរ ងាយស្រួលរកទីផ្សារ និងទទួលបានចំណូលខ្ពស់

ចាប់ផ្ដើមពីការសិក្សាឈ្វេងយល់ដោយខ្លួនឯង អ្នកនាង ជួន ម៉ានីតា បានក្លាយជាម្ចាស់កសិដ្ឋានចិញ្ចឹមជ្រូកកណ្តុរដ៏ធំមួយនៅក្រុងសែនមនោរម្យ ខេត្តមណ្ឌលគិរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាងម៉ានីតា បានចាប់ផ្ដើមចិញ្ចឹមជ្រូកកណ្ដុរនាឆ្នាំ២០១៦ ប៉ុន្តែការចាប់ផ្ដើមដំបូង មិនសូវសមប្រកបនោះទេ ដោយសារខ្វះបទពិសោធន៍។ មុខរបរនេះ បានចាប់ផ្ដើមហុចផលល្អប្រសើរ នាប៉ុន្មានឆ្នាំចុងក្រោយ ដោយសារតម្រូវការលើទីផ្សារខ្ពស់ ឯតម្លៃក៏សមរម្យ ទាំងការលក់ជាជ្រូករស់ និងជ្រូកឆ្អិន។

សព្វថ្ងៃ ក្នុងកសិដ្ឋានជ្រូកកណ្ដុររបស់អ្នកនាងម៉ានីតា មានមេពូជ ចំនួន ១៩ក្បាល ជ្រូកបា ២ក្បាល និងកូនជាង ៤០ក្បាល។ ក្នុងចំណោមបាជ្រូកពីរក្បាលនោះ មានមួយក្បាលជាពូជជ្រូកព្រៃសុទ្ធ ដែលបានចូលជាមួយហ្វូងកូនជ្រូក​តែពីតូច។

ម្ចាស់កសិដ្ឋានខាងលើ បានបន្តថា ការចិញ្ចឹមជ្រូកកណ្ដុរ ងាយស្រួលចិញ្ចឹមជាងជ្រូកធម្មតា ដោយសារវា​ជា​ពូជ​ធន់នឹងអាកាសធាតុ និងមិនងាយឆ្លងជំងឺ។ សម្រាប់ចំណីវិញ ក៏ស្រួលដែរ គឺដាក់តែបបរដើមចេក ជាមួយកន្ទួកចុងអង្ករ ឬបន្ថែម​ផ្លែចេក និងបន្លែផ្សេងផ្សេងជាការស្រេច។ ចំពោះបញ្ហាប្រឈមក៏មានខ្លះដែរ ជាពិសេសកូនតូចដែលទើបនឹងកើត ដែលទាមទារការយកចិត្តទុកដាក់ខ្ពស់។

សម្រាប់ប្រាក់ចំំណូលវិញ អ្នកនាងមិនអាចគណនា​ជាតួលេខជាក់ស្ដែងនោះទេ ប៉ុន្តែបានច្រើនអាចចិញ្ចឹមជីវិតបានសមរម្យ។ សម្រាប់គម្រោងនាថ្ងៃអនាគត អ្នកនាងគ្រោងពង្រីកទ្រុងចិញ្ចឹមបន្ថែមទៀត ដើម្បីឲ្យទាន់តម្រូវការទីផ្សារ។

ម្ចាស់កសិដ្ឋានដដែល ក៏បានបញ្ជាក់ដែរថា ប្រសិនបើកសិករណាមានចំណាប់អារម្មណ៍ចង់ចិញ្ចឹមជ្រូកកណ្ដុរ អ្នកនាងអាច​បង្រៀនពីបច្ចេកទេស ព្រមទាំងទទួលទិញក្នុងតម្លៃខ្ពង់ផងដែរ។ សម្រាប់អតិថិជនដែលចង់កុម្ម៉ង់ ជ្រូករស់ ឬជ្រូកខ្វៃ អាចទាក់ទងនៅហាងស៊ុបបៃតងដែលមានអាសយដ្ឋាន ស្ថិតនៅក្រុងសែនមនោរម្យ ខេត្តមណ្ឌលគិរី និងសាខានៅរាជធានីភ្នំពេញ៕

អត្ថបទ៖ រៀម សុខហេង